സോഷ്യൽ മീഡിയയിൽ താരങ്ങളെ ട്രോളുന്നത് വലിയ അത്ഭുതമുള്ള കാര്യമൊന്നുമല്ല. ട്രോളുകളിൽ പ്രതികരിക്കുന്നവർ വളരെ ചുരുക്കമാണ്. പ്രതികരണം എപ്പോഴും സോഷ്യൽ മീഡിയയിലൂടെയായിരിക്കും. എന്നാൽ തന്നെ ട്രോളിയവനെ മുന്നിൽ കണ്ട ബോളിവുഡ് നടി സറീന്‍ ഖാന്റെ പ്രതികരണം ആരാധകരെ ഞെട്ടിച്ചിരിക്കുകയാണ്. എം ടിവിയുടെ ട്രോളിങ്ങിന് ഇരയായവരെയും ട്രോള്‍ ചെയ്യുന്നവരെയും ഒരുമിച്ചു പങ്കെടുപ്പിക്കുന്ന ട്രോള്‍ പോലീസ് എന്ന പരിപാടിയിൽ താരം ട്രോളനോട് പ്രതികരിച്ചതിങ്ങനെ; ‘എന്റെ കൈയ്ക്ക് നിന്റെ മുഖത്തേക്കാള്‍ വലിപ്പമുണ്ട്. ഞാന്‍ നിനക്കിട്ട് ഒന്നു തന്നാല്‍ നിന്റെ താടിയെല്ല് പൊട്ടിപ്പോകും'.

തന്റെ പോസ്റ്റുകള്‍ക്ക് സ്ഥിരം മോശം കമന്റിടുകയും, അശ്ലീലം പറയുകയും ചെയ്യുന്ന യുവാവിനോട്‌ പ്രതികരിക്കാനുള്ള അവസരമാണ് ഈ ചാനല്‍ പരിപാടിയിലൂടെ താരത്തിന് കിട്ടിയത്. അത് താരം നന്നായി തന്നെ വിനിയോഗിക്കുകയും ചെയ്തു.ട്രോളുകള്‍ അതിന് ഇരയാകുന്നവരെ എങ്ങനെ ബാധിക്കുന്നെന്ന് പറഞ്ഞു കൊണ്ട് കഴിഞ്ഞ ദിവസം സറീന്‍ വാര്‍ത്താ കുറിപ്പ് ഇറക്കിയിരുന്നു. എന്റെ അമ്മ സോഷ്യല്‍ മീഡിയയില്‍ ഉണ്ടായിരുന്നെങ്കില്‍ ഈ മോശപ്പെട്ട കമന്റുകള്‍ കണ്ട് ഒരുപാട് വിഷമിച്ചേനെ എന്നും താരം പറഞ്ഞിരുന്നു.