ചില സിനിമകളുടെ ചിത്രീകരണം നീണ്ടുപോയതോടെ തന്നെ ഒതുക്കാനുള്ള ശ്രമം പോലും നടന്നെന്ന് സുരേഷ് ഗോപിയുടെ മകന്‍ ഗോകുല്‍ സുരേഷ്. ഇരയിലെ തന്റെ കഥാപാത്രമായ ഡോക്ടര്‍ ആര്യനെ പ്രേക്ഷകര്‍ സ്വീകരിക്കുമ്പോഴും തന്നെ തളര്‍ത്താനുള്ള ശ്രമങ്ങള്‍ സജീവമാണെന്ന് ഗോകുല്‍ പറയുന്നു. തന്നെ ഒതുക്കാനുള്ള ശ്രമങ്ങള്‍ സജീവമായി നടക്കുന്നതിനിടെ തന്നെ തേടി എത്താന്‍ നിര്‍മ്മാതാക്കള്‍ പോലും മടി കാണിച്ചു. പക്ഷെ, തനിക്ക് അതിലൊന്നും കുഴപ്പമില്ല. ആരൊക്കെ മോശമാക്കാന്‍ ശ്രമിച്ചാലും കഴിവുള്ളവര്‍ക്ക് ഉയര്‍ന്നുവരാന്‍ സാധിക്കുമെന്നും ഗോകുല്‍ പറഞ്ഞു.

ഒരു സിനിമ പൂര്‍ത്തിയാക്കുന്നതിന് മുന്‍പ് അതില്‍നിന്ന് പിന്മാറിയെന്ന കാര്യവും ഗോകുല്‍ പറയുന്നുണ്ട്. സിനിമ ഷൂട്ടിംഗ് തീരാറായപ്പോഴാണ് ഇത് വേറൊരു തരത്തിലുള്ള സിനിമയാണെന്ന് ബോധ്യപ്പെട്ടത്. അതുകൊണ്ടാണ് പൂര്‍ത്തിയാക്കാന്‍ നില്‍ക്കാതെ ചിത്രത്തില്‍നിന്ന് ഇറങ്ങി പോന്നതെന്നും ഗോകുല്‍ പറഞ്ഞു.

ഇര ഇതുവരെ സുരേഷ് ഗോപി കണ്ടിട്ടില്ല. ആദ്യ സിനിമ കഴിഞ്ഞ മാസമാണ് കണ്ടത്. ഇനിയം ഏറെ നന്നാക്കാനുണ്ടെന്ന ഉപദേശമാണ് അദ്ദേഹം നല്‍കിയതെന്നും ഗോകുല്‍ പറഞ്ഞു. ഉണ്ണി മുകുന്ദന്‍ പ്രധാന വേഷത്തിലെത്തിയ ഇരയാണ് ഗോകുലിന്റെ ഏറ്റവും പുതിയ ചിത്രം. ഈ ചിത്രത്തിന്റെ ക്ലൈമാക്‌സ് ഉള്‍പ്പെടെ റിവ്യുവായി എഴുതി മാതൃഭൂമി വിവാദത്തിലായിരുന്നു. ഇതിനെതിരെ സിനിമക്കാര്‍ ഉള്‍പ്പെടെ എല്ലാവരും രംഗത്ത് വരികയും ചെയ്തിരുന്നു.

അതിന് പിന്നാലെയാണ് ഇപ്പോള്‍ തന്നെ ഒതുക്കാന്‍ ശ്രമങ്ങള്‍ നടന്നുവെന്ന വെളിപ്പെടുത്തല്‍ ഗോകുല്‍ നടത്തിയിരിക്കുന്നത്. എന്നാല്‍, ഒതുക്കാന്‍ നോക്കിയത് ആരാണെന്നോ പാതിവഴിയില്‍ ഇട്ടിട്ടുപോന്ന സിനിമ ഏതാണെന്നോ ഗോകുല്‍ പറഞ്ഞിട്ടില്ല. പ്രമുഖ ഓൺലൈൻ മാധ്യമത്തിന് നൽകിയ അഭിമുഖത്തിലായിരുന്നു ഗോകുൽ സുരേഷിന്റെ വിവാദ വെളിപ്പെടുത്തൽ.