രക്തത്തില്‍ ചുവന്ന രക്താണുക്കളുടെ അളവു കുറയുമ്പോള്‍ ഹീമോഗ്ലോബിന്റെയും ഹീമോഗ്ലോബിന് ഓക്‌സിജന്‍ വഹിക്കാനുള്ള ശേഷിയും കുറയും. ഇതാണ് വിളര്‍ച്ചയിലേക്കു നയിക്കുന്നത്. എല്ലാപ്രായക്കാരേയും ഒരുപോലെ വിളര്‍ച്ച ബാധിക്കുമെങ്കിലും കുട്ടികളെയും ഗര്‍ഭിണികളയുമാണ് ഇതു വളരെ പെട്ടെന്നു ബാധിക്കുന്നത്.

കഠിനമായ ക്ഷീണവും ബലഹീനതയും. നെഞ്ചു വേദന, ഹൃദയമിടിപ്പ് കൂടുതല്‍, ശ്വാസം കിട്ടാതെ വരിക. തലവേദന, മയക്കം. പൊട്ടിയ നഖങ്ങളും വിളറിയ ചര്‍മവും. രുചിയില്ലായ്മ, നാക്കിലെ തൊലി പോകുക എന്നിവ വിളര്‍ച്ചയുടെ ലക്ഷണങ്ങളാണ്. അയണ്‍ അധികമുള്ള ഭക്ഷണങ്ങള്‍ കഴിക്കുക. ഓട്ട്മീല്‍സ്, ബീന്‍സ്, ഉണക്ക മുന്തിരി, ഇരുണ്ട പച്ചിലക്കറികള്‍ തുടങ്ങിയവ ഇതില്‍പ്പെടുന്നു.

സോയാബീനില്‍ ധാരാളം അയണ്‍ അടങ്ങിയിട്ടുണ്ട്. പയറു വര്‍ഗങ്ങളും നല്ലതാണ്. ഇറച്ചിയും കടല്‍ വിഭവങ്ങളും അയണ്‍ ധാരാളമായി നല്‍കുന്നു. ഈ ഭക്ഷണസാധനങ്ങള്‍ ആഹരത്തില്‍ ഉള്‍പ്പെടുത്തിയാല്‍ അയണിന്റെ കുറവ് പരിഹരിക്കാം. ഇന്ത്യയിലെ സ്ത്രീകളില്‍ രണ്ടിലൊരാള്‍ക്ക് വിളര്‍ച്ചയുണ്ടെന്ന് കേന്ദ്ര ആരോഗ്യ മന്ത്രാലയത്തിന്റെ 2015-16 ലെ ദേശീയ കുടുംബാരോഗ്യ സര്‍വേ കണക്കുകള്‍ പറയുന്നു.

രാജ്യത്തെ 15 സംസ്ഥാന/കേന്ദ്രഭരണ പ്രദേശങ്ങളില്‍ 10 എണ്ണത്തിലും 50 ശതമാനം കുട്ടികളും വിളര്‍ച്ച ബാധിതരാണെന്നും പറയുന്നു. 11 സംസ്ഥാന/കേന്ദ്രഭരണ പ്രദേശങ്ങളിലെ 50 ശതമാനം സ്ത്രീകളും വിളര്‍ച്ച ബാധിതരാണ്. ലോകത്ത് 162 കോടി ജനങ്ങള്‍ വിളര്‍ച്ച ബാധിതരാണെന്ന് ലോകാരോഗ്യ സംഘടനയുടെ കണക്കുകള്‍ പറയുന്നു.

അയണിന്റെ കുറവ്, വിറ്റാമിന്‍ കുറവ്, അപ്ലാസ്റ്റിക് എന്നിവയെല്ലാം വിളര്‍ച്ചയ്ക്കു കാരണമാകുന്നവയാണ്. ഇതില്‍ അയണ്‍ കുറവു കൊണ്ടുണ്ടാകുന്ന വിളര്‍ച്ചയാണ് കൂടുതലായി കണ്ടുവരുന്നത്. ഭക്ഷണത്തില്‍ നിര്‍ദേശിച്ചിട്ടുള്ള അയണിന്റെ അളവ് പുരുഷന്മാര്‍ക്ക് ദിവസവും 17 മില്ലിഗ്രാമും സ്ത്രീകള്‍ക്ക് 21 മില്ലിഗ്രാമുമാണെങ്കിലും ഇന്ത്യയില്‍ ഇത് 1000 കിലോ കലോറിക്ക് 7-9 മില്ലിഗ്രാം അയണ്‍ മാത്രമാണ്.

അകത്താക്കുന്ന അയണിന്റെ അളവിലെ പോരായ്മയോടൊപ്പം ഇന്ത്യയില്‍ അയണ്‍ കുറവു മൂലമുള്ള വിളര്‍ച്ചയ്ക്കു വേറെയും പല കാരണങ്ങളുണ്ട്. തെറ്റായ അയണ്‍ സ്വീകരണം, തുടര്‍ച്ചയായ ഗര്‍ഭവും മുലയൂട്ടലും, ജനന സമയത്തെ അയണിന്റെ അളവിലെ കുറവ്, കുട്ടികളിലെ അണുബാധയുടെ ആവൃത്തി തുടങ്ങിയ കാരണങ്ങളുമുണ്ട്. ശരീരത്തിലെ 70 ശതമാനം അയണും ചുവന്ന രക്തത്തിലും പേശികളിലെ മയോഗ്ലോബിനിലുമാണ് അടങ്ങിയിരിക്കുന്നത്.

ആവശ്യത്തിന് ഹീമോഗ്ലോബിന്‍ ഉല്‍പാദിപ്പിക്കാനുള്ള ശേഷി ശരീരത്തിന് ഇല്ലാതാകുമ്പോഴാണ് വിളര്‍ച്ചയുണ്ടാകുന്നത്. ശരീരത്തിന് ആവശ്യമായ ഓക്‌സിജനേറ്റഡ് രക്തം ഉല്‍പാദിപ്പിക്കാന്‍ ചുന്ന രക്തത്തിന് കഴിയാതെ വരുന്നു. ശ്വാസകോശത്തില്‍ നിന്നും ശരീരത്തിന്റെ മറ്റു ഭാഗങ്ങളിലേക്ക് ഓക്‌സിജന്‍ എത്തിക്കുക എന്നതിനപ്പുറം ശരീരത്തിന്റെ പ്രതി രോധശക്തി നിലനിര്‍ത്തുകയെന്ന ദൗത്യം കൂടി അയണിനുണ്ട്.

ഭക്ഷണത്തിലൂടെ രണ്ടു തരം അയണാണ് ലഭിക്കുന്നത്. ഹീം അയണും നോണ്‍ ഹീം അയണും. മാംസം, ഞണ്ട്, ചെമ്മീന്‍ തുടങ്ങിയവയിലൂടെയാണ് ഹീം അയണ്‍ ലഭിക്കുന്നത്. ദിവസവും അകത്താക്കുന്ന അയണില്‍ 10 ശതമാനവും ഇതില്‍പ്പെടുന്നു. സസ്യങ്ങളിലൂടെയാണ് നോണ്‍ഹീം അയണ്‍ ലഭിക്കുന്നത്. അകത്താക്കുന്ന മൊത്തം അയണിന്റെ 90 ശതമാനവും ഇങ്ങനെ ലഭിക്കുന്നതാണ്