വെരിക്കോസ് വെയിനും പരിഹാരവും
നമ്മുടെ സിരകളിലെ വാല്വുകളുടെ തകരാറ് മൂലമുണ്ടാകുന്ന ആരോഗ്യ പ്രശ്നങ്ങളില് ഒന്നാണ് വെരിക്കോസ് വെയിന്. ആയുര്വേദത്തില് സിരജ ഗ്രന്ഥി എന്നാണ് ഇത് അറിയപ്പെടുക. ഭൂഗുരുത്വ ബലത്തെ അതിജീവിച്ച് ഹൃദയത്തിലേക്ക് അശുദ്ധരക്തത്തെ കൊണ്ട് പോകുന്നത് സിരകളാണ്. എന്നാല്, സിരകളിലെ വാല്വുകള് തകരാറിലാവുന്നതോടെ രക്തം തങ്ങിനിന്ന് രക്തക്കുഴലുകള് തടിച്ച് വീര്ക്കാനിടയാക്കും. വെരിക്കോസ് വെയിനിനിടയാക്കുന്ന പ്രധാന ഘടകം പാരമ്പര്യമാണ്.
കൂടുതല് സമയമുള്ള നില്പ്പ്, അമിതവണ്ണം തുടങ്ങി വെരിക്കോസ് വെയിനിനിടയാക്കുന്ന മറ്റ് ഘടകങ്ങളെക്കാള് രോഗം വരാന് പാരമ്പര്യത്തിന്റെ സ്വാധീനം വളരെക്കൂടുതലുമാണ്. പുരുഷന്മാരിലും സ്ത്രീകളിലും വെരിക്കോസ് വെയിന് ഉണ്ടാകാറുണ്ട്. സിരപൊട്ടി രക്തസ്രാവം ഉണ്ടാവുക, പഴുപ്പ് ഉണ്ടാവുക തുടങ്ങിയ സങ്കീര്ണതകള്ക്കിടയാക്കുന്നത് തടിച്ച് വീര്ത്ത് എഴുന്ന് നില്ക്കുന്ന വലിയ സിരകളാണ്. വെരിക്കോസ് വെയിനിനെപ്പറ്റി ആശങ്കപ്പെടുന്നവരും ഇത്തരം സിരകള് ഉള്ളവരാണ്.
എന്നാല്, ചര്മത്തിനടിയില് പടര്ന്ന് കിടക്കുന്ന സൂക്ഷ്മ സിരകളിലുണ്ടാകുന്ന വെരിക്കോസ് വെയിനും അത്യന്തം അപകടകാരിയാണ്. പാദങ്ങളില് ഉണ്ടാകുന്ന മാരകമായ കരിയാത്ത വ്രണങ്ങള്ക്ക് പ്രധാന കാരണം ചെറു സിരകളിലുണ്ടാകുന്ന വെരിക്കോസ് വെയിനനാണ്. ചര്മത്തിനടിയില് സൂക്ഷ്മ സിരകളില് ചിലന്തിവല പോലെ പടരുന്ന സ്പൈഡര് വെയിന്, റെറ്റിക്കുലര് വെയിന് തുടങ്ങിയ വെരിക്കോസ് വെയിനുകള് വ്രണങ്ങള് രൂപം കൊള്ളുന്നതിനും രക്തസ്രാവത്തിനുമിടയാക്കാറുണ്ട്.
അശുദ്ധ രക്തത്തിന്റെ 90 ശതമാനവും കടന്ന് പോകുന്നത് കാലിലെ പേശികള്ക്കുള്ളില് ആഴത്തില് സ്ഥിതി ചെയ്യുന്ന സിരകളിലൂടെയാണ്. വെരിക്കോസ് ഇവയെ ബാധിക്കാറുണ്ട്. അതുപോലെ ചര്മത്തിന് തൊട്ട് താഴെ സ്ഥിതി ചെയ്യുന്ന സിരകള്, ഇവയെത്തമ്മില് ബന്ധിപ്പിക്കുന്ന സിരകള്, പടര്ന്നു കിടക്കുന്ന സുക്ഷ്മ സിരകള് ഇവയിലും വെരിക്കോസ് എന്ന രോഗാവസ്ഥ വരാം.
പാദങ്ങളില് കൂടുതലായി കാണുന്ന ശ്രദ്ധിക്കപ്പെടാതെ പോകുന്ന വെരിക്കോസ് വെയിനിന് ഏഴ് ഘട്ടങ്ങള് കാണാറുണ്ട്. അറിയപ്പെടാതെ യാതൊരു വിധ ലക്ഷണവും ഉണ്ടാകാത്ത അവസ്ഥയായ സീറോ ഘട്ടം. അസ്വസ്ഥതകള് ഒന്നും പ്രകടമാക്കാതെ നേരിയ തോതില് സിരകള് ചര്മത്തില് പ്രകടമാകുന്ന ഒന്നാം ഘട്ടം. രണ്ടാം ഘട്ടത്തില് പാദങ്ങള്ക്കും കാലങ്ങള്ക്കും കഴപ്പ് അനുഭവപ്പെടുന്നു. തുടര്ന്ന് സിരകള് ക്രമേണ വീര്ത്ത് വലുതാകുക. വലിയ സിരകളിലെ വെരിക്കോസ് വെയിനിന് പ്രധാനമായും ഈ മൂന്ന് ഘട്ടങ്ങള് മാത്രമേ കാണാറുള്ളൂ. മൂന്നാം ഘട്ടത്തില് രാവിലെ എഴുന്നേല്ക്കുമ്പോള് കഴപ്പും നീരും കാലുകളിലോ, നിശ്ശേഷം ഇല്ലാതാകുകയോ ചെയ്യും. എന്നാല്, വൈകുന്നേരങ്ങളില് കാലുകളില് കഴപ്പും ഒപ്പം നീരുമുണ്ടാകും.
ചൊറിച്ചില്, നിറം മാറ്റം, നീര്ക്കെട്ട് തുടങ്ങിയ ലക്ഷണങ്ങളാണ് നാലാം ഘട്ടത്തില് കാണുക. അഞ്ചാം ഘട്ടത്തില് വ്രണങ്ങള് വരികയും കരിയുകയും വീണ്ടും പലതവണ ആവര്ത്തിക്കുകയും ചെയ്യാം. കരിയാത്ത വ്രണങ്ങള് രൂപം കൊള്ളുന്ന അവസാന ഘട്ടം.
വെരിക്കോസ് വെയിന് വരാന് സാധ്യത പാരമ്പര്യത്തിന് പുറമേ ഗര്ഭിണികള്, 50വയസ്സിനു മുകളില് പ്രായമുള്ളവര്, ദീര്ഘ സമയം നില്ക്കുന്നവര്, പൊണ്ണത്തടിയുള്ളവര് തുടങ്ങിയവരില് വെരിക്കോസ് വെയിന് ഉണ്ടാകാന് സാധ്യതയേറും.
ലക്ഷണങ്ങള്
കാലുകളില് രക്തം കട്ടകെട്ടി നീര് ആവുക, കാലുകളില് രക്തത്തിന്റെ ഒഴുക്ക് സുഗമമല്ലാത്തതിനാല് വെരിക്കോസ് വെയിന് ഉള്ളവരില് പ്രാണവായു, പോഷകങ്ങള്, മലിന് വസ്തുക്കള് ഇവയുടെ ചംക്രമണവും തടസ്സപ്പെടുന്നു. വ്രണങ്ങള്, പഴുപ്പോടുകൂടിയ വ്രണങ്ങള്, കട്ടികൂടിയ തൊലി, നിറംമാറ്റം ഇവ ഇവരില് ഉണ്ടാകുന്നു.
കൃത്യമായ തുടര് ചികിത്സയും ശരിയായ ജീവിതശൈലിയും വെരിക്കോസ് വെയിന് നിയന്ത്രണത്തിന് അനിവാര്യമാണ്. വേഷ്ടനം (ചുറ്റിക്കെട്ടല്) വേദനയും ഭാരവും കുറക്കും. ഔഷധങ്ങള്ക്കൊപ്പം ലേപനം, സിരാവ്യധം, വസ്തി ഇവയും അവസ്ഥകള്ക്കനുസരിച്ച് നല്കുന്നു. ആവണക്ക്, ചിരവില്വ, കുടങ്ങള്, മഞ്ചട്ടി, തഴുതാമ, അമൃത്, നറുനീണ്ടി, തെറ്റി തുടങ്ങിയ ഔഷധികള് നല്ല ഫലം തരും.
ഒപ്പം ദീര്ഘനേരം നില്ക്കുകയോ ഇരിക്കുകയോ ചെയ്യുന്നത് ഒഴിവാക്കണം. ഇരിക്കുമ്പോള് കാലുകള് പിണച്ച് വക്കാതിരിക്കാനും ശ്രദ്ധിക്കണം. ഗോതമ്പ്, റാഗി, നാരങ്ങ, നെല്ലിക്ക, മുന്തിരി, വെളുത്തുള്ളി, കാരറ്റ്, മത്തങ്ങ, മധുരക്കിഴങ്ങ്, തണ്ണിമത്തന് ഇവയും സിരകളുടെ ആരോഗ്യത്തിന് ഗുണകരമാണ്.
https://www.facebook.com/Malayalivartha
