ഫിക്‌സഡ് ഡോസ് കോമ്പിനേഷന്‍ മരുന്നുകളില്‍ 328 എണ്ണം നിരോധിച്ച് കേന്ദ്ര ആരോഗ്യ മന്ത്രാലയം. ആറു മരുന്നുകള്‍ക്ക് നിയന്ത്രണവും ഏര്‍പ്പെടുത്തി. സാധാരണ ഉപയോഗിക്കുന്ന കഫ് സിറപ്പുകള്‍, വേദനാ സംഹാരികള്‍, ജലദോഷത്തിനും പനിക്കുമുള്ള മരുന്നുകള്‍ എന്നിവ ഉള്‍പ്പെടെയുള്ള മരുന്നുകളാണ് നിരോധിച്ചത്.
വേദന സംഹാരിയായ സാറിഡോണ്‍, സ്‌കിന്‍ ക്രീമായ പാന്‍ഡേം, പ്രമേഹ മരുന്നായ ഗ്ലൂകോനോം പിജി എന്നിവ നിരോധിച്ചവയില്‍ ചിലതാണ്. രണ്ടു മരുന്നുകളുടെ സംയുക്തമാണ് ഫിക്‌സഡ് ഡോസ് കോമ്പിനേഷന്‍. ഈ സംയുക്ത മരുന്നുകള്‍ കഴിക്കുന്നതു കൊണ്ട് പ്രത്യേകിച്ച് ശ്രദ്ധേയമായ ഗുണഫലമുണ്ടാകുന്നില്ലെന്ന് ചൂണ്ടിക്കാട്ടിയാണ് ഇവ നിരോധിച്ചത്. 328 മരുന്നുകള്‍ ഉടനടി നിരോധിക്കണം എന്നാണ് ആരോഗ്യമന്ത്രാലയത്തിന്റെ ഉത്തരവ്. ഇവയുടെ ഉത്പാദനവും വിപണനവും ഉപയോഗവും അടിയന്തരമായി നിരോധിച്ചിട്ടുണ്ട്.
ഈ മരുന്നുകളിലെ ചേരുവകള്‍ക്ക് ചികിത്‌സാപരമായി ഒരു ന്യായികരണവുമില്ലെന്നും പൊതുജന താത്പര്യാര്‍ഥമാണ് നിരോധിച്ചതെന്നും ഡ്രഗ് ആന്റ് ടെക്‌നിക്കല്‍ അഡൈ്വസറി ബോര്‍ഡ് പറഞ്ഞു.