വൃത്തിയുടെ ഭാഗമാണ് കുളിയെന്നതാണ് നാം ചെറുപ്പത്തില്‍ തന്നെ കേട്ടു വരുന്നത്. ദിവസവും രണ്ട് നേരവും കുളിയ്ക്കുകയെന്നതും വിശാലമായ എണ്ണതേച്ചു കുളിയുമെല്ലാം നാം കേള്‍ക്കുന്ന വാക്കുകളില്‍ പെടുന്നു. എന്നാല്‍ വൃത്തിയുടെ പേരില്‍ കുളിയ്ക്കുന്ന നാം പലപ്പോഴും ചെയ്യുന്ന അനാരോഗ്യകരമായ കുളിത്തെറ്റുകളുണ്ട്.

അബദ്ധങ്ങള്‍ എന്നു പറയാം. ഇത്തരം ചില അബദ്ധങ്ങളെക്കുറിച്ചറിയൂ.ദിവസം രണ്ട് മൂന്നു നേരം കുളിയ്ക്കുന്നവരുണ്ട്. ഇത് ശരീരത്തിലുള്ള നോര്‍മലായുളള എണ്ണമയം കളയുന്നു. ഇത് ചര്‍മത്തിന് വരണ്ട സ്വഭാവം നല്‍കുന്നു. ചര്‍മത്തിന് ചൊറിച്ചിലും മറ്റ് അസുഖങ്ങളുമെല്ലാം വരുന്നു. ഇതു പോലെ നമ്മുടെ ചര്‍മത്തിലുള്ള ആരോഗ്യകരമായ ബാക്ടീരിയകളേയും ഫംഗസുകളേയും ഇവ നശിപ്പിയ്ക്കുന്നു. പകരം ദോഷകരമായ ബാക്ടീരിയകള്‍ വളരാന്‍ തുടങ്ങുന്നു. ശരീരത്തില്‍ പറ്റിപ്പിടിയ്ക്കുന്ന പൊടിയും മറ്റും ശരീരത്തില്‍ വീക്കമുണ്ടാക്കുന്നു.

ഇതിന് ശരീരം തന്നെ പ്രതിരോധം തീര്‍ക്കുന്നുമുണ്ട്. പാടത്തു പണിയെടുക്കുന്നവര്‍ക്കും പുറത്ത് കളിച്ചു നടക്കുന്ന കുട്ടികള്‍ക്കുമെല്ലാം വീട്ടില്‍ അടച്ചിരിയ്ക്കുന്നവരേക്കാള്‍ പ്രതിരോധം കിട്ടുന്നത് സത്യമാണ്. കൂടുതല്‍കുളിയ്ക്കുമ്പോള്‍ ഈ പ്രതിരോധവും കുറയുന്നു.ഇതു പോലെ തല രണ്ടു നേരം കുളിയ്ക്കുമ്പോള്‍ തലയിലെ മുടിയ്ക്ക് തിളക്കം നല്‍കുന്ന സെബം നഷ്ടപ്പെടും. അതായത് ചെറിയൊരു എണ്ണമയം. ഇത് മുടി വരണ്ടതാകുന്നതിനും മുടി പൊട്ടിപ്പോകുന്നതിനും കാരണമാകുന്നു. ഇതു പോലെ തന്നെ തലയില്‍ എണ്ണ ധാരാളം തേച്ച് ഇത് മുഴുവന്‍ കഴുകിക്കളയാതെ വയ്ക്കുന്ന ശീലം പലര്‍ക്കുമുണ്ട്.

ഇത് ശരീരത്തിന് നല്ലതല്ല. സൈനസിന് നീര്‍ക്കെട്ട്, വിട്ടുമാറാത്ത ജലദോഷം തുടങ്ങിയ പല പ്രശ്‌നങ്ങളുമുണ്ടാകുന്നു. ഇതു പോലെ താരന്‍ പ്രശ്‌നമുള്ളവര്‍ ഇത്തരത്തില്‍ എണ്ണ തലയില്‍ വയ്ക്കുമ്പോള്‍ താരനും മറ്റുമുണ്ടാക്കുന്ന ബാക്ടീരിയയും ഫംഗസുമെല്ലാം കൂടുതല്‍ ശക്തിയാര്‍ജിയ്ക്കുകയാണ് ചെയ്യുന്നത്.ഇതു പോലെ ചൂടുവെള്ളത്തിലെ കുളി പലര്‍ക്കും ശീലമാണ്. വാസ്തവത്തില്‍ അന്തരീക്ഷത്തിന്റെ അതേ താപനിലയിലുള്ള വെള്ളമാണ് നല്ലത്. അതായത് നോര്‍മല്‍ ടെംപറേച്ചര്‍. ചൂടു കൂടുതലുള്ള വെളളം ചര്‍മം വരണ്ടതാകാന്‍ കാരണമാകുന്നു. ചര്‍മത്തില്‍ ചുളിവുകളുണ്ടാകുന്നു. ഇതു പോലെ ചൂടുവെള്ളവും തണുത്ത വെള്ളവും കലര്‍ത്തി കുളിയ്ക്കുന്നത് അനാരോഗ്യകരമാണെന്ന ധാരണ പലര്‍ക്കുമുണ്ട്. ഇത് തെറ്റായ ധാരണയാണ്. ഇവ രണ്ടും കലര്‍ത്തി കുളിയ്ക്കുന്നത് ആരോഗ്യകരമാണ്.ഇതു പോലെ കൂടുതല്‍ നേരമെടുത്ത് കുളിയ്ക്കുന്നത് ആരോഗ്യത്തിന് ദോഷമാണ്. ഇത് ചര്‍മ പ്രശ്‌നങ്ങള്‍ വര്‍ദ്ധിപ്പിയ്ക്കുന്നു.

കൂടുതല്‍ വെള്ളമൊഴിച്ചു കുളിയ്ക്കുന്നത് ചര്‍മത്തിലെ സ്വാഭാവിക എണ്ണമയം നഷ്ടപ്പെടുത്തുന്നു. സോപ്പ് നല്ലതു പോലെ പതപ്പിയ്ക്കുന്ന സ്വഭാവം പലര്‍ക്കുമുണ്ട്. നല്ല പോലെ പതയുന്ന സോപ്പുകള്‍ കെമിക്കലുകള്‍ കൂടുതലുളളവയാണ്. ഇതു പോലെ കടുത്ത മണമുള്ള സോപ്പുകള്‍ ചര്‍മത്തിന് ദോഷമാണ്. ചില സോപ്പുകള്‍ തേച്ചു കുളിച്ച് ഇറങ്ങിയാല്‍ ചര്‍മത്തിന് അല്‍പം നിറം കൂടിയ പോലെ തോന്നലുണ്ടാകും. ഇത് ബ്ലീച്ചിംഗ് ഏജന്റ് കാരണം ഉണ്ടാകുന്നതാണ്. ഇത്തരം ബ്ലീച്ചിംഗ് ഇഫക്ടുള്ള സോപ്പുകള്‍ ചര്‍മത്തിന് ദോഷമാണ്.

ഗ്ലിസറിന്‍ പോലുളള ചേരുവകള്‍ അടങ്ങിയ, അധികം പതയാത്ത, കൂടുതല്‍ മണമില്ലാത്തതായ സോപ്പുകള്‍ ഉപയോഗിയ്ക്കുന്നതാണ് ഏറ്റവും നല്ലത്. കൈ, കാല്‍ ഇടുക്കുകള്‍, കക്ഷം, തുടയിടുക്കുകള്‍ എന്നിവിടങ്ങളില്‍ മാത്രം സോപ്പ് തേച്ചാല്‍ മതിയാകും. അല്ലെങ്കില്‍ കൂടുതല്‍ ചെളിയുമായി ബന്ധപ്പെട്ടു വരുന്നവര്‍. ഇതുപോലെ ചകിരി പോലുള്ളവ ഉപയോഗിച്ച് ചര്‍മം വൃത്തിയാക്കുന്നവരുണ്ട്. ഇത് ചര്‍മത്തില്‍ നാം പോലുമറിയാത്ത ചെറിയ മുറിവുകളും ഇതു വഴി ഇന്‍ഫെക്ഷനുകളുമുണ്ടാക്കും. ചര്‍മം വൃത്തിയാക്കാന്‍ ഇത്തരം വഴികളുടെ ആവശ്യമില്ല.

നാം ഉപയോഗിയ്ക്കുന്ന തോര്‍ത്തും ടവലുമെല്ലാം വളരെ വൃത്തിയായി കഴുകി ഉണക്കി വേണം, ഉപയോഗിയ്ക്കാന്‍. നനഞ്ഞവയില്‍ ഫംഗസ് ബാധയുണ്ടാകാന്‍ സാധ്യതയേറെയാണ്. ഇത് ചര്‍മത്തിന് അനാരോഗ്യകരമാണ്. ഇവ വൃത്തിയായി കഴുകി ഉണക്കി ഉപയോഗിയ്ക്കണം. ഇതു പോലെ ബാത്‌റൂമിലെ പൈപ്പുകളും ഷവറുകളുമെല്ലാം തന്നെ അഴിച്ച് വൃത്തിയാക്കി ഉപയോഗിയ്ക്കാം. ഇവയില്‍ പല അഴുക്കുകളും മറ്റുമുണ്ടാകാന്‍ സാധ്യതയേറെയാണ്.

ബാത്‌റൂമില്‍ കുളി കഴിഞ്ഞാല്‍ ഇത് ഉണങ്ങാന്‍ അവസരമുണ്ടാക്കുന്നത് നല്ലതാണ്. സൂര്യവെളിച്ചവും കാറ്റും കടക്കാന്‍ വഴിയുണ്ടെങ്കില്‍ ഇങ്ങിനെ ചെയ്യാം. അല്ലെങ്കില്‍ എക്‌സ്‌ഹോസ്റ്റ് ഫാന്‍ വച്ചു പിടിപ്പിയ്ക്കാം. ഇത് കുളി കഴിഞ്ഞാല്‍, ബാത്‌റൂം ഉപയോഗം കഴിഞ്ഞാല്‍ അല്‍പനേരം ഓണാക്കിയിടുകയും വേണം.