ശരീരത്തിൽ ഉണ്ടാകുന്ന ചില പ്രയാസങ്ങളെ നാം പലപ്പോഴും അവഗണിക്കുന്നത് വലിയ ആപത്തിലേക്കെത്താൻ കാരണമാകും. കാഴ്ച പ്രശ്നങ്ങള്‍, ഇടയ്ക്ക് വരുന്ന തലവേദനകള്‍ എന്നിവയെല്ലാം ഇത്തരത്തില്‍ നാം അത്ര ശ്രദ്ധ കൊടുക്കാതെ തള്ളിക്കളയുന്ന ബുദ്ധിമുട്ടുകളാണ്.

എന്നാൽ ഇത്തരത്തിലുള്ള ലക്ഷണങ്ങളെ ഒരിക്കലും അവഗണിക്കരുതെന്നും അവ തലച്ചോറിലെ മുഴകളുടെ ലക്ഷണങ്ങളാകാമെന്നുമാണ് കണ്ടെത്തൽ. തലച്ചോറിലെ മുഴകള്‍ അര്‍ബുദം മൂലമാകാം. എങ്കിലും ചില മുഴകള്‍ അര്‍ബുദ മുഴകള്‍ ആയെന്നും വരില്ല. ഇവയെ കൃത്യസമയത്ത് കണ്ടെത്തേണ്ടത് അത്യാവശ്യമാണ്.

നമ്മുടെ തലയോട്ടിക്ക് തലച്ചോറിനെ ഉള്‍ക്കൊള്ളാനുള്ള ഇടം മാത്രം ഉണ്ടാവുകയുള്ളൂ എന്നാണ് പഠനം. ഇതിനാല്‍ തലയില്‍ മുഴകള്‍ ഉണ്ടാവുകയും അവ വികസിക്കാന്‍ തുടങ്ങുകയും ചെയ്യുമ്പോൾ അവ തലയോടില്‍ അമിത സമ്മര്‍ദം ചെലുത്തുകയാണ് ഹെയ്‌യുന്നത്.

തലയില്‍ മുഴകള്‍ വളരുന്നതിന്‍റെ സൂചനകള്‍ ഇതൊക്കെയാണ്. തലച്ചോറിലെ മുഴയുടെ ലക്ഷണമാണ് ഇടയ്ക്കിടെ ഉണ്ടാകുന്ന ചുഴലിദീനം. സാധാരണയായി തലയില്‍ മുഴയുള്ള രോഗികളില്‍ 60 ശതമാനത്തിനും ചുഴലി ഉണ്ടാകാമെന്നാണ് കണ്ടെത്തൽ. ഇതിനൊപ്പം തന്നെ മനംമറിച്ചില്‍, ഛര്‍ദ്ദി പോലുള്ള ലക്ഷണങ്ങളും ഉണ്ടാകാം.ഇങ്ങനെയുള്ള ലക്ഷണങ്ങള്‍ ശ്രദ്ധയില്‍പ്പെട്ടാല്‍ ഉടനെ ഡോക്ടറെ കാണേണ്ടതാണ്.

ഇനി രാവിലെ ഉണ്ടാകുന്ന തലവേദന വളരെ ഏറെ ശ്രദ്ധിക്കേണ്ട ഒന്നാണ്. എന്നാൽ തലവേദന പല കാരണങ്ങള്‍ കൊണ്ട് ഉണ്ടാകാം. പക്ഷേ മിക്കവാറും രാവിലെ വരുന്ന അതി കഠിനമായതും മരുന്നുകള്‍ കഴിച്ചിട്ടും മാറാതിരിക്കുന്നതുമായ തലവേദന തലച്ചോറിലെ മുഴയുടെ ലക്ഷണമാകാം.

അതുപോലെ കാഴ്ചശക്തിയില്‍ പെട്ടെന്നുണ്ടാകുന്ന മാറ്റവും തലയിലെ മുഴയുടെ ലക്ഷണമാകാം. ദൃശ്യങ്ങള്‍ മങ്ങി കാണുകയും, തല തിരിക്കാതെ വശങ്ങളിലെ കാഴ്ചകള്‍ കാണാന്‍ കഴിയാതെ വരുകയും ചെയ്താല്‍ വൈകാതെ തന്നെ ഡോക്ടറെ കാണേണ്ടതാണ്.

മാത്രമല്ല വായിക്കാനോ, എഴുതാനോ പെട്ടെന്ന് ബുദ്ധിമുട്ട് തോന്നുന്നതും സംഭാഷണം വ്യക്തമാകാതെ മാറുന്നതും തലച്ചോറിലെ മുഴയുടെ പ്രകടമായ ലക്ഷണമാണ്. അതിനൊപ്പം വ്യക്തിത്വത്തിലെ മാറ്റവും ശ്രദ്ധിക്കേണ്ടതാണ്. ഒന്നിലും ശ്രദ്ധിക്കാന്‍ കഴിയാത്ത അവസ്ഥയും പെട്ടെന്ന് ദേഷ്യം വരുന്ന സാഹചര്യവുമൊക്കെ തലച്ചോറിലെ മുഴയുടെ അപൂര്‍വ സൂചനകളായി വേണം കാണാൻ. വ്യക്തിത്വത്തില്‍ തന്നെ ചെറിയ മാറ്റം വന്നതായി നിങ്ങളുടെ ചുറ്റുമുള്ളവര്‍ക്ക് ഇത് മൂലം തോന്നാം.

കുട്ടികളുടെ തലച്ചോറിലെ മുഴ ശ്രദ്ധിക്കേണ്ടതാണ്. ഓരോ വര്‍ഷവും മൂന്ന് ലക്ഷം കുട്ടികളിലെങ്കിലും തലച്ചോറില്‍ മുഴകള്‍ കാണപ്പെടാറുണ്ടെന്നാണ് പഠനം. ഇത്തരത്തിലുള്ള ചിലതരം മുഴകള്‍ കുട്ടികളുടെ ബൗദ്ധികവും നാഡീവ്യൂഹപരവുമായ പ്രവര്‍ത്തനങ്ങളെ ദീര്‍ഘകാലത്തേക്ക് ബാധിക്കാറുണ്ട്. മാത്രമല്ല ഇതുമൂലം ചില കുട്ടികളില്‍ തലയുടെ രൂപത്തിലും മാറ്റങ്ങള്‍ ദൃശ്യമാകാറുണ്ട്.