പഴത്തൊലിയില്‍ അടങ്ങിയിരിക്കുന്ന പോഷക ഗുണങ്ങളെ കുറിച്ച് അറിയണം. പഴത്തൊലി ആന്റിഓക്‌സിഡന്റുകളാല്‍ സമ്പന്നമാണ്. ഇതില്‍അടങ്ങിയിരിക്കുന്ന അമിനോ ആസിഡുകള്‍, വിറ്റാമിനുകള്‍ എന്നിവ ത്വക്കിനെ ഈര്‍പ്പമുള്ളതാക്കുവാനും, നീര്‍വീക്കം കുറയ്ക്കാനും, മുഖക്കുരുവിനെ നിയന്ത്രിക്കുവാനും കഴിവുള്ളതാണ്.

എ സി എസ് ഫുഡ് സയന്‍സ് ആന്‍ഡ് ടെക്‌നോളജി ജേണലില്‍ പ്രസിദ്ധീകരിച്ച പഠനമനുസരിച്ച് പഴത്തൊലി ഉണക്കി പൊടിച്ചതുമായി ചേര്‍ത്ത് ഉണ്ടാക്കിയ കുക്കീസില്‍ പോഷക ഗുണങ്ങള്‍ വര്‍ദ്ധിച്ചതായി കണ്ടെത്തി. ഇതിന് പുറമേ ഈ ഉത്പന്നങ്ങള്‍ കേടുകൂടാതെ കൂടുതല്‍ ദിവസങ്ങള്‍ ഇരിക്കുന്നതായും കണ്ടെത്തി. ഗോതമ്പ് മാവിനൊപ്പമാണ് പഴത്തൊലി പൊടിച്ച മാവ് ചേര്‍ത്തത്.

പഴത്തൊലി പൊടിച്ചതിന്റെ അളവ് കൂട്ടുന്നതിനൊപ്പം കുക്കികളുടെ പോഷക ഗുണങ്ങളിലും വ്യത്യാസമുണ്ടായി. കുക്കികളുടെ കാഠിന്യം വര്‍ദ്ധിക്കുകയും, അതിനൊപ്പം ആന്റിഓക്‌സിഡന്റ് ഗുണങ്ങള്‍ കൂടുകയും ചെയ്തു. വെണ്ണ, പാല്‍പ്പൊടി, പൊടിച്ച പഞ്ചസാര, സസ്യ എണ്ണ, ഗോതമ്പ് മാവ് എന്നിവ ഉപയോഗിച്ചാണ് ഈ കുക്കികള്‍ നിര്‍മ്മിച്ചത്. പഴുത്ത് കേടാവാത്ത വാഴപ്പഴത്തിന്റെ തൊലിയാണ് ഇതിനായി ശേഖരിച്ചത്. ഇത് ഉണക്കി തൊലികള്‍ പൊടിച്ച് മാവ് ആക്കുകയായിരുന്നു.