കൊച്ചു കുഞ്ഞിന്റെ തലച്ചോറിൽ ശസ്ത്രക്രിയ എന്ന് പറയുമ്പോൾ തന്നെ അതിലെ റിസ്ക് എത്രമാത്രം ആണെന്ന് ഊഹിക്കാമല്ലോ ..അപ്പോൾ അങ്ങനെ ഒരു ശസ്ത്രക്രിയ നടത്തുന്നത് കുഞ ജനിക്കുന്നതിനു മുൻപ് ആണെങ്കിലോ .. അതെ ,അമ്മയുടെ വയറ്റിൽ കിടക്കുന്ന കുഞ്ഞിൻറെ തലച്ചോറിൽ ശസ്ത്രക്രിയ നടത്തിയിരിക്കുകയാണ് അമേരിക്കയിലെ ഒരു സംഘംഡോക്ടർമാർ. .. ലോകത്ത് ആദ്യമായാണ് ഇങ്ങനെയൊരു ശസ്ത്രക്രിയ നടത്തിയത്.അമ്മയും അമ്മയുടെ വെട്ടിനുള്ളിൽ കുഞ്ഞു വാവയും സുഖമായിരിക്കുന്നു എന്നാണു റിപ്പോർട് .

തലച്ചോറിലെ രക്തക്കുഴലുകൾ ശരിയായി വികസിക്കാത്ത അവസ്ഥയായിരുന്നു കുഞ്ഞിന്. പ്രശ്നം എത്രയും പെട്ടെന്ന് പരിഹരിച്ചില്ലെങ്കിൽ ഞരമ്പുകളിൽ രക്തം കെട്ടിക്കിടക്കുകയും അതുവഴി ജീവൻ തന്നെ അപകടത്തിലാവും എന്ന അവസ്ഥ എത്തിയപ്പോഴാണ് ശസ്ത്രക്രിയ നടത്താൻ തീരുമാനിച്ചത്. ഈ അപൂർവ മസ്തിഷ്കാവസ്ഥയെ 'വീനസ് ഓഫ് ഗാലൻ മാൽഫോർമേഷൻ എന്നാണു മെഡിക്കൽ സയൻസ് വിളിക്കുന്നത്

ഈ അവസ്ഥയുള്ളവരുടെ സിരകളിലും ഹൃദയത്തിലും രക്തം അമിതമായ തോതിൽ സമ്മർദമുണ്ടാക്കുന്നു. ഇത് ജീവനു അപകടകരമായ അവസ്ഥയാണ് ..മസ്തിഷ്ക ക്ഷതം, ജനനശേഷം ഉടനടിയുള്ള ഹൃദയസ്തംഭനം എന്നിവയ്ക്കുള്ള സാധ്യത കൂടുതലാണെന്ന് ബോസ്റ്റൺ ചിൽഡ്രൻസ് ഹോസ്പിറ്റലിലെ റേഡിയോളജിസ്റ്റ് ഡോ. ഡാരൻ ഓർബാച്ച് പറഞ്ഞു.

ഇത്തരം അവസ്ഥയുള്ള കുഞ്ഞുങ്ങളിൽ നാൽപ്പത് ശതമാനത്തോളമാണ് മരണനിരക്ക്. ചിലപ്പോൾ ജീവന് പ്രശ്നമൊന്നുമുണ്ടായില്ലെങ്കിലും ഹൃദയത്തിന്റെയും തലച്ചോറിന്റെയും പ്രവർത്തനത്തെ ഇത് സാരമായി ബാധിച്ചേക്കാം. മിക്കപ്പോഴും പ്രസവത്തിന് ശേഷമാണ് ഈ അവസ്ഥ തിരിച്ചറിയുന്നത്. തുടർന്ന് ശസ്ത്രക്രിയ നടത്തിയാലും പൂർണമായി വിജയിക്കണമെന്നില്ല.

ഗർഭത്തിന്റെ മുപ്പത്തിനാലാം ആഴ്ചയിൽ അമ്മയ്ക്ക് നടത്തിയ പതിവ് അൾട്രാ സൗണ്ട് സ്കാനിംഗിലാണ് അപൂർവരോഗാവസ്ഥ തിരിച്ചറിഞ്ഞത്. കുഞ്ഞിന്റെ അവസ്ഥ അനുനിമിഷം മോശമായികൊണ്ടിരിക്കുകയാണെന്ന് വ്യക്തമായതോടെയാണ് പൊടുന്നനെ ശസ്ത്രക്രിയ നടത്താൻ തീരുമാനിക്കുകയായിരുന്നു.

അൾട്രാസൗണ്ട് ഗൈഡൻസ്, അമ്നിയോ സെന്റസിസിന് ഉപയോഗിക്കുന്ന സൂചി, നേരിട്ട് സ്ഥാപിച്ചിരിക്കുന്ന ചെറിയ കോയിലുകൾ എന്നിവ ഉപയോഗിച്ചാണ് കുഞ്ഞിന്റെ ഞരമ്പുകളിലെ വൈകല്യം മാറ്റാൻ കഴിഞ്ഞതെന്നാണ് ഡോക്ടർമാർ പറയുന്നത്. കുഞ്ഞിന്റെ ജീവന് നിലവിൽ പ്രശ്നങ്ങളൊന്നുമില്ലെന്നും ഡോക്ടർമാർ വ്യക്തമാക്കി. വിജകരമായി ശസ്ത്രക്രിയ നടത്തിയ ഡോക്ടർമാർക്കും ഇതിൽ പങ്കാളികളായ മറ്റ് ആരോഗ്യപ്രവർത്തകർക്കും ലോകത്തിന്റെ പലഭാത്തുനിന്നും അഭിനന്ദന പ്രവാഹമാണ്.

അടുത്തിടെ ഡൽഹി എയിംസിൽ ഇരുപത്തെട്ടുകാരിയുടെ ഗർഭാവസ്ഥയിലുള്ള കുഞ്ഞിന് വിജയകരമായി ഹൃദയ ശസ്ത്രക്രിയ നടത്തിയിരുന്നു. മൂന്നുതവണ ഗർഭച്ഛിദ്രത്തിന് വിധേയയായ യുവതി നാലാമതും ഗർഭിണിയായതോടെയാണ് ആശുപത്രിയിൽ എത്തിയത്. കുഞ്ഞിന് ഹൃദയത്തകരാറുള്ളതായി ഡോക്ടർമാർ പറഞ്ഞെങ്കിലും ഗർഭം തുടരാൻ ദമ്പതികൾ തീരുമാനിക്കുകയായിരുന്നു. ഇതേ തുടർന്നാണ് വയറ്റിനുള്ളിൽ വച്ച് തന്നെ കുട്ടിയുടെ ഹൃദയശസ്ത്രക്രിയ നടത്തിയത്

എയിംസിലെ കാർഡിയോതെറാസിക് സയൻസസ് സെന്ററിൽ വച്ചായിരുന്നു ശസ്ത്രക്രിയ. ഒബ്സ്റ്റെട്രിക്സ് ആൻഡ് ഗൈനക്കോളജി വിഭാഗത്തോടൊപ്പം കാർഡിയോളജി ആൻഡ് കാർഡിയാക് അനസ്തീസിയ വിഭാഗത്തിലെ വിദഗ്ധരുമുണ്ടായിരുന്നു. ശസ്ത്രക്രിയയ്ക്ക് ശേഷം കുഞ്ഞിന്റെയും അമ്മയുടെയും ആരോഗ്യനില തൃപ്തികരമാണെന്നും ഡോക്ടർമാരുടെ സംഘം നിരീക്ഷിച്ചുവരികയാണെന്നും ആശുപത്രി അധികൃതർ അറിയിച്ചു.