നേരത്തെ കണ്ടെത്തി ചികിത്സിക്കാം....സ്തനാര്‍ബുദം നേരത്തെ കണ്ടെത്തി ചികിത്സ ഉറപ്പാക്കുന്നതിന്റെ ഭാഗമായി സംസ്ഥാനത്തെ ജില്ലാ, താലൂക്ക് ആശുപത്രികളില്‍ കൂടി മാമോഗ്രാം സംവിധാനമൊരുക്കുന്നു.


നിലവില്‍ കാന്‍സര്‍ സെന്ററുകളിലും പ്രധാന മെഡിക്കല്‍ കോളേജുകളിലുമാണ് ഈ സേവനം ലഭ്യമാകുന്നത്. 2.4 കോടി രൂപ ചെലവഴിച്ച് കെ.എം.എസ്.സി.എല്‍ വഴി എട്ട് ആശുപത്രികളിലാണ് ആദ്യ ഘട്ടത്തില്‍ മാമോഗ്രാം സ്ഥാപിക്കുന്നത്.

ആലപ്പുഴ, കാസര്‍കോട്, കോഴിക്കോട്, പത്തനംതിട്ട, പാല ജനറല്‍ ആശുപത്രികളിലും തിരൂര്‍ ജില്ലാ ആശുപത്രി, അടിമാലി താലൂക്കാശുപത്രി, നല്ലൂര്‍നാട് ട്രൈബല്‍ ആശുപത്രി എന്നിവിടങ്ങളിലുമാണ് മാമോഗ്രാം യന്ത്രമെത്തുന്നത്.

ഇതില്‍ 5 ആശുപത്രികളില്‍ മെഷീനുകള്‍ എത്തി്. ബാക്കിയുള്ള 3 ആശുപത്രികളില്‍ കൂടി ഉടന്‍ എത്തുമെന്ന് മന്ത്രി വീണാജോര്‍ജ് അറിയിച്ചു.

സ്തനാര്‍ബുദം തുടക്കത്തില്‍ കണ്ടെത്താനായി സഹായിക്കുന്ന മാമോഗ്രാം എക്സ്റേ പരിശോധനയാണ്.നേരത്തെ കണ്ടെത്തി ചികിത്സിക്കാന്‍ സാധിക്കുന്നതിനാല്‍ രോഗം സങ്കീര്‍ണമാകാതിരിക്കാനും മരണനിരക്ക് കുറയ്ക്കാനും കഴിയും. സ്തനത്തിന്റെ വലുപ്പം, ആകൃതി, നിറം, മുലക്കണ്ണ് എന്നിവയിലുളള മാറ്റം, സ്തനത്തില്‍ കാണുന്ന മുഴ തുടങ്ങിയ രോഗലക്ഷണങ്ങള്‍ കണ്ടാല്‍ ഡോക്ടറെ കണ്ട് സ്തനാര്‍ബുദമല്ലെന്ന് ഉറപ്പാക്കേണ്ടതാണ്.