തലസ്ഥാനത്ത് കോളറ മരണം സ്ഥിരീകരിച്ചതോടെ ആരോഗ്യവിഭാഗം ജാഗ്രതയില്‍. ആശങ്കപ്പെടേണ്ട സാഹചര്യമില്ലെന്നും ആവശ്യമായ പ്രതിരോധ പ്രവര്‍ത്തനങ്ങളെല്ലാം സ്വീകരിച്ചിട്ടുണ്ടെന്നും വ്യക്തമാക്കി ആരോഗ്യവിഭാഗം.

സ്വകാര്യ ആശുപത്രിയില്‍ പനിബാധിച്ച് ചികിത്സയിലിരിക്കെ ഏഴുദിവസം മുമ്പ് മരിച്ച കവടിയാര്‍ മുട്ടട സ്വദേശിയായ 63കാരന് രക്തപരിശോധനയിലാണ് കോളറ സ്ഥിരീകരിച്ചത്. ബന്ധുക്കള്‍ക്കോ സമീപവാസികള്‍ക്കോ ആര്‍ക്കും രോഗലക്ഷണമില്ല.

2024 ജൂലൈയിലാണ് സംസ്ഥാനത്ത് ഏറ്റവുമൊടുവില്‍ കോളറ റിപ്പോര്‍ട്ട് ചെയ്തത്. അതും തലസ്ഥാന ജില്ലയിലായിരുന്നു. നെയ്യാറ്റിന്‍കരയിലെ സ്വകാര്യ കെയര്‍ഹോമിലെ 10 അന്തേവാസികളും ജീവനക്കാരനുമടക്കം 11 പേര്‍ക്കാണ് രോഗബാധ കണ്ടെത്തിയത്. ഇതേ ഹോമില്‍ 26 കാരന്‍ മരിച്ചെങ്കിലും രോഗബാധ സ്ഥിരീകരിക്കാനായിരുന്നില്ല. ഉറവിടം കണ്ടെത്തുന്നതിന് പലവിധ പരിശോധനകള്‍ നടത്തിയെങ്കിലും ഫലവുമുണ്ടായില്ല.
അതേസമയം ജലത്തിലൂടെ പകരുന്ന രോഗങ്ങളിലൊന്നാണ് കോളറ. വിബ്രിയോ കോളറേ എന്ന ബാക്റ്റീരിയയാണ് രോഗം പരത്തുന്നത്. വൃത്തിഹീനമായ ചുറ്റുപാടുകളില്‍ നിന്ന് ലഭിക്കുന്ന വെള്ളം, ആഹാരം എന്നിവയിലൂടെയാണ് ബാക്ടീരിയ ശരീരത്തിലെത്തുന്നത്.

വയറിളക്കവും ഛര്‍ദിയുമാണ് കോളറയുടെ പ്രധാന ലക്ഷണങ്ങള്‍. രക്തസമ്മര്‍ദം കുറയുക, തലകറക്കം, നാവിനും ചുണ്ടുകള്‍ക്കുമുണ്ടാകുന്ന വരള്‍ച്ച, കണ്ണുകള്‍ താണുപോകുക, ബോധക്കേട് എന്നിവ കോളറയുടെ ഗുരുതരമായ രോഗലക്ഷണങ്ങളാണ്. തുടര്‍ച്ചയായി രണ്ടാംവര്‍ഷം തലസ്ഥാന ജില്ലയില്‍ രോഗം സ്ഥിരീകരിച്ചതോടെ, ആരോഗ്യവകുപ്പ് അതീവ ജാഗ്രതയിലാണ് .