പരിഹാസങ്ങള്‍ക്കും ഒറ്റപ്പെടലുകള്‍ക്കും മുന്നില്‍, ജീവിതം തനിക്ക് നല്‍കാന്‍ മടിക്കുന്നതൊക്കെയും ജീവിച്ച് ജീവിതത്തോടു ഞാന്‍ വാങ്ങിടും എന്ന വാശിയോടെ ജീവിക്കുകയാണ് ഈ വിദ്യാര്‍ഥി. ലളിത് എന്ന കുട്ടിയുടെ ജീവിതം ഇപ്പോള്‍ സമൂഹമാധ്യമങ്ങളിലും ചര്‍ച്ചയായിരിക്കുകയാണ്. രോമാവൃതമായ മുഖമാണ് ഈ കുട്ടിയെ മറ്റുള്ളവര്‍ക്ക് മുന്നില്‍ പരിഹാസകഥാപാത്രമാക്കിയത്.

മധ്യപ്രദേശിലെ രത്‌ലമിലാണ് ലളിത് താമസിക്കുന്നത്. ജനിച്ച് അരമണിക്കൂറാകും മുന്‍പെ  കുഞ്ഞിലെ വിചിത്രമായ ആ രൂപമാറ്റം നഴ്‌സാണ് ശ്രദ്ധിച്ചത്. മുഖം നിറച്ചും രോമങ്ങള്‍ വളര്‍ന്നുനിറയുന്നു. ഉടന്‍ തന്നെ ഡോക്ടറെ അറിയിച്ചു. രോമങ്ങള്‍ വടിച്ചുകളയാനായിരുന്നു അദ്ദേഹത്തിന്റെ നിര്‍ദേശം.

എന്നാല്‍ വടിച്ചുകളയും തോറും പതിന്മടങ്ങായി രോമങ്ങള്‍ വളര്‍ന്നു നിറയാന്‍ തുടങ്ങിയതോടെ അവന്റെ ജീവിതം തന്നെ മാറി മറിഞ്ഞു. ഇപ്പോള്‍ കണ്ണും, മൂക്കും വായും ഒന്നും തിരിച്ചറിയാന്‍ പോലുമാകാത്ത വിധം ചെന്നായയുടേതിന് സമാനമായി രോമകൂപങ്ങളാല്‍ നിറഞ്ഞിരിക്കുന്നു.

വേര്‍വൂള്‍ഫ് സിന്‍ഡ്രോം എന്ന രോഗമാണ് ലളിതിനെ ബാധിച്ചതെന്ന് പിന്നീട് കണ്ടെത്തി. എന്നാല്‍ ഇത് ചികിത്സിച്ച് ഭേദമാക്കാന്‍ കഴിയില്ല എന്നറിഞ്ഞതോടെ കുടുംബം ആകെ തകര്‍ന്നു. ആദ്യമൊക്കെ നാട്ടുകാരും ബന്ധുക്കളും സുഹൃത്തുക്കളുമെല്ലാം അവനെ കളിയാക്കുകയും ഭയത്തോടെ നോക്കുകയും ചെയ്തിരുന്നു. എന്നാല്‍ ഇപ്പോള്‍ എല്ലാവരും അവനെ അംഗീകരിക്കുന്നു. എന്നാല്‍ മറ്റുചിലരാകട്ടെ കുരങ്ങനെന്നുവിളിച്ച് കല്ലെറിയാറുണ്ടെന്നും ലളിത് സങ്കടത്തോടെ പറയുന്നു.