ലോകത്തിന്റെ പല ഭാഗത്തു നിന്നും ഗര്‍ഭിണിയാണെന്ന് അറിയാതെ പെട്ടെന്നൊരുനാള്‍ അമ്മയാകുന്നതിനെ കുറിച്ചുള്ള വാര്‍ത്തകള്‍ നമ്മള്‍ ഇടയ്ക്കിടെ കേള്‍ക്കാറുണ്ട്. വയറുവേദന മൂലം ബാത്ത്‌റൂമില്‍ പോയപ്പോഴോ അടുക്കളയില്‍ നിന്നപ്പോഴോ ഉറക്കത്തിലോ ഒക്കെ വച്ച് പെട്ടെന്ന് ഒരു കുഞ്ഞുപുറത്തേക്ക് വരിക എന്നു പറയുന്നത് പെട്ടെന്ന് ആര്‍ക്കും അംഗീകരിക്കാന്‍ സാധിക്കാത്ത അവസ്ഥയാണ്. എന്നാല്‍ ഇങ്ങനെയൊരു അവസ്ഥയെ കുറിച്ച് മെഡിക്കല്‍ സയന്‍സില്‍ പറയുന്നുണ്ട് എന്നതാണ് വാസ്തവം. Cryptic pregnancy എന്നാണ് ഇതിനെ പറയുക.

യുകെയില്‍ മാത്രം ഏതാണ്ട് നൂറുകണക്കിന് കുഞ്ഞുങ്ങള്‍ ഇങ്ങനെ പിറന്നിട്ടുണ്ട്. അടുത്തിടെ ബിബിസി റേഡിയോയില്‍ ക്ലാരന്‍ ഡോളന്‍ എന്ന പെണ്‍കുട്ടി ഇതിനെ കുറിച്ച് പറഞ്ഞിരുന്നു. ഒരു തിങ്കളാഴ്ച വെളുപ്പിന് നാലു മണിക്ക് താന്‍ ഉണരുന്നത് ആര്‍ത്തവസമയത്ത് ഉണ്ടാകുന്ന പോലെ ശക്തമായ വയറു വേദന മൂലമായിരുന്നു. തുടര്‍ച്ചയായി ആറുമാസമായി ഗര്‍ഭനിരോധനഗുളിക കഴിച്ചിരുന്ന ആളാണ് താനെന്നു ക്ലാരന്‍ പറയുന്നു. ജോലിയില്‍ കയറിയിട്ട് രണ്ടു ദിവസം മാത്രമേ അപ്പോള്‍ ആയിരുന്നുള്ളൂ. വേദന സംഹാരികള്‍ കഴിച്ചിട്ടു ഓഫീസിലേക്ക് പോകാനാണ് ക്ലാരനോട് അമ്മ പറഞ്ഞത്. ഒരു പാരസെറ്റമോള്‍ കഴിച്ച ശേഷം ഓഫീസിലേക്ക് പോയെങ്കിലും വേദന ഇടയ്ക്കിടെ വന്നും പോയുമിരുന്നു. കുറച്ചു നേരം കഴിഞ്ഞതോടെ ശക്തമായി വയറുവേദനിക്കാന്‍ തുടങ്ങി. തീരെവയ്യാതെ വന്നതോടെ ക്ലാരന്‍ തിരികെ വീട്ടിലേക്കു പോന്നു.

വേദനയുടെ കാഠിന്യം കൂടി കൂടി വന്നതോടെ ടോയ്ലറ്റില്‍ പോയിരിക്കാനാണ് ക്ലാരന് തോന്നിയത്. എന്നാല്‍ കടുത്ത രക്തസ്രാവം കൂടി ആരംഭിച്ചതോടെ എന്തു ചെയ്യണമെന്നറിയാതെയായി. തുടര്‍ന്ന് അയല്‍ക്കാരിയുടെ സഹായത്തോടെ ആംബുലന്‍സ് വിളിച്ചു വരുത്തി. തനിക്ക് അബോര്‍ഷന്‍ സംഭവിക്കുകയാണ് എന്നാണ് അപ്പോള്‍ ക്ലാരന് തോന്നിയത്. എന്നാല്‍ പെട്ടെന്ന് ഒരു കുഞ്ഞുതല പുറത്തേക്ക് വരുന്നതായാണ് മനസ്സിലായി. നന്നായി പുഷ് ചെയ്തതോടെ രണ്ടു സെക്കന്‍ഡിനുള്ളില്‍ അമേലിയ എന്ന തന്റെ കുഞ്ഞുമകള്‍ പുറത്തേക്ക് വന്നെന്നു ക്ലാരന്‍ പറയുന്നു.

എല്ലാവരും മാതാപിതാക്കളാകാന്‍ ഒരുങ്ങുമ്പോള്‍ തനിക്ക് അതിനു ലഭിച്ചത് രണ്ടു സെക്കന്റ് മാത്രമായിരുന്നെന്ന് ക്ലാരന്‍ പറയുന്നു. അപ്പോഴേക്കും ആംബുലന്‍സ് വരികയും അതിലെ നാല് പാരമെഡിക്കല്‍ സ്റ്റാഫുകള്‍ കുഞ്ഞിന്റെ പൊക്കിള്‍കൊടി മുറിക്കുകയും ചെയ്തു. താന്‍ ഒരു അമ്മയാകാന്‍ പോകുന്നുവെന്ന് ക്ലാരന്‍ അപ്പോള്‍ മാത്രമാണ് അറിഞ്ഞത്. കഴിഞ്ഞ ഒന്‍പതുമാസവും അവള്‍ക്ക് അതിന്റെ യാതൊരു ലക്ഷണവും ഉണ്ടായിരുന്നില്ല. ഇതിനിടയില്‍ രണ്ടുവട്ടം ആര്‍ത്തവം ഉണ്ടായി എന്നും ക്ലാരന്‍ പറയുന്നു. ഒരുപക്ഷേ ബ്ലീഡിങ് തീരെ കുറവായിരുന്ന ആ ആര്‍ത്തവം ഗര്‍ഭകാലത്തെ സ്‌പോട്ടിങ് ആയിരുന്നിരിക്കാം എന്നും അവള്‍ ഓര്‍ക്കുന്നു.

 2,500 പ്രസവങ്ങളില്‍ ഒരെണ്ണം ഇത്തരത്തില്‍ അറിയാതെയുള്ള ഗര്‍ഭമാകാം എന്നാണ് ഡോക്ടര്‍മ്മാര്‍ പറയുന്നത്. താന്‍ ഇതെല്ലാം സ്വയം ഉണ്ടാക്കിയ കഥകളാണ് എന്ന് ചിലര്‍ പറയുന്നുണ്ട്. എന്നാല്‍ ഞാന്‍ എന്തിന് അതു ചെയ്യണം. എന്റെയും കുഞ്ഞിന്റെയും ആരോഗ്യം അപകടത്തിലാക്കാന്‍ മാത്രം വിഡ്ഢിയാണോ താനെന്നു ക്ലാരന്‍ ചോദിക്കുന്നു.