ലഘുവായുള്ള ചികിൽസാ രീതികളെക്കാൾ ദീർഘമായ ചികിത്സാരീതികളാണ് ആയുർവേദത്തിൽ അനുശാസിക്കുന്നത്. രോഗികളുടെ പ്രായവും രോഗാവസ്ഥയുടെ തീവ്രതയുമെല്ലാം ചികിൽസവിധികളും
ചികിത്സയുടെ ദൈർഘ്യവും തീരുമാനിക്കുന്നു. ഭക്ഷണപഥ്യവും ജീവിതശൈലിയിലെ മാറ്റുമെല്ലാം ആയുർവേദ ചികിൽസയുടെ ഭാഗമാണ്. രോഗാവസ്ഥയുടെ തീവ്രതയനുസരിച്ച്, കാൽമുട്ടുകളിൽ തടംകെട്ടി ഒൗഷധ എണ്ണ നിറച്ചുവയ്ക്കുന്ന നിരവധി ചികിത്സാവിധികൾ ആയുർവേദത്തിലുണ്ട്. നേരിയ വേദന അനുഭവപ്പെടുമ്പോൾ തന്നെ പെട്ടന്ന് ചികിൽസ തുടങ്ങിയാൽ കൂടുതൽ ആശ്വാസം ലഭിക്കും.

വേദനയോടുകൂടിയ ആദ്യഘട്ടം മുതൽ തീവ്രഘട്ടം വരെയുള്ള ഓരോ ഘട്ടത്തിലും വ്യത്യസ്ത ചികിൽസകളായിരിക്കും ആയുർവേദത്തിൽ പിൻതുടരുക .( നവരക്കിഴി, പിഴിച്ചിൽ ) ക്ഷതമേൽക്കുവാൻ ഏറ്റവും കൂടുതൽ സാധ്യതയുള്ള മേഖലയാണ് കാൽമുട്ടുകൾ.ചെറിയ ക്ഷതങ്ങൾ പോലും സമയത്തിനു ചികിൽസിച്ചില്ലെങ്കിൽ ചലനശേഷിയെ വരെ ബാധിക്കാം. എപ്പോഴെങ്കിലും മുട്ടിനേൽക്കുന്ന നേരിയ ക്ഷതം പോലും ഉടൻ തന്നെയോ കാലങ്ങൾ കഴിഞ്ഞോ മുട്ടുവേദനയായി പരിണമിക്കാവുന്നതാണ് . മുട്ടുചിരട്ടയുടെ സ്ഥാനചലനം, തരുണാസ്ഥികൾക്കുണ്ടാകുന്ന പരുക്കുകൾ എന്നിവ മുട്ടുവേദനയിലേക്ക് നയിക്കും.ഒരേ ഇരിപ്പിൽ ദീർഘനേരം വാഹനമോടിക്കുന്നവർക്ക്,ജോലിചെയ്യുന്നവർക്ക് കാൽമുട്ടിനു വേദനയനുഭവപ്പെടാൻ സാധ്യതയുണ്ട്. കൃത്യമായ ഇടവേളകളിൽ കാൽമുട്ടിനു വിശ്രമം നൽകിയാൽ വേദനയുടെ കാഠിന്യം കുറയ്ക്കാം കഴിയും.

അമിത വ്യായാമങ്ങൾ പലപ്പോഴും കാൽമുട്ടിനു ക്ഷതങ്ങൾ സമ്മാനിക്കും ഇത് സ്ഥിരമായ മുട്ടുവേദനയിലേക്കു വരെ നയിക്കാം. ഏതു വ്യായാമമായാലും ശരിയായ വാം അപ്പ് ആവശ്യമാണ്. മുട്ടിനു ഏറ്റവും ആശ്വാസം നൽകുന്ന വ്യായാമം നീന്തലാണ്. വെള്ളത്തിൽ ശരീരഭാരം കുറയുന്നതിനാൽ മുട്ടിനു ആയാസമില്ലാതെ നന്നായി വ്യായാമം ചെയ്യാൻ സാധിക്കുന്നു.നവരക്കിഴി, പിഴിച്ചിൽ, പൊടിക്കിഴി തുടങ്ങിയ ചികിത്സകളും കാൽമുട്ട് വേദനക്ക് ഫലപ്രദമാണ്.