മാനസിക സമ്മര്‍ദ്ദത്തിലൂടെ കടന്നു പോകാത്തവരായി ആരുമുണ്ടാകില്ല. ജോലിഭാരവും മറ്റ്കാര്യങ്ങളും കൊണ്ട് തന്നെ ഈ അവസ്ഥയുണ്ടാകാം. ഈ മാനസിക സമ്മര്‍ദ്ദം കുറയ്ക്കാന്‍ വ്യായാമം, യോഗ, നടത്തം, ഓട്ടം, സൂമ്പ എന്നീ മാര്‍ഗ്ഗങ്ങള്‍ പരീക്ഷിക്കാം. എന്തായാലും സമ്മര്‍ദ്ദങ്ങളില്‍ നിന്ന് പെട്ടെന്നൊരു മുക്തിയോ ആശ്വാസമോ നേടാന്‍ ഇതുകൊണ്ടൊന്നും സാധ്യമല്ല. ഏറ്റവും ലളിതമായി, 'ബ്രീത്തിംഗ്' എക്സര്‍സൈസ് കൊണ്ട് ഇത്തരത്തില്‍ പെട്ടെന്ന് സമ്മര്‍ദ്ദങ്ങളില്‍ നിന്ന് ആശ്വാസം കണ്ടെത്താന്‍ സാധിക്കുമെന്നാണ് പ്രമുഖ സൈക്കോതെറാപ്പിസ്റ്റും കൗണ്‍സിലറുമായ സര്‍ള ടോട്ല പറയുന്നത്.

തന്റെ സോഷ്യല്‍ മീഡിയ പേജിലൂടെയാണ് സര്‍ള ഈ ടിപ് പങ്കുവച്ചിരിക്കുന്നത്. രണ്ടേ രണ്ട് മിനുറ്റ് മാത്രം ആവശ്യമായി വരുന്ന 'ബ്രീത്തിംഗ് എക്സര്‍സൈസ്'. ഒരുപക്ഷേ തിരക്ക് പിടിച്ച ദിവസത്തില്‍ ജോലികള്‍ക്കിടയില്‍ തന്നെ ചെറിയൊരു ഇടവേള കണ്ടെത്തി ചെയ്യാനും മാത്രം ലളിതമായത്.

ആകെ ചെയ്യേണ്ടത്, ഒരു ഡീപ് ബ്രെത്ത് എടുക്കുക. ഏതാനും സെക്കന്‍ഡുകള്‍ അത് ഹോള്‍ഡ് ചെയ്ത ശേഷം പതിയെ ശ്വാസം പുറത്തേയ്ക്ക് വിടാം. ഇതുതന്നെ പത്ത് തവണ ചെയ്യുക. രണ്ട് മിനുറ്റേ ഇതിന് പരമാവധി ആവശ്യമായി വരൂ. വ്യക്തികളുടെ മാനസികാവസ്ഥ മെച്ചപ്പെടുത്തുന്നതിനും ഉത്പാദനക്ഷമത വര്‍ധിപ്പിക്കുന്നതിനും ഈ 'ബ്രീത്തിംഗ്' എക്സര്‍സൈസ് ഏറെ സഹായകമാണെന്ന് ഇവര്‍ പറയുന്നു.

ഒരേ സമയം ഒരുപാട് കാര്യങ്ങള്‍ ചെയ്യാതിരിക്കുക. ഒന്ന് പൂര്‍ത്തിയാക്കി അടുത്തതിലേക്ക് കടക്കാന്‍ ശ്രമിക്കുക. ഓരോ ദിവസവും ചെയ്യേണ്ടുന്ന കാര്യങ്ങളുടെ 'ടു ഡു ലിസ്റ്റ്' തയ്യാറാക്കി വയ്ക്കാം. ചെയ്തുതീരുന്ന കാര്യങ്ങള്‍ 'ടു ഡു ലിസ്റ്റി'ല്‍ നിന്ന് വെട്ടിക്കളയാം. ഇത് ആത്മവിശ്വാസം വര്‍ധിപ്പിക്കും. ശ്രദ്ധയെ മാറ്റുന്ന ഘടകങ്ങള്‍ ഏതെങ്കിലും ചുറ്റുപാട് ഉണ്ടെങ്കില്‍, അല്ലെങ്കില്‍ മനസില്‍ ഉണ്ടെങ്കില്‍ അവയെ തിരിച്ചറിഞ്ഞ് ബോധപൂര്‍വ്വം മാറ്റിനിര്‍ത്തുക. ഏത് കാര്യത്തിലേക്ക് പോകുമ്‌ബോള്‍ ശുഭാപ്തിവിശ്വാസത്തോടെ തുടങ്ങുക. കൃത്യമായ ഉറക്കം ഉറപ്പുവരുത്തുക.