വീട് വൃത്തിയായി സൂക്ഷിക്കാന്‍ ചില വഴികള്‍
മിക്ക വീടുകളിലും അടുക്കും ചിട്ടയുമില്ലായ്മയാണ് സമയം അപഹരിക്കുന്ന വില്ലന്‍. മനസ്സുവച്ചാല്‍ സ്വായത്തമാക്കാവുന്നതേയുളളു അടുക്കും ചിട്ടയുമുള്ള ജീവിതരീതി. ഇതിനായി ഇതാ ചില പുതിയ വഴികള്‍
ആദ്യം പുസ്തകങ്ങള്‍ തരം തിരിച്ച് അടുക്കി വയ്്ക്കുക. പുസ്തകങ്ങള്‍ ഷെല്‍ഫില്‍ നിന്ന് താഴെയിറക്കുമ്പോള്‍ തന്നെ അവ തരംതിരിച്ച് കൃത്യമായി വയ്ക്കുക. ഓരോ കാര്‍ഡ്‌ബോര്‍ഡ് ബോക്‌സുകളെടുത്ത് അതില്‍ പുസ്തകങ്ങളുടെ വിഷയങ്ങള്‍ എഴുതി ഒട്ടിക്കുക. ഈ പെട്ടികളില്‍ നിന്ന് പുസ്തകമെടുത്ത് പൊടി തട്ടി അടുക്കുന്ന പണിയേ പിന്നെ വരൂ. എപ്പോഴും റഫര്‍ ചെയ്യുന്ന ഡിക്ഷനറി, പാചകത്തിനിടയില്‍ ഇടയ്ക്കിടെ മറിച്ചു നോക്കേണ്ടി വരുന്ന റെസിപ്പി ബുക്കുകള്‍ എന്നിവ പ്രത്യേകമായി മാറ്റി വയ്ക്കണം. മാസികകളും വാരികകളും സൂക്ഷിച്ചു വയ്‌ക്കേണ്ട ആവശ്യമുണ്ടോ? റഫറന്‍സിനു വേണ്ടി സൂക്ഷിക്കുന്നതാണെങ്കില്‍ ആവശ്യമുള്ള പേജുകള്‍ മാത്രമെടുത്ത് ഫയലിലാക്കി വയ്ക്കാം.
ഉപയോഗശൂന്യമെങ്കില്‍ വൃദ്ധസദനങ്ങള്‍ക്കോ വിമന്‍സ് ഹോമുകള്‍ക്കോ സംഭാവന ചെയ്യാം.കലാകാരിയാണ് ആണ് നിങ്ങളെങ്കില്‍ പഴയ പേപ്പറുകളുപയോഗിച്ച് പെന്‍ ഹോള്‍ഡറും ലാംബ് ഷേഡുമൊക്കെ ഉണ്ടാക്കാം. കുട്ടികളുടെ പഴയ പുസ്തകത്തിലെ മൃഗങ്ങളുടെ ചിത്രം മാത്രം വെട്ടിയെടുത്ത് കുട്ടിയുടെ മുറിയില്‍ ഒട്ടിച്ചു വച്ചാലോ? മൃഗങ്ങളുടെ പേരും പഠിക്കും, മുറിക്ക് ജംഗിള്‍ തീമും വരും. തട്ടുകള്‍ നന്നായി തുടച്ചു വൃത്തിയാക്കി മൂലകളില്‍ കീടങ്ങളെ തുരത്താനുള്ള മരുന്നുകള്‍ വച്ച ശേഷം പുസ്തകങ്ങള്‍ അടുക്കി വയ്ക്കുക.
താക്കോല്‍ വയ്ക്കാന്‍ വാതിലില്‍ തന്നെ കൊളുത്ത് പിടിപ്പിക്കാം. നാണയത്തുട്ടുകള്‍ ഇട്ടുവയ്ക്കാന്‍ കബോര്‍ഡില്‍ ഒരു ബൗള്‍ വയ്ക്കൂ. പേനകള്‍ പെന്‍ ഹോള്‍ഡറില്‍ മാത്രമിടുക. തല്‍ക്കാലത്തേക്ക് ഡ്രോയറില്‍ ഇടുന്നവയെല്ലാം ആ ദിവസം തന്നെ അതിന്റേതായ സ്ഥാനത്തേക്കു മാറ്റണം. ഡ്രോയറിനുള്ളില്‍ വയ്ക്കുന്ന വസ്തുക്കള്‍ വലിച്ചുവാരി ഇടാതെ ഒരോ പെട്ടിയിലാക്കി വയ്ക്കാം. റബര്‍ ബാന്‍ഡും മുട്ടുസൂചിയുമെല്ലാം ഇത്തരത്തില്‍ ചെറിയ പെട്ടിയിലാക്കിയാല്‍ എടുക്കാനും എളുപ്പമായിരിക്കും. പേന വയ്ക്കുന്നതിനടുത്ത് തന്നെ പേപ്പര്‍ വയ്ക്കുക. ഇവിടെ തന്നെ സ്‌റ്റേപ്ലറും പശയും വയ്ക്കണം. ഇങ്ങനെ പരസ്പരം ബന്ധപ്പെട്ടവയെ എല്ലാം ഒന്നിച്ചടുക്കുക.
തുണി അലമാര അടുക്കുന്നതിന് മുമ്പ് മുറിയില്‍ വലിച്ചുവാരിയിട്ടിരിക്കുന്ന തുണിയുടെ കൂടെ മുഷിഞ്ഞ വസ്ത്രങ്ങളൊന്നുമില്ലെന്നു ഉറപ്പാക്കണം. അല്ലെങ്കില്‍ ഈ തുണികളും അറിയാതെ എടുത്ത് നല്ല വസ്ത്രങ്ങളുടെ ഒപ്പം വയ്ക്കും. ആദ്യത്തെ ഒരു മണിക്കൂര്‍ വസ്ത്രങ്ങളെ തരംതിരിച്ചു മാറ്റി അലമാരയില്‍ സ്ഥാനം പിടിക്കേണ്ടവയെ കണ്ടെത്താം. ഇതിനായി അഞ്ചു കവറുകളോ കാര്‍ഡ്‌ബോര്‍ഡ് പെട്ടികളോ നിരത്തി വയ്ക്കുക.
ഇനി ബാക്കിയായവ മാത്രം അലമാരയില്‍ അടുക്കിയാല്‍ മതി. കാഷ്വല്‍, വെസ്‌റ്റേണ്‍, എത്‌നിക്ക് എന്ന രീതിയിലടുക്കാം. അല്ലെങ്കില്‍ ടോപ്‌സ്, ജീന്‍സ്, കുര്‍ത്ത എന്നിങ്ങനെയും അടുക്കാം. അടിവസ്ത്രങ്ങള്‍ക്കായി ഒരു തട്ടു മുഴുവന്‍ ഉപയോഗിക്കുന്നതാണ് നല്ലത്. നേരെ നിന്ന് എടുക്കാന്‍ പറ്റുന്ന തട്ടുകളില്‍ ദിവസവും അണിയുന്ന വസ്ത്രങ്ങള്‍ അടുക്കിവയ്ക്കാന്‍ ശ്രദ്ധിക്കണം. താഴത്തേ തട്ടുകളില്‍ മൂന്നാമത്തേയും നാലാമത്തേയും കവറുകള്‍ വയ്ക്കാം. കുട്ടികളുടെ തുണികള്‍ അടുക്കി വയ്ക്കാന്‍ അവര്‍ ഇല്ലാത്ത ഒരു ദിവസം തിരഞ്ഞെടുക്കുന്നതാണ് നല്ലത്.
https://www.facebook.com/Malayalivartha
