തിരുവനന്തപുരത്ത് യുവതി പൊള്ളലേറ്റ് മരിച്ച സംഭവത്തിൽ അടിമുടി ദുരൂഹത. കൊലപാതകമെന്ന് ആരോപിച്ച് പിതാവ് രംഗത്ത്. ഭർത്താവിൻറെ അവിഹിത ബന്ധം ചോദ്യം ചെയ്തതിന് മകളെ മർദ്ദിക്കുമായിരുന്നുവെന്നാണ് അച്ഛൻ ആരോപിക്കുന്നത്. കുളിമുറിയിൽ പൊള്ളലേറ്റ നിലയിലാണ് മകളെയും പേരക്കുട്ടിയെയും കണ്ടത്. മകൾ ആത്മഹത്യ ചെയ്യുമെന്നും കരുതുന്നില്ലെന്നും ദുരൂഹതയുണ്ടെന്നും ബന്ധുക്കൾ ആരോപിക്കുന്നു. മരണത്തിൽ ദുരൂഹതയുണ്ടെന്നാരോപിച്ച് അഞ്ജുവിന്‍റെ അച്ഛൻ കഠിനംകുളം പൊലീസിൽ പരാതി നൽകി.

പുത്തൻതോപ്പ് സ്വദേശി രാജു ജോസഫ് ടിൻസിലിയുടെ ഭാര്യ അഞ്ജുവും ഒമ്പതുമാസം പ്രായമുള്ള മകൻ ഡേവിഡുമാണ് ഇന്നലെ വൈകിട്ട് ഏഴ് മണിയോടെ പൊള്ളലേറ്റ് മരിച്ചത്. വീടിനുള്ളിലെ കുളിമുറിയിലാണ് യുവതിയേയും മകനേയും പൊള്ളലേറ്റ നിലയിൽ കണ്ടെത്തിയത്. സംഭവ സമയം അഞ്ജുവും മകനും മാത്രമാണ് വീട്ടിലുണ്ടായിരുന്നത്. ഭര്‍ത്താവ് രാജു ജോസഫ് അയൽപക്കത്തെ വീട്ടിലായിരുന്നുവെന്നാണ് പറയുന്നത്. രാജു ഉടൻ മകനെ ആശുപത്രിയിൽ എത്തിച്ചെങ്കിലും തിരുവനന്തപുരം മെഡിക്കല്‍ കോളജിലെ വെൻ്റിലേറ്ററില്‍ ചികിത്സയിലായിരുന്ന കുഞ്ഞ്
ഇന്ന് രാവിലെ മരിച്ചു.

സംഭവം നടക്കുന്ന സമയം ഭർത്താവ് രാജു പുറത്തുപോയിരിക്കുകയായിരുന്നു എന്നാണ് പറയപ്പെടുന്നത്. തിരിച്ചു വരുമ്പോൾ അഞ്ജുവിനെ കത്തിക്കരിഞ്ഞ നിലയിലും കുഞ്ഞിനെ പൊള്ളലേറ്റ് ഗുരുതരാവസ്ഥയിലും വീട്ടിലെ ബാത്ത്റൂമിൽ കാണുകയായിരുന്നു. തുടർന്ന് രാജു നാട്ടുകാരെ വിളിച്ചു കൂട്ടി. നാട്ടുകാരുടെ സഹായത്തോടെ കുഞ്ഞിനെ തിരുവനന്തപുരം നടഗരത്തിലെ സ്വകാര്യ ആശുപത്രിയിൽ എത്തിക്കുകയായിരുന്നു എന്നാണ് വിവരം.

സംഭവത്തിൽ ദുരൂഹത നിലനിൽക്കുന്നതായി അഞ്ജുവിൻ്റെ ബന്ധുക്കൾ ആരോപണവുമായി രംഗത്തെത്തിയിട്ടുണ്ട്. അഞ്ജുവിനെ തീപ്പൊള്ളലേറ്റ് കത്തിക്കരിഞ്ഞ് കാണപ്പെട്ടത് ബാത്ത്റൂമിലായിരുന്നു. എന്നാണ് ബാത്ത്റൂമിൽ തീകത്തിയ കാര്യം സമീപത്തെ വീടുകളിലുള്ളവർ അറിഞ്ഞില്ലെന്നാണ് പറയുന്നത്. മാത്രമല്ല ഭർത്താവ് രാജു ഈ സമയം എവിടെയായിരുന്നു എന്ന കാര്യത്തിലും ദുരൂഹത നിലനിൽക്കുന്നുണ്ട്. പുത്തൻ തോപ്പിൽ ഫുട്ബോൾ മത്സരം കാണാൻ പോയശേഷം ഇടവേള സമയത്ത് വീട്ടിൽ വന്നപ്പോഴാണ് ഭാര്യയേയും കുഞ്ഞിനേയും പൊള്ളലേറ്റ നിലയിൽ കണ്ടതെന്നാണ് രാജു സമീപവാസികളോട് പറഞ്ഞത്.

എന്നാൽ ഇക്കാര്യത്തിൽ സംശയം നിലനിൽക്കുന്നുണ്ടെന്നാണ് പുറത്തു വരുന്ന സൂചനകൾ. സംഭവത്തിൽ ദുരൂഹതയുണ്ടെന്ന് ആരോപിച്ചു അഞ്ജുവിൻ്റെ മാതാപിതാക്കൾ രംഗത്തെത്തിയിട്ടുണ്ട്. വെങ്ങാനൂർ പൂങ്കുളം പ്രമോദിന്റെയും ഷൈലജയുടെ യും മകളാണ് മരിച്ച അഞ്ജു. 2021, നവംബർ മാസത്തിലായിരുന്നു രാജുവിൻ്റെയും അഞ്ജുവിൻ്റെയും വിവാഹം നടന്നത്. ആത്മഹത്യയാണെന്നാണ് പ്രാഥമിക നിഗമനമെന്നാണ് പൊലീസ് പറയുന്നത്. അഞ്ജുവിൻ്റെ ആത്മഹത്യയിലേക്ക് നയിച്ച കാരണം എന്താണെന്ന് കണ്ടെത്താനാണ് പൊലീസ് ശ്രമം. അതേസമയം പരാതി ഉയർന്ന സാഹചര്യത്തിൽ വിശദമായ അന്വേഷണം നടത്തുമെന്നും പോലീസ് അറിയിച്ചു.

ഇതിനിടെ മാസങ്ങൾക്ക് മുമ്പേ ഇവർ കുടുംബ സമ്മേതം ഇംഗ്ളണ്ടിലേക്ക് പോകാനുള്ള തയ്യാറെടുപ്പിലായിരുന്നുവെന്ന് നാട്ടുകാർ പറയുന്നു. ഇതിനായി ഇവരിൽ നിന്ന് കാശുവാങ്ങിയ ശേഷം ആരോ കബളിപ്പിച്ചുവെന്നാണ് വിവരം. അതിൽ വലിയ സാമ്പത്തിക ബാദ്ധ്യതയുണ്ടായതിനെ തുടർന്ന് മനനൊന്തായിരിക്കാം ജീവനൊടുക്കിയതെന്ന സംശയവും അയൽവാസികൾ പങ്കുവയ്ക്കുന്നുണ്ട്. രാജു ജോസഫിന്റെ ബന്ധുക്കൾ ഇംഗ്ളണ്ടിലാണ് താമസം.