പേട്ടയിൽ ട്രെയിനിനടിയിൽപ്പെട്ട് വീട്ടമ്മ മരിച്ചു. ഇന്ന് രാവിലെ 10.30നാണ് സംഭവം. എറണാകുളം - കൊല്ലം - തിരുവനന്തപുരം വഞ്ചിനാട് ട്രെയിനിൽ നിന്നാണ് തിരുവനന്തപുരം പുലയനാർകോട്ട സ്വദേശിയായ ഗിരിജ (55) വീണുമരിച്ചത്. പേട്ട സ്റ്റേഷനിൽ എത്തിയപ്പോൾ സിഗ്നൽ ലഭിക്കാത്തതിനെ തുടർന്ന് ട്രെയിൻ വേഗത കുറച്ചു.

ഇതിനിടെ ഗിരിജ ഇറങ്ങാൻ ശ്രമിച്ചു. എന്നാൽ പൊടുന്നനെ സിഗ്നൽ മാറുകയും ട്രെയിൻ പെട്ടെന്ന് മുന്നോട്ട് എടുക്കുകയായിരുന്നു. ഉടൻതന്നെ കൈവഴുതി യാത്രക്കാരി വണ്ടിക്കടിയിൽ കുടുങ്ങി. ട്രെയിൻ പിന്നോട്ടെടുക്കാൻ സിഗ്നൽ കിട്ടുന്നതുവരെ അരമണിക്കൂറോളം കുടുങ്ങിക്കിടന്നു. അരമണിക്കൂർ പരിശ്രമിച്ചാണ് മൃതദേഹം പുറത്തെടുത്തത്. മൃതദേഹം മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി.

മെഡിക്കൽകോളേജ് ടാഗോർ നഗറിൽ പുതുവൽ പുത്തൻവീട്ടിൽ ശാന്ത എന്ന സ്ത്രീക്കൊപ്പം ചക്കുളത്തുകാവിൽ ദർശനത്തിന് പോയിട്ട് മടങ്ങുകയായിരുന്നു ഇവർ. സംഭവത്തെത്തുടർന്ന് ഒരുമണിക്കൂറോളം വണ്ടി പേട്ട സ്റ്റേഷനിൽ പിടിച്ചിട്ടു.