കേരളത്തിൽ ഓരോ വർഷവും മഴക്കാലം തുടങ്ങുമ്പോൾ തന്നെ വെള്ളപ്പൊക്കവും കടൽ അപകടങ്ങളും വാർത്തകളിൽ നിറയുന്നു. കഴിഞ്ഞ കുറച്ച് വർഷങ്ങളായി ഓരോ ആഴ്ചയും വെള്ളത്തിൽ മുങ്ങിമരിക്കുന്നവരുടെ വാർത്തകൾ പുറത്തുവരുന്ന സാഹചര്യമാണ്. എന്നാൽ, വെള്ളത്തിലുണ്ടാകുന്ന അപകടങ്ങളിൽ നിന്ന് സുരക്ഷ നേടുന്നതിനുള്ള മാർ​​ഗങ്ങൾ സംസ്ഥാനത്ത് ഇതുവരെ ശക്തമായി രൂപപ്പെട്ടിട്ടില്ല.

ഇത്തരം സാഹചര്യത്തിലാണ് ഗോവയിലെ National Institute of Water Sports (NIWS) ഗോവയിലെ കേന്ദ്ര സ്ഥാപനത്തിന്റെ മാതൃക ശ്രദ്ധേയമാകുന്നത്. വിനോദസഞ്ചാരവും അഡ്വഞ്ചർ ടൂറിസവും ലക്ഷ്യമിട്ടാണ് NIWS ആരംഭിച്ചതെങ്കിലും, അതിന്റെ പ്രധാന ശക്തി സുരക്ഷാ പരിശീലനത്തിലാണ്. ലൈഫ് സെവിംഗ്, റസ്‌ക്യൂ ടെക്നിക്കുകൾ, പവർബോട്ട് ഓപ്പറേഷൻ, സെയിലിംഗ്, ഡൈവിംഗ് തുടങ്ങി വിവിധ മേഖലകളിൽ പ്രൊഫഷണൽ സർട്ടിഫിക്കേഷൻ നൽകുന്ന ഏക കേന്ദ്ര സ്ഥാപനമാണ് ഇത്.

കേരളത്തിന് എന്തുകൊണ്ട് ഇതിന്റെ മാതൃക ആവശ്യമാണ്?

പ്രളയാനന്തര യാഥാർഥ്യം
2018, 2019 പ്രളയകാലങ്ങളിൽ സാധാരണ ജനങ്ങളും മത്സ്യതൊഴിലാളികളും ജീവൻ രക്ഷിക്കാൻ കടുത്ത ശ്രമങ്ങൾ നടത്തിയിരുന്നു. എന്നാൽ, സുസ്ഥിരമായ പരിശീലനം ലഭിച്ച റെസ്‌ക്യൂ വോളണ്ടിയർമാർ സംസ്ഥാനത്ത് വളരെ കുറവായിരുന്നു. NIWS മാതൃകയിൽ ഒരു “Water Safety & Rescue Training Centre” കേരളത്തിൽ സ്ഥാപിക്കുകയാണെങ്കിൽ ദുരന്തനിവാരണ സംവിധാനത്തിന് വലിയ കരുത്തായിരിക്കും.

സ്കൂൾ തലത്തിൽ നീന്തൽ നിർബന്ധമാക്കൽ

കേരളം ജലസമ്പത്തുകളുടെ നാട്. എന്നിരുന്നാലും, സ്കൂൾ പാഠ്യപദ്ധതിയിൽ നീന്തൽ നിർബന്ധവിഷയമല്ല. അടിസ്ഥാന നീന്തൽ പരിശീലനവും ലൈഫ് ജാക്കറ്റ് ഉപയോഗവും റസ്‌ക്യൂ അവബോധവും വിദ്യാർത്ഥികൾക്ക് നൽകുന്നത് അനിവാര്യമാണ്.

ആലപ്പുഴ, വർക്കല, ബേക്കൽ തുടങ്ങിയ വിനോദസഞ്ചാര കേന്ദ്രങ്ങളിൽ വാട്ടർ സ്പോർട്സ് വ്യാപകമാണ്. എന്നാൽ, ലൈസൻസിംഗും സുരക്ഷാ മാനദണ്ഡങ്ങളും കർശനമാക്കേണ്ടതുണ്ട്. NIWS പോലൊരു കേന്ദ്രം സംസ്ഥാനത്ത് ഉണ്ടെങ്കിൽ പരിശീലനം ലഭിച്ച പ്രൊഫഷണലുകളെ സൃഷ്ടിക്കാനാകും.

കടലിൽ അപകടസമയങ്ങളിൽ സ്വയം രക്ഷപ്പെടാനും കൂട്ടാളികളെ രക്ഷിക്കാനും പരിശീലനം നൽകുന്നത് ജീവഹാനി കുറയ്ക്കും. കാലാവസ്ഥ മുന്നറിയിപ്പ്, GPS ഉപയോഗം, അടിയന്തര പ്രതികരണം തുടങ്ങിയ വിഷയങ്ങളിൽ സ്ഥിരമായ പരിശീലനം ആവശ്യമാണ്.

വെള്ളത്തിൽ മുങ്ങിമരണങ്ങൾ പതിവായി റിപ്പോർട്ട് ചെയ്യപ്പെടുമ്പോൾ, “നീന്തൽ ഒരു വിനോദമോ, ജീവിതകൗശലമോ?” എന്ന ചോദ്യം വീണ്ടും ഉയരുന്നു. ഗോവയിലെ NIWS മാതൃക കേരളത്തിന് ഒരു പഠനവിഷയമാണ്. ദുരന്തനിവാരണത്തിലും വിനോദസഞ്ചാര സുരക്ഷയിലും മുന്നോട്ട് പോകാൻ സംസ്ഥാനത്തിന് സമഗ്രമായ സുരക്ഷാ പരിശീലന സംവിധാനം അനിവാര്യമാണ്.
വെള്ളം കേരളത്തിന്റെ ശക്തിയാണ്. എന്നാൽ അതിനെ കൈകാര്യം ചെയ്യാനുള്ള പരിശീലനമാണ് ഇന്നത്തെ ആവശ്യകത