ബഹ്‌റൈനു പിന്നാലെ നിർണായക പ്രഖ്യാപനവുമായി സൗദി. കൊവിഡ് വാക്സിൻ വിതരണത്തിൻ്റെ മുന്നോടിയായി പ്രത്യേക രജിസ്ട്രേഷൻ സംവിധാനം ആരംഭിക്കുന്നതായി റിപ്പോർട്ട്. വാക്സിൻ വിതരണം കുറ്റമറ്റതും കാര്യക്ഷമവുമാക്കുന്നതിൻ്റെ ഭാഗമായാണ് രജിസ്ട്രേഷൻ നടപടിയെന്ന് സൗദി ആരോഗ്യ മന്ത്രാലയം വക്താവ് ഡോ. മുഹമ്മദ് അൽ അബ്ദൽ അലി അറിയിക്കുകയുണ്ടായി. ഇതിൻ്റെ വിശദാംശങ്ങൾ ഉടൻ പ്രഖ്യാപിക്കുമെന്നും വാർത്താ സമ്മേളനത്തിൽ അദ്ദേഹം പറഞ്ഞു.

സുരക്ഷിതവും ഫലപ്രദവുമാണെന്ന് ഉറപ്പു വരുത്തിയ ശേഷവും ബന്ധപ്പെട്ട ഏജൻസികളിൽ നിന്നുള്ള അംഗീകാരം ലഭിച്ച ശേഷവും മാത്രമേ സൗദിയിൽ വാക്സിൻ വിതരണം ആരംഭിക്കാൻ സാധ്യതയുള്ളൂ. സൗദി അറേബ്യയിൽ വാക്സിൻ വിതരണം ചെയ്യുന്നതുമായി ബന്ധപ്പെട്ട് പ്രമുഖ വാക്സിൻ നിർമാണ കമ്പനികളുമായി കരാറിലെത്താൻ ഇതിനോടകം സാധിച്ചിട്ടുണ്ട്. ലോകത്ത് ആദ്യമായി വാക്സിൻ ലഭ്യമാക്കുന്ന രാജ്യങ്ങളിലൊന്നായിരിക്കും സൗദി അറേബ്യയെന്നും ആരോഗ്യ മന്ത്രാലയം വക്താവ് അവകാശപ്പെടുകയുണ്ടായി. മാത്രമല്ല, കൊവിഡ് വ്യാപനം തടയുന്നതിൽ മികച്ച നേട്ടം കൈവരിക്കാൻ രാജ്യത്തിന് സാധിച്ചിട്ടുണ്ട്. കൊവിഡ് ബാധിതരുടെ എണ്ണം നാൾക്കുനാൾ കുറഞ്ഞു വരികയാണെന്നും അദ്ദേഹം പറയുകയുണ്ടായി.

അതോടൊപ്പം തന്നെ സൗദി അറേബ്യയില്‍ പ്രവാസികള്‍ ഉള്‍പ്പെടെ എല്ലാവര്‍ക്കും കോവിഡ് വാക്‌സിന്‍ സൗജന്യമായി നല്‍കുമെന്ന് സൗദി ആരോഗ്യമന്ത്രാലയം നേരത്തേ പ്രഖ്യാപിച്ചിരുന്നു. 2021 അവസാനത്തോടെ രാജ്യത്തെ 70 ശതമാനം ആളുകള്‍ക്കും കോവിഡ് വാക്‌സിന്‍ നല്‍കാനാണ് സൗദിയുടെ ലക്ഷ്യം. കൊവിഡ് പ്രതിരോധ വാക്‌സിന്‍ 16 വയസ്സിന് താഴെയുള്ള കുട്ടികള്‍ക്ക് ആദ്യഘട്ടത്തില്‍ നല്‍ കേണ്ടെന്നാണ് സൗദിയുടെ തീരുമാനം. കുട്ടികളില്‍ വാക്‌സിന്‍ എത്രമാത്രം സുരക്ഷിതമാണെന്ന കാര്യത്തില്‍ കൂടുതല്‍ പഠനങ്ങള്‍ ആവശ്യമാണ് എന്നതാണ് സൗദി ആരോഗ്യ മന്ത്രാലയത്തിന്റെ നിലപാട്.