യുഎഇയിൽ ഹെവി ഡ്രൈവിങ് ലൈസൻസുള്ള അപൂർവം വനിതകളിലൊരാളായിരിക്കുകയാണ് സുജാ തങ്കച്ചൻ എന്ന മലയാളി യുവതി. ഇപ്പോഴിതാ രാജ്യത്തെ ആദ്യത്തെ വനിതാ സ്കൂൾ ബസ് ഡ്രൈവർ എന്ന പദവിയും സ്വന്തമാക്കുകയാണ്. ദുബായ് ഖിസൈസിലെ ദ് മില്ലെനിയം സ്കൂൾ ബസ് കണ്ടക്ടറായിരുന്ന കൊല്ലം കുരീപ്പുഴ തൃക്കടവൂർ സ്വദേശിനി സുജാ തങ്കച്ചൻ ഒരു വർഷം മുൻപാണ് വലിയ വാഹനങ്ങള്‍ ഓടിക്കാനുള്ള ലൈസൻസ് നേടിയത്. അന്നത് വാർത്തയായതിനെ തുടർന്ന് യുഎഇയിലെ ഒട്ടേറെ സ്വകാര്യ സ്കൂളുകളിൽ നിന്നും ജോലി വാഗ്ദാനങ്ങൾ ലഭിച്ചുവെങ്കിലും ദ് മില്ലെനിയം സ്കൂളിൽ തന്നെ തുടനായിരുന്നു സുജയുടെ ഒടുവിലത്തെ തീരുമാനം.

പിന്നീട് ദുബായ് റോഡ്സ് ആൻഡ് ട്രാൻസ്പോർട് അതോറിറ്റി(ആര്‍ടിഎ)യിൽ നിന്നും സ്കൂൾ ബസ് ഡ്രൈവിങ് പരിശീലനം പൂർത്തിയാക്കിയ സുജ കഴിഞ്ഞമാസം ജോലിയിൽ പ്രവേശികുകയുണ്ടായി. ഒപ്പം രാജ്യത്തെ ആദ്യ വനിതാ സ്കൂൾ ബസ് ഡ്രൈവർ എന്ന പദവിയും. പക്ഷേ, ലോക് ഡൗൺ ആയപ്പോൾ വിദ്യാലയങ്ങൾ അടച്ചതോടെ വളയം പിടിക്കാനുള്ള കാത്തിരിപ്പ് വീണ്ടും തുടർന്ന്. താത്പര്യമുള്ളവർക്ക് സ്കൂളുകളിൽ വന്ന് പഠിക്കാമെന്ന അധികൃതരുടെ അറിയിപ്പ് വന്നതോടുകൂടി സ്കൂളില്‍ കുട്ടികളെത്തുകയും സുജ സ്വപ്നയാത്ര ആരംഭിക്കുകയുണ്ടായി. ‍