ക്രിസ്‌മസും പുതുവർഷവും ഉൾപ്പടെയുള്ള അവധികൾ അടുത്തിരിക്കെ നാട്ടിലേക്കുള്ള പ്രവാസികളുടെ ഒഴുക്ക് വർധിച്ചു. ഇതോടെ യാത്രക്കാർക്ക് മാർഗനിർദേശങ്ങൾ പുറത്തിറക്കി രംഗത്ത് എത്തിയിരിക്കുകയാണ് എമിറേറ്റ്‌സ് എയർലൈൻസ് . കൊവിഡ്-19 നിയന്ത്രണങ്ങളും മാർഗനിർദേശങ്ങളും തുടരുന്ന സാഹചര്യത്തിലാണ് സ്വന്തം പൗരന്മാർക്കും വിദേശികൾക്കുമായി നിർദേശങ്ങൾ പുറപ്പെടുവിച്ചിരിക്കുന്നത് തന്നെ.

ദുബായ് അന്താരാഷ്‌ട്ര വിമാനത്താവളം ഉപയോഗിക്കുന്ന പ്രവാസികൾ ഉൾപ്പെടെയുള്ളവർക്കാണ് നിർദേശം ബാധകമാകുക. യാത്രക്കാർ നേരത്തെ വിമാനത്താവളത്തിലെത്തി നടപടിക്രമങ്ങൾ പൂർത്തിയാക്കേണ്ടതാണ്. യാത്ര ചെയ്യുന്ന വ്യക്തി പോകാൻ ഉദ്ദേശിക്കുന്ന സ്ഥലത്തെക്കുറിച്ച് കൃത്യമായ വിവരങ്ങൾ നൽകണം. ഇത് അധികൃതർ പരിശോധിക്കുമെന്നും എമിറേറ്റ്‌സ് അറിയിക്കുകയുണ്ടായി.

വിമാനത്താവളത്തിലെത്തി ചെക്ക് ഇൻ ചെയ്യാൻ ഉദ്ദേശിക്കുന്നവർ ഏത് ക്ലാസ് യാത്രക്കാർ ആണെങ്കിലും വിമാനം പുറപ്പെടുന്ന സമയത്തിന് മൂന്ന് മണിക്കൂർ മുൻപ് എങ്കിലും ടെർമിനലിൽ എത്തണം. വിമാനം പുറപ്പെടേണ്ട സമയത്തിന് 60 മിനിറ്റുകൾക്കകം എത്തുന്നവരെ യാത്ര ചെയ്യാൻ അനുവദിക്കില്ലെന്നും അധികൃതർ വ്യക്തമാക്കി.

അതോടൊപ്പം തന്നെ ഓൺലൈൻ ചെക്ക് ഇൻ ചെയ്യാൻ 48 മണിക്കൂർ മുൻപ് മുതൽ 90 മിനിറ്റ് വരെ സാധിക്കുന്നതാണ്. ഓൺലൈൻ ചെക് ഇൻ ചെയ്യുന്നവർ വിമാനത്താവളത്തിലെ കൗണ്ടറുകളിലെത്തി ബോർഡിങ് പാസ് വാങ്ങണം. പോകുന്ന രാജ്യങ്ങളിലേക്ക് ആവശ്യമായ യാത്ര രേഖകളും മറ്റ് വിവരങ്ങളും ഉണ്ടെന്ന് ഉറപ്പാക്കണം. ആവശ്യമെങ്കിൽ പരിശോധനയ്‌ക്ക് വിധേയമാകണമെന്നും അധികൃതർ അറിയിച്ചു. ഡിസംബർ 11ന് ശേഷം യാത്രക്കാരുടെ എണ്ണം വർധിക്കുന്നതാണ്. 21വരെ ഈ സാഹചര്യം തുടരുന്നതാണ്. വിമാനത്താവളത്തിൽ എത്തുന്ന യാത്രക്കാരുടെ എണ്ണം ഉയർന്ന തോതിലാണെന്നും എമിറേറ്റ്‌സ് അധികൃതർ വിശദീകരിക്കുകയുണ്ടായി.