ലോകമെമ്പാടുമുള്ള ഫുട്ബാൾ ആരാധകർക്ക് ഉത്സവ കാലമാണ് ലോകകപ്പ് . പക്ഷെ ഗിൽബർട്ടോ മാർട്ടിനസ് എന്ന മെക്സിക്കോ കാരന് സുഖമുള്ള ഓർമയല്ല ഈ ലോകകപ്പ്. ലോകകപ്പിൽ നാല് ഐഡികാർഡും കഴുത്തിലിട്ട് നിൽക്കുന്ന ഗിൽബർട്ടോയുടെ ചിത്രം ഒരു ആരാധകനും മറക്കാൻ സാധ്യതയില്ല. ലോകകപ്പ് കാണാം കുടുംബത്തോടൊപ്പം തയ്യാറെടുത്തിരുന്ന ഗിൽബർട്ടോയെ തേടി കാർ അപകടത്തിന്റെ രൂപത്തിൽ ദുരന്തം എത്തുകയായിരുന്നു.

ഗിൽബർട്ടോ മാർട്ടിനസ് എന്ന മെക്സിക്കൻ അഭിഭാഷകൻ ഫുട്ബാൾ ലോകത്തെ നൊമ്പര കാഴചയാണ്. തന്റെ രാജ്യമായ മെക്സിക്കോ ലോകകപ്പിൽ അലയൊലികൾ മുഴക്കുന്നത് കേൾക്കാനാണ് അദ്ദേഹവും കുടുംബവും ലോകകപ്പിനെത്താൻ തയ്യാറായത്. മാസങ്ങൾക്ക് മുൻപേ അതിനുള്ള ഒരുക്കങ്ങളും തുടങ്ങിയിരുന്നു. ഗിൽബർട്ടോക്ക് എല്ലാമെല്ലാം കുടുംബമായിരുന്നു. ഭാര്യയും രണ്ടുമക്കളും അടങ്ങുന്ന കുടുംബത്തോടൊപ്പമാണ് അദ്ദേഹം റഷ്യയിലേക്ക് എത്താനായി തയ്യാറെടുത്ത്. പക്ഷെ വിധി സമ്മാനിച്ചത് മറ്റൊന്നായിരുന്നു. ഭാര്യ വെറോണിക്ക , എട്ടു വയസ്കാരൻ മകൻ ഡീഗോ , ആറു വയസ്കാരി മകൾ മിഗ, മൂന്നുപേരും അമേരിക്കയിൽ വച്ചുണ്ടായ കാറപകടത്തിൽ ദാരുണമായി കൊല്ലപ്പെട്ടു.

ആ വിഷമത്തിൽ കഴിയുന്ന അവസരത്തിലാണ് മനഃശാസ്ത്രഞ്ജന്റെ നിർദ്ദേശ പ്രകാരം അദ്ദേഹം ലോകകപ്പിനെത്തുന്നത്. തനിക്ക് പ്രിയപെട്ടവരുടെ ഐഡി കാർഡുകൾ നെഞ്ചിലണിഞ്ഞാണ് ഓരോ മത്സരം കാണാനും അദ്ദേഹം എത്തിയത്. ജർമനിക്കെതിരായ മത്സരത്തിൽ മെക്സിക്കോ അട്ടിമറി ജയം നേടിയതിന് പിന്നാലെ മാർട്ടിനസിന്റെ മൊബൈലിലേക്ക് ഒരു സന്ദേശം എത്തി , ഈ വിജയം നിങ്ങൾക്ക് വേണ്ടി ഉള്ളതാണ്. സന്ദേശം അയച്ചത് മെക്സിക്കോയുടെ നമ്പർ വൺ ഗോൾ കീപ്പറായ ഒച്ചേവ ആണ്. തന്റെ മകന്റെ പേരുള്ള ജേഴ്സിയും പേറിയാണ് മാർട്ടിനസ് ഓരോ മത്സര വേദിയിലും എത്തുന്നത്. കളിയുടെ ആവേശ ലഹരിയിലും നൊമ്പരമായി മാറുകയാണ് ഈ മെക്സിക്കോ കാരൻ.