മരണ സമാനമായ ആ അഞ്ചു ദിവസങ്ങൾ ! ; കുളി കഴിഞ്ഞ് ബാത്ത് ടബ്ബിൽ കുടുങ്ങി പുറം ലോകം കാണാനാകില്ലെന്ന് വിശ്വസിച്ച വീട്ടമ്മയ്ക്ക് രക്ഷകനായെത്തിയത് പോസ്റ്റ്മാൻ
അമേരിക്കയിലെ മിഷിഗണിൽ ബാത്ത് ടബ്ബിൽ നിന്നും എഴുന്നേൽക്കാനാവാതെ വീട്ടമ്മ കുടുങ്ങിക്കിടന്നത് അഞ്ചു ദിവസം. ആലിസണ് ഗിബ്സണ് എന്ന 54 കാരിയ്ക്കാണ് ഇത്തരത്തിലൊരു ദുരനുഭവമുണ്ടായത്. ബാത്ത് ടബ്ബിൽ കിടന്നു കുളിച്ചു കഴിഞ്ഞ ഇവർ പിന്നീട് എഴുന്നേൽക്കാൻ ശ്രമിച്ചെങ്കിലും അതിനു സാധിക്കാതെ വരികയായിരുന്നു.
ബാത്ത് ടബ്ബില് നിന്ന് എഴുന്നേല്ക്കുവാന് സഹായിക്കുന്ന ഉപകരണത്തില് പിടിച്ച് ഇവർ എഴുന്നേല്ക്കുവാന് ശ്രമിച്ചുവെങ്കിലും തുടർച്ചയായി പരാജയപ്പെടുകയായിരുന്നു. ഫോണ് മുറിയില് വച്ചിരുന്നതിനാലും വീട്ടില് തനിയെ താമസിക്കുന്നതിനാലും ഇവര്ക്ക് ആരെയും ബന്ധപ്പെടുവാനും സാധിച്ചില്ല.
പുറംലോകം കാണാനാകാതെ അഞ്ചു ദിവസം ബാത്ത് ടബ്ബില് ചിലവഴിച്ച ഇവർക്ക് മുന്നിൽ സഹായമെത്തിയത് പോസ്റ്റ്മാന്റെ രൂപത്തിലായിരുന്നു. ആലിസണിന്റെ വീട്ടില് സ്ഥിരമായി കത്ത് ഇട്ടുകൊണ്ടിരുന്ന ഇയാൾ കുറച്ചു ദിവസങ്ങളായി ഇവര് കത്തുകളൊന്നും എടുക്കുന്നില്ലെന്ന് ശ്രദ്ധിക്കുകയും ആലിസണിന്റെ അയല്പക്കക്കാരെ വിവരം അറിയിക്കുകയുമായിരുന്നു.
ശേഷം അയൽവാസികൾക്കൊപ്പം ആലിസണിന്റെ വീട്ടിലെത്തിയപ്പോഴാണ് സഹായം അഭ്യര്ത്ഥിച്ചുള്ള ശബ്ദം ഇവര് വീടിനുള്ളില് നിന്നും കേള്ക്കുന്നത്. തുടര്ന്ന് ഇവര് അറിയിച്ചതിനെ തുടര്ന്ന് എത്തിയ പോലീസുദ്യോഗസ്ഥരാണ് ആലിസണിനെ രക്ഷിച്ച് ആശുപത്രിയിലാക്കിയത്.
https://www.facebook.com/Malayalivartha