2020ലെ യു.എസ് പ്രസിഡന്റ് തെരഞ്ഞെടുപ്പിനുള്ള പ്രചാരണത്തിന് തുടക്കമിട്ട് സെനറ്റര്‍ എലിസബത്ത് വാരന്‍. ജനപ്രിയ പ്രഖ്യാപനങ്ങളുമായിട്ടായിരുന്നു വാരന്റെ തെരഞ്ഞെടുപ്പ് പ്രചാരണം. സാമ്പത്തികമായ അസമത്വം ഇല്ലാതാക്കുമെന്നായിരുന്നു അവരുടെ പ്രധാന വാഗ്ദാനം. 1980കളില്‍ പുറത്തിറങ്ങിയ 9 ടു 5 എന്ന ചിത്രത്തിലെ ഗാനവുമായാണ് അവര്‍ വേദിയിലെത്തിയത്.
നമ്മുടെ ജീവിതങ്ങള്‍ക്ക് വേണ്ടിയുള്ള പോരാട്ടമാണ് ഇതെന്ന് വാരന്‍ പറഞ്ഞു. എന്നാല്‍, ട്രംപിനെ കടന്നാക്രമിക്കാന്‍ അവര്‍ മുതിര്‍ന്നില്ല. പക്ഷേ യു.എസിലെ വന്‍കിട വ്യവസായികള്‍ക്കെതിരെ വാരന്‍ രംഗത്തെത്തി.
ഇപ്പോള്‍ വൈറ്റ് ഹൗസിലിരിക്കുന്നയാള്‍ക്ക് എന്താണ് തകര്‍ന്നതെന്ന് ബോധ്യമില്ലെന്നും ഘടനാപരമായ മാറ്റം അമേരിക്കയില്‍ കൊണ്ടു വരാനാണ് ഉദ്ദേശിക്കുന്നതെന്നും വാരന്‍ വ്യക്തമാക്കി.