പുല്‍വാമ ഭീകരാക്രമണത്തിനു പിന്നാലെ ഇന്ത്യപാക് ബന്ധം വളരെ അപകടകരമായ അവസ്ഥയിലാണെന്ന് യുഎസ് പ്രസിഡന്റ് ഡോണള്‍ഡ് ട്രംപ്. രണ്ടു രാജ്യങ്ങളും തമ്മില്‍ വളരെ അപകടകരമായ സാഹചര്യമാണ് ഇപ്പോഴുള്ളത്. ലോകത്തിന് കൃത്യമായ മുന്നറിയിപ്പാണ് ട്രംപ് നല്‍കുന്നത്. ഇന്ത്യയും പാകിസ്ഥാനും തമ്മില്‍ ഏതു നിമിഷവും യുദ്ധം ഉണ്ടാവാനിടയുള്ള സാഹചര്യത്തില്‍ ട്രംപിന്റെ പ്രസ്താവനയെ അതീവ ഗൗരവത്തോടെയാണ് ലോകം കാണുന്നത്.

ഇരു രാജ്യങ്ങളും തമ്മിലുള്ള പ്രശ്‌നങ്ങള്‍ക്ക് പിന്നില്‍ നിരവധി കാരണങ്ങളുണ്ടെന്നും ട്രംപ് പറഞ്ഞു. നേരത്തേ, പുല്‍വാമ ഭീകരാക്രമണത്തെ അപലപിച്ചും ട്രംപ് രംഗത്തെത്തിയിരുന്നു. ഇന്ത്യക്കു പിന്തുണ ആവര്‍ത്തിക്കുന്നതായും ആക്രമണത്തിന്റെ ഉത്തരവാദികള്‍ക്കെതിരേ പാക്കിസ്ഥാന്‍ കര്‍ശന നടപടിയെടുക്കണമെന്നും ട്രംപ് വ്യക്തമാക്കിയിരുന്നു. ഇതിനിടെ ഭീകരാക്രമണത്തെ യുഎന്‍ രക്ഷാസമിതിയും അപലപിച്ചു. അത്യന്തം നിന്ദ്യവും ഹീനവുമായ ആക്രമണമാണിതെന്ന് 15 അംഗരക്ഷാസമിതി പ്രമേയത്തില്‍ പറഞ്ഞു.