ഇന്ത്യൻ പ്രധാനമന്ത്രി നരേന്ദ്രമോദിക്ക് ഇന്ത്യയില്‍ മാത്രമല്ല അമേരിക്കയിലും ആരാധകർ ഏറെയാണ്. ഐക്യ രാഷ്ട്രസഭയുടെ പൊതു സമ്മേളനത്തില്‍ പങ്കെടുക്കാനായി ഹ്യൂസ്റ്റണിലെത്തിയ പ്രധാനമന്ത്രി നരേന്ദ്രമോദിക്ക് ഗംഭീരവരവേല്‍പ്പായിരുന്നു സർക്കാരും അമേരിക്കൻ ജനതയും നല്‍കിയത്.

അമേരിക്കയിലും മോദിക്ക് ഏറ്റവും പ്രിയപ്പെട്ട ഭക്ഷണമായ 'താലി മീല്‍സ്' റെഡിയായിരുന്നു. മോദി പലപ്പോഴായി തന്‍റെ ഇഷ്ടഭക്ഷണമായി ചൂണ്ടിക്കാണിച്ചിട്ടുള്ള ഒന്നാണ് ഗുജറാത്തിന്‍റെ തനത് രുചിയായ 'താലി മീല്‍സ്'. പ്രിയ നേതാവിനായി ഭക്ഷണം തയ്യാറാക്കിയത് ഷെഫ് കിരണ്‍ വര്‍മ്മയാണ്.

ഹ്യൂസ്റ്റണില്‍ മോദി തമാസിച്ചിരുന്ന ഹോട്ടലില്‍ നിന്നാണ് അദ്ദേഹത്തിന് വേണ്ടി ഭക്ഷണം തയ്യാറാക്കാനുളള അവസരം ഷെഫ് കിരണ്‍ വര്‍മ്മയ്ക്ക് ലഭിക്കുന്നത്. രണ്ട് തരം താലിയാണ് അവര്‍ മോദിക്കായി തയ്യാറാക്കിയത്. ' നാമോ താലി' , 'നാമോ മിതായി താലി' എന്നീ പേരുകളിലാണ് കിരണ്‍ മോദിക്കായി താലി തയ്യാറാക്കിയത്.

നെയ്യ് കൊണ്ടാണ് ഈ പ്രത്യേക താലികള്‍ തയ്യാറാക്കിയിരിക്കുന്നത്. ഗുജറാത്തില്‍ മാത്രം ലഭിക്കുന്ന തേപില (ബ്രെഡ് കൊണ്ടുളള ഭക്ഷണം) , കിച്ചഡി, സമോസ , ചട്ട്നി തുടങ്ങിയവ അടങ്ങിയതാണ് നാമോ താലി. രാസ് മാലയ്, ഹല്‍വ, ഗുലാം ജാം തുടങ്ങിയ അടങ്ങിയതാണ് നാമോ മിതായി താലി. ആദ്യമായി പ്രിയ നേതാവ് മോദിക്കായി ഭക്ഷണം തയ്യാറാക്കിയതിന്റെ സന്തോഷത്തിലാണ് ഷെഫ് കിരണ്‍ വര്‍മ്മ. ഹ്യൂസ്റ്റണില്‍ ഒരു റെസ്റ്റൊറന്‍ഡ് നടത്തുകയാണ് ഇന്ത്യക്കാരി കൂടിയായ കിരണ്‍ വര്‍മ്മ.

കുറച്ച് ദിവസങ്ങള്‍ക്ക് മുമ്പ് മോദി തന്‍റെ പിറന്നാള്‍ ദിനത്തില്‍ അമ്മയോടൊപ്പമിരുന്ന് താലി മീല്‍സ് കഴിക്കുന്ന ചിത്രവും സോഷ്യല്‍ മീഡിയയില്‍ ഏറെ പ്രചാരണം നേടിയിരുന്നു.