കൊറോണ വൈറസ് വ്യാപനം മൂലം നമ്മുടെ യാത്ര രീതികൾക്കൊക്കെ കാര്യമായ മാറ്റമാണ് സംഭവിച്ചിരിക്കുന്നത്. യാത്രകളിൽ കാര്യമായ മാറ്റങ്ങൾ വന്നുചേർന്നു. ട്രയിനായാലും, ബസ് ആയാലും, വിമാനം ആയാലും മുൻകൂട്ടി ബുക്ക് ചെയ്തത് വേണ്ട മുൻകരുതലുകൾ എടുത്തുമൊക്കെ മാത്രമേ ഇനി സഞ്ചാരം സാധ്യമാകൂ. ഫേസ് മാസ്ക്, സാനിറ്റൈസർ എന്നിവയുടെ ഉപയോഗം കൃത്യമായി തന്നെ ഉപയോഗിക്കണം. മാത്രമല്ല വിമാനത്തിൽ ആണ് യാത്രയെങ്കിൽ തന്നെ ഫേസ്മാസ്കും പിപിഇ കിറ്റും ധരിക്കേണ്ടി വന്നേക്കും. എന്നാലും കൊവിഡ്-19 ഭീഷണി പൂർണമായും അവസാനിക്കുന്നില്ല എന്നതാണ്. അപ്പോൾ പിന്നെ ഒരു വഴിയേയുള്ളൂ, വിമാനത്തിലെ സീറ്റ് മുഴുവൻ ബുക്ക് ചെയ്യുക.

ഇൻഡോനേഷ്യയിലെ ജക്കാർത്ത നിവാസിയായ റിച്ചാർഡ് മുൽജാദി ചെയ്തതും അത് തന്നെയാണ്. സാമൂഹിക പ്രവർത്തകനായ റിച്ചാർഡ് ഇൻസ്റ്റാഗ്രാമിൽ പോസ്റ്റ് ചെയ്തതനുസരിച്ച് അദ്ദേഹവും ഭാര്യയും യാത്ര ചെയ്ത വിമാനത്തിൽ അവർ മാത്രമായിരുന്നു യാത്രക്കാരായി എത്തിയത്. അങ്ങനെ ആഡംബരപൂർണ്ണമായ ജീവിതം നയിക്കുന്നതിൽ പ്രശസ്തനായ റിച്ചാർഡ് ജക്കാർത്തയിൽ നിന്നും ബാലിയിലേക്ക് ഭാര്യ ഷെൽവിൻ ചങ്ങുമായി യാത്ര ചെയ്യാനാണ് ബാൾട്ടിക് എയർ വിമാനത്തിലെ സീറ്റുകൾ മുഴുവൻ ബുക്ക് ചെയ്തതിരുന്നത്. കൊറോണ വൈറസ് ഭീതിയെ തുടർന്നാണ് ഇത്തരത്തിൽ ചെയ്തതെന്ന് യുവാവ് പറയുകയുണ്ടായി.

അതേസമയം ഇൻസ്റ്റാഗ്രാമിൽ പോസ്റ്റിൽ തനിക്ക് പുറകിലെ ഒഴിഞ്ഞ സീറ്റുകളുടെ ചിത്രം റിച്ചാർഡ് പങ്കുവച്ചിട്ടുണ്ട്. "എന്നെക്കൊണ്ട് പറ്റാവുന്ന അത്രയും സീറ്റുകൾ ഞാൻ ബുക്ക് ചെയ്തു. എന്നിട്ടും ഒരു പ്രൈവറ്റ് ജെറ്റ് വിമാനത്തിൽ യാത്ര ചെയ്യുന്നതിനേക്കാൾ കുറവ് പണമേ എനിക്ക് ചിലവായുള്ളൂ" റിച്ചാർഡ് ഇൻസ്റ്റാഗ്രാമിൽ ചിത്രത്തോടൊപ്പം കുറിക്കുകയുണ്ടായി.

മറ്റുള്ള യാത്രക്കാരുടെ കൂടെ സഞ്ചരിക്കുമ്പോൾ കൊറോണ വൈറസ് പകരാനുള്ള സാധ്യത ഏറെയാണ് എന്നത് തന്നെയാണ് സീറ്റുകൾ ബുക്ക് ചെയ്യാൻ റിച്ചാർഡിനെ പ്രേരിപ്പിച്ചത്. "ഈ വിമാനത്തിൽ മറ്റാരും ഇല്ല എന്ന് ഉറപ്പു വരുത്തേണ്ടതുണ്ടായിരുന്നു. ഞങ്ങൾ മാത്രമല്ല ഈ വിമാനത്തിൽ എങ്കിൽ ഞങ്ങൾ യാത്ര ചെയ്യുകയേ ഇല്ലായിരുന്നു," എന്നും റിച്ചാർഡ് ഒരു ഇൻസ്റ്റ പോസ്റ്റ് സ്ലൈഡിൽ വ്യക്തമാക്കിയിരുന്നു.