ലോകത്തിലെ ഏറ്റവും ഉയരത്തിലുള്ള റോഡ് കിഴക്കന്‍ ലഡാക്കില്‍ 19,300 അടി ഉയരത്തില്‍ നിര്‍മാണം പൂര്‍ത്തിയായതായി കേന്ദ്ര സര്‍ക്കാര്‍ അറിയിച്ചു. ബോര്‍ഡര്‍ റോഡ്‌സ് ഓര്‍ഗനൈസേഷന്റെ നേതൃത്വത്തിലാണ് ഉമിംഗ്‌ല പാസ് നിര്‍മിച്ചതെന്ന് സര്‍ക്കാര്‍ ബുധനാഴ്ച പ്രസ്താവനയില്‍ അറിയിച്ചു. എവറസ്റ്റ് ബേസ് ക്യാമ്ബുകളേക്കാള്‍ ഉയരത്തിലാണ് റോഡ് നിര്‍മിച്ചിരിക്കുന്നത്. നേപ്പാളിലെ തെക്കന്‍ ബേസ് ക്യാമ്ബ് 17,598 അടി ഉയരത്തിലാണ്. ടിബറ്റിലെ നോര്‍ത്ത് ബേസ് ക്യാമ്ബ് 16,900 അടിയിലുമാണ്. അതേസമയം ഇവിടേക്കൊന്നും റോഡില്ല.

ബൊളീവിയയിലെ 18,953 അടി ഉയരത്തിലുള്ള ഉതുറുങ്കു റോഡിന്റെ റെക്കോര്‍ഡാണ് ഉമിംഗ്‌ല മറികടന്നത്. പുതിയ പാത ലഡാക്കിലെ സാമൂഹികസാമ്ബത്തിക സ്ഥിതി മെച്ചപ്പെടുത്താനും ടൂറിസം മേഖലയെ പ്രോത്സാഹിപ്പിക്കാനും സഹായിക്കുമെന്ന് സര്‍ക്കാര്‍ അറിയിച്ചു.
നാല് വര്‍ഷങ്ങള്‍ക്ക് മുമ്ബ് തന്നെ ഈ പാത വാര്‍ത്തകളില്‍ ഇടംപിടിച്ചിരുന്നു. 52 കിലോമീറ്റര്‍ നീളമുള്ള റോഡിന്റെ ടാറിങ് ഇപ്പോഴാണ് പൂര്‍ത്തിയായത്.
ചിസംലെയില്‍നിന്ന് ചൈനീസ് അതിര്‍ത്തിയിലുള്ള ഡെംചോക്കിലേക്കാണ് ഈ പാത നീളുന്നത്. പുതിയ പാത സൈന്യത്തിന് പുറമെ പ്രാദേശിക ജനങ്ങള്‍ക്കും ഏറെ സഹായകമാകും. ഈ ഭാഗത്ത് മൈനസ് 40 വരെ താപനില താഴാറുണ്ട്. കൂടാതെ മറ്റു സ്ഥലങ്ങളെ അപേക്ഷിച്ച് 50 ശതമാനം മാത്രമാണ് ഓക്‌സിജന്റെ അളവ്. ലഡാക്കില്‍ തന്നെയുള്ള ഖര്‍ദുങ് ല ലോകത്തിലെ ഏറ്റവും ഉയരത്തിലുള്ള പാതയായി അറിയപ്പെടാറുണ്ട്. എന്നാല്‍, ഔദ്യോഗിക രേഖകള്‍ പ്രകാരം 17,600 അടി മാത്രമാണ് ഇതിന്റെ ഉയരം. ഖര്‍ദുങ് ലാ സഞ്ചാരികളുടെ പ്രിയപ്പെട്ട പാതയാണ്.