യുദ്ധം ആരംഭിച്ച് 2ാം മാസത്തിലേക്ക് അടുക്കുന്നു. ഈ സാഹചര്യത്തിലും അതിശക്തമായ ആക്രമണമാണ് നടന്ന് കൊണ്ടിരിക്കുന്നത്. ഇരുകൂട്ടരുടേയും ഭാഗത്ത് നിന്നും നാശനഷ്ടങ്ങൾ സംഭവിക്കുമ്പോഴും വിട്ടുകൊടുക്കാൻ തയ്യാറല്ല എന്ന് വേണം മനസ്സിലാക്കാൻ. റഷ്യയ്ക്ക് എത്രയൊക്കെ പ്രതിരോധ ഉപകരണങ്ങൾ ഉണ്ടെന്ന് പറഞ്ഞാലും യുദ്ധതന്ത്രങ്ങൾ യുക്രൈൻ പ്രയോ​ഗിക്കുമ്പോൾ അതിനു മുന്നിൽ പകച്ച് പിൻമാറേണ്ട അവസ്ഥയാണെന്ന് പറഞ്ഞാൽ ഒരുവിധം സമ്മതിക്കേണ്ടി വരും.

യുക്രൈന്‍ അധിനിവേശത്തിനിടെ നിരവധി റഷ്യന്‍ സൈനികര്‍ കൊല്ലപ്പെട്ടതായി ഏറ്റവുമൊടുവിൽ റഷ്യ സമ്മതിച്ചിരിക്കുകയാണ്. ആക്രമണം ശക്തമായ യുക്രൈനിലെ പ്രധാനപ്പെട്ട നഗരങ്ങളില്‍ റഷ്യന്‍ സേന കടുത്ത പ്രതിരോധം നേരിട്ടുവെന്ന് സ്‌കൈ ന്യൂസിന് നല്‍കിയ അഭിമുഖത്തില്‍ ക്രെംലിന്‍ വക്താവ് ദിമിത്രി പെസ്‌കോവ് പറഞ്ഞു. യുക്രെയ്‌‍നിൽ റഷ്യൻ ആക്രമണം ശക്തമായ നഗരങ്ങളിൽ കടുത്ത പ്രതിരോധം നേരിടുന്നതായി ആദ്യമായി റഷ്യ സമ്മതിക്കുകയാണ്.

യുദ്ധ ഭൂമിയില്‍ സൈന്യത്തിന് വലിയ ആള്‍നാശമുണ്ടായെന്നും വലിയ ദുരന്തമാണ് റഷ്യ നേരിട്ടതെന്നും ദിമിത്രി പറഞ്ഞു. നിയന്ത്രിക്കാവുന്നതിലും അപ്പുറമാണ് മരണ നിരക്കെന്നും ദിമിത്രി പെസ്കോവ് കൂട്ടിച്ചേർത്തു. യുക്രെയ്നിലെ റഷ്യൻ അധിനിവേശം 6 ആഴ്ച പിന്നിടുമ്പോൾ, 19,000ത്തോളം റഷ്യൻ സൈനികർ കൊല്ലപ്പെട്ടുവെന്ന് യുക്രെയ്‍ൻ സൈന്യം അവകാശവാദം ഉന്നയിച്ചതിനു പിന്നാലെയാണ് വൻതോതിലുള്ള ആൾനാശമാണ് റഷ്യൻ സൈന്യം നേരിടുന്നതെന്നു ദിമിത്രി പെസ്കോവ് തുറന്നു സമ്മതിച്ചത്.

അത്രത്തോളം ഭീകര അവസ്ഥയാണ് ഇപ്പോൾ അവർ അഭിമുഖീകരിക്കുന്നത്. യുക്രൈന്‍ അധിനിവേശത്തിന് വിചാരിച്ച വേഗമില്ലെന്ന് റഷ്യ നേരത്തെതന്നെ വ്യക്തമാക്കിയിരുന്നു. എന്നാല്‍ റഷ്യയ്ക്ക് വന്‍തോതില്‍ സൈനികനാശം സംഭവിച്ചുവെന്ന യുക്രൈന്റെ അവകാശവാദങ്ങള്‍ തള്ളുന്ന സമീപനമാണ് ഇതുവരെ റഷ്യ സ്വീകരിച്ചിരുന്നത്.

ഷ്യന്‍ സേനയുടെ നിരവധി കവചിത വാഹനങ്ങളും ടാങ്കുകളും സൈനിക ഉപകരണങ്ങളും നശിപ്പിച്ചതായും യുക്രൈന്‍ അവകാശപ്പെട്ടിരുന്നു. ഇതിനുപിന്നാലെയാണ് ഇപ്പോള്‍ സൈനിക ആള്‍നാശമുണ്ടായെന്ന് റഷ്യ സമ്മതിച്ചത്. ദിവസങ്ങൾക്കുള്ളിൽ തലസ്ഥാന നഗരിയായ കീവ് പിടിച്ചെടുക്കുമെന്ന് അവകാശവാദം ഉന്നയിച്ചായിരുന്നു ഫെബ്രുവരി 24 ന് റഷ്യ യുക്രെയ്‌നിനെ ആക്രമിച്ചത്.

എന്നാൽ പ്രധാനനഗരങ്ങൾ പിടിച്ചെടുക്കാനോ പിടിച്ചെടുത്ത നഗരങ്ങളിൽ ആധിപത്യം ഉറപ്പിക്കാനോ റഷ്യയ്ക്ക് സാധിച്ചില്ല. പാശ്ചാത്യ രാജ്യങ്ങളുടെ ഉപരോധംമൂലം റഷ്യ കഴിഞ്ഞ മൂന്ന് പതിറ്റാണ്ടിനിടെയുള്ള ഏറ്റവും പ്രയാസകരമായ സാമ്പത്തിക സാഹചര്യത്തെ അഭിമുഖീകരിക്കുകയാണെന്ന് കഴിഞ്ഞ ദിവസം റഷ്യന്‍ പ്രധാനമന്ത്രി പറഞ്ഞിരുന്നു.

യുക്രെയ്ൻ സൈന്യം പുറത്തു വിട്ട കണക്കുകൾ പ്രകാരം 18,900 റഷ്യൻ സൈനികർ ഇതിനകം യുക്രെയ്‌നിൽ കൊല്ലപ്പെട്ടു. 150 യുദ്ധവിമാനങ്ങൾ, 135 ഹെലികോപ്റ്ററുകൾ, 698 ടാങ്കുകൾ, 1891 കവചിത വാഹനങ്ങൾ, 111 ഡ്രോണുകൾ, 76 ഇന്ധന ടാങ്കുകൾ,108 മൾട്ടിപ്പിൾ റോക്കറ്റ് ലോഞ്ചിങ് സിസ്റ്റം, 1,358 സൈനിക വാഹനങ്ങൾ എന്നിവ തകർത്തായും യുക്രെയ്‌ൻ സൈന്യം അവകാശവാദം ഉന്നയിച്ചിരുന്നു. യുക്രെയ്‌‍നിൽ റഷ്യൻ ആക്രമണം ശക്തമായ നഗരങ്ങളിൽ സൈനികമുന്നേറ്റം തടയാൻ ജനങ്ങൾ തന്നെ ആയുധമെടുക്കുന്നതും വൻതോതിൽ യുക്രെയ്‌ന് നാറ്റോയും യുറോപ്യൻ യൂണിയൻ ആയുധങ്ങൾ നൽകുന്നതുമാണ് റഷ്യൻ മുന്നേറ്റം മന്ദഗതിയിലാക്കിയത്.

ആറാഴ്ചയോളമായി തുടരുന്ന റഷ്യന്‍ അധിനിവേശത്തിനിടെ യുക്രൈനില്‍നിന്ന് 40 ലക്ഷത്തോളം ആളുകള്‍ പലായനം ചെയ്തിട്ടുണ്ടെന്നാണ് കണക്ക്. സൈനികരും സാധാരണക്കാരും ഉള്‍പ്പെടെ നിരവധി പേര്‍ ആക്രമണത്തില്‍ കൊല്ലപ്പെട്ടു. ആയിരക്കണക്കിന് ആളുകള്‍ക്ക് പരിക്കേല്‍ക്കുകയും ചെയ്തു. ബോറോദ്യങ്കയിലെ തകർന്ന കെട്ടിടത്തിൽ നിന്ന് 26 മൃതദേഹങ്ങൾ ഇന്നലെ കണ്ടെത്തിയിരുന്നു.

അപ്രതീക്ഷിത തിരിച്ചടിയിൽ മനോനില തകർന്ന റഷ്യൻ സൈന്യം ജനവാസമേഖലകളിൽ കടുത്ത ആക്രമണം അഴിച്ചുവിടുന്നതായും നിരപരാധികളെ തിരഞ്ഞു പിടിച്ചു കൊല്ലുന്നതായും യുക്രെയ്‍ൻ ആരോപിച്ചിരുന്നു. ബുച്ച, മരിയുപോൾ, ബോറോദ്യങ്ക തുടങ്ങിയ നഗരങ്ങളിൽ റഷ്യ കൂട്ടക്കുരുതി നടത്തുന്നതായും സ്ത്രീകളെയും പെൺകുട്ടികളെയും കൂട്ടബലാത്സംഗത്തിന് ഇരയാക്കുന്നതായും യുക്രെയ്‍ൻ ആരോപിച്ചിരുന്നു.

യുക്രെയ്നിലെ ബുച്ച പട്ടണത്തിൽ നടന്ന കൂട്ടക്കുരുതി ഉൾപ്പെടെ ക്രൂരതകളുടെ പേരിൽ രാജ്യാന്തര പ്രതിഷേധം ഉയർന്നതും തിരിച്ചടിയായി. ബുച്ച കൂട്ടക്കുരുതി ഉൾപ്പെടെ ക്രൂരതകളുടെ പേരിൽ റഷ്യയെ ഐക്യരാഷ്ട്ര സംഘടനയുടെ മനുഷ്യാവകാശ കൗൺസിലിൽ നിന്നു പുറത്താക്കിയിരുന്നു. മനുഷ്യാവകാശ സമിതിയില്‍നിന്ന് റഷ്യയെ പുറത്താക്കണമെന്ന് ആവശ്യപ്പെട്ട് അമേരിക്ക കൊണ്ടുവന്ന പ്രമേയത്തിന് കഴിഞ്ഞ ദിവസമാണ് യു.എന്‍. പൊതുസഭ അംഗീകാരം നല്‍കിയത്. ആദ്യമായാണ് യു.എന്‍. സുരക്ഷാസമിതിയില്‍ സ്ഥിരാംഗമായ ഒരുരാജ്യത്തെ മനുഷ്യാവകാശ സമിതിയില്‍ നിന്ന് മാറ്റി നിര്‍ത്തുന്നത്.

തലസ്ഥാനമായ കീവ്, വടക്കൻ നഗരമായ ചെർണീവ് എന്നിവിടങ്ങളിൽ നിന്നു പിന്മാറിയ റഷ്യൻസേന കിഴക്കൻ യുക്രെയ്ൻ കേന്ദ്രീകരിച്ച് ആക്രമണം ശക്തമാക്കി മുന്നോറുകയാണ്. വിമതരുടെ നിയന്ത്രണത്തിലുള്ള ഡോൺബാസ് മേഖല പൂർണമായി പിടിക്കാനായി അതിർത്തിയിൽ വൻ പടയൊരുക്കം ആരംഭിച്ചു. റഷ്യ യുക്രെയ്‌ന്റെ ഗതാഗത, നിര്‍മാണ മേഖലകളെയാണ് ലക്ഷ്യമിടുന്നതെന്നും പിടിച്ചെടുക്കുന്ന പ്രദേശങ്ങളിൽ വൻതോതിൽ നാശം ഉറപ്പാക്കി യുക്രെയ്‌ന്‍ സര്‍ക്കാരിനെയും സൈന്യത്തെയും ദുര്‍ബലമാക്കാനുമാണ് ശ്രമമെന്നുമാണ് വിലയിരുത്തൽ.

അതേസമയം, കിഴക്കന്‍ യുക്രൈന്‍ നഗരമായ ക്രമാറ്റോര്‍സ്‌കില്‍ റെയില്‍വേ സ്റ്റേഷനു നേര്‍ക്ക് റഷ്യയുടെ റോക്കറ്റ് ആക്രമണം. മുപ്പതോളംപേര്‍ കൊല്ലപ്പെട്ടതായാണ് റിപ്പോർട്ട്. നൂറിലധികംപേര്‍ക്ക് പരിക്കേല്‍ക്കുകയും ചെയ്തു. സിവിലിയന്‍മാരെ സുരക്ഷിതകേന്ദ്രങ്ങളിലേക്ക് മാറ്റാന്‍ ഉപയോഗിക്കുന്ന റെയില്‍വേ സ്‌റ്റേഷനു നേര്‍ക്കാണ് ആക്രമണം നടന്നത്. രണ്ടു റോക്കറ്റുകളാണ് സ്‌റ്റേഷനിലേക്ക് പതിച്ചത്.