കടല്‍ എന്നും നിഗൂഢതകളുടെയും അത്ഭുതങ്ങളുടെയും ലോകമാണ്. ഇന്നും കണ്ടെത്തിയിട്ടില്ലാത്ത അത്ഭുതകാഴ്ചകള്‍ കടലിനുള്ളിലുണ്ടെന്നാണ് ശാസ്ത്രജ്ഞര്‍ അഭിപ്രായപ്പെടുന്നത്. എന്നാല്‍ ഇപ്പോഴിതാ കടലിനുള്ളിലെ അത്ഭുത കാഴ്ച പുറം ലോകത്തെ അറിയിച്ചിരിക്കുകയാണ് ഒരുകൂട്ടം ശാസ്ത്രജ്ഞന്മാര്‍. ഭൂമിയില്‍ വളര്‍ന്നു വ്യാപിച്ചു കിടക്കുന്ന ഏറ്റവും വലിയ കടല്‍ സസ്യങ്ങളുടെ കൂട്ടമാണിത്.

ഓസ്ട്രേലിയയുടെ പടിഞ്ഞാറന്‍ തീരത്ത് ഷാര്‍ക്ക് ബേ എന്ന സ്ഥലത്താണ് അത്യപൂര്‍വ്വവും അത്ഭുതകരവുമായ സസ്യങ്ങളുടെ വലിയ കൂട്ടത്തെ കണ്ടെത്തിയിരിക്കുന്നത്. ഏകദേശം 4,500 വര്‍ഷങ്ങള്‍ക്ക് മുമ്ബ് രണ്ട് വ്യത്യസ്ത കടല്‍സസ്യങ്ങള്‍ തമ്മില്‍ പരാഗണം നടന്ന് വിത്ത് മുളച്ചാണ് ഈ കടല്‍പ്പുല്ലുകള്‍ രൂപം കൊണ്ടത്.

സസ്യങ്ങള്‍ വളര്‍ന്നിരിക്കുന്നത് ഏകദേശം 20000 ഹെക്ടര്‍(49000 ഏക്കറിന്) തുല്യമായാണ്. ലോകത്തില്‍ ഏറ്റവും കൂടുതല്‍ വളര്‍ന്ന് കിടക്കുന്ന സസ്യം എന്ന് പൊതുവെ അറിയപ്പെടുന്ന യൂട്ടായിലെ അസ്പന്‍ മരങ്ങളുടെ നിരയേക്കാള്‍ വളരെ വലുതാണ് നിലവില്‍ കണ്ടെത്തിയിരിക്കുന്ന സമുദ്ര സസ്യങ്ങളുടെ വലിപ്പം. ഏകദേശം 2000 മുതല്‍ 100,000 വര്‍ഷങ്ങള്‍ വരെ ഈ സസ്യങ്ങള്‍ക്ക് ജീവിതം ഉണ്ടെന്നാണ് പഠനത്തിലൂടെ കണ്ടെത്തിയിരിക്കുന്നത്.

ഓസ്ട്രേലിയന്‍ കടല്‍ത്തീരങ്ങളില്‍ സാധാരണായായി ഇവ കാണപ്പെടുന്നുണ്ടെങ്കിലും വിശാലമായി പരന്ന് കിടക്കുന്ന വലിയ ഒരുകൂട്ടം ആകസ്മികമായാണ് കണ്ടെത്തിയിരിക്കുന്നത്. തുടര്‍ന്ന് സസ്യത്തിന്റെ ജനിതക വൈവിധ്യം കണ്ടെത്തുന്നതിനായി നടത്തിയ പഠനത്തില്‍ നിന്ന് ഒരേയൊരു വിത്തില്‍ നിന്നാണ് ഭൂമിയിലെത്തന്നെ ഏറ്റവും വലിയ സസ്യങ്ങളുടെ കൂട്ടം ഉടലെടുത്തിരിക്കുന്നത് എന്നാണ് കണ്ടെത്തിയിരിക്കുന്നത്.

നിലവില്‍ ആമകള്‍, ഡോള്‍ഫിനുകള്‍, ഞണ്ടുകള്‍, ചെറുമത്സ്യങ്ങള്‍ എന്നിങ്ങനെ ഒരു വലിയകൂട്ടം സമുദ്രജീവജാലങ്ങള്‍ക്ക് ആവാസ്ഥ വ്യവസ്ഥ പ്രദാനം ചെയ്യുകയാണ് ഈ സസ്യങ്ങള്‍. മികച്ച പ്രതിരോധ ശേഷിയുള്ള ഈ സസ്യത്തിന് കടലിലെ താപനിലയില്‍ വരുന്ന മാറ്റങ്ങളോട് ഇഴുകിചേരാന്‍ സാധിക്കുന്നു. പൊതുവെ ഈ ഇനം വര്‍ഷത്തില്‍ 30 സെന്റീമീറ്റര്‍ വരെ പുല്‍ത്തകിടി പോലെ വളരാറുണ്ട്. എന്നാല്‍ ഇന്നത്തെ ഈ വലിപ്പത്തിലേക്ക് വളരുവാന്‍ ഏകദേശം നാലായിരം വര്‍ഷങ്ങള്‍ക്കുമേല്‍ സമയം എടുത്തുവെന്നാണ് ശാസ്ത്രജ്ഞരുടെ കണ്ടെത്തല്‍.