പുതിയ വീട് നിര്‍മ്മിക്കാന്‍ കുഴിയെടുക്കുമ്പോഴോ അല്ലെങ്കില്‍ കിണര്‍ കുഴിക്കുമ്പോഴൊ ഒക്കെ നിധികള്‍ കിട്ടാറുണ്ട് അല്ലേ.. 100 ഉം 150 വര്‍ഷം പഴക്കമുള്ള വസ്തുക്കളാണ് പൊതുവെ നിധി എന്ന് വിളിക്കുന്നത്. എന്നാല്‍ 3400 വര്‍ഷം പഴക്കമുള്ള ഒരു നഗരം തന്നെ പ്രത്യക്ഷപ്പെട്ടിരിക്കുകയാണ്. ഇവിടെല്ല, അങ്ങ് ഇറാഖില്‍ ഒരു നദി വറ്റി വരണ്ടപ്പോഴായിരുന്നു ഈ അത്ഭുതം സംഭവിച്ചത്.

വടക്കന്‍ ഇറാഖില്‍ സ്ഥിതി ചെയ്യുന്ന മൊസൂള്‍ അണക്കെട്ട് ഒരിക്കല്‍ സദ്ദാം അണക്കെട്ട് എന്നും അറിയപ്പെട്ടിരുന്ന ഈ അണക്കെട്ട് ഉള്‍പ്പെടുന്ന മൊസൂള്‍ റിസര്‍വോയറിലെ അടിത്തട്ടില്‍ നിന്നാണ് ഗവേഷകരെ ഞെട്ടിച്ച് നഗരം പൊന്തിവന്നത്.

ഇറാഖിലെ ടൈഗ്രിസ് നദിയുടെ ആഴങ്ങളിലാണ് ഈ പുരാതന നഗരം ഒളിഞ്ഞിരുന്നത്. ഇറാഖിലെ കുര്‍ദിസ്ഥാന്‍ മേഖലയിലുണ്ടായിരുന്ന പഴയ നഗരമാണ് പുരാവസ്തു ഗവേഷകരുടെ അന്താരാഷ്ട്ര സംഘം കണ്ടെത്തിയത്.

ജര്‍മ്മന്‍, കുര്‍ദിഷ് പുരാവസ്തു ഗവേഷകരുടെ സംഘം കണ്ടെത്തിയ ഈ നഗരം, വെങ്കലയുഗത്തിലെ മിത്താനി സാമ്രാജ്യ കാലഘട്ടത്തിലുണ്ടായിരുന്നതാണ്. 1475 BC ക്കും 1275 BC ക്കും ഇടയില്‍ മിതാനി സാമ്രാജ്യം വടക്കന്‍ യൂഫ്രട്ടീസ്‌ടൈഗ്രിസ് പ്രദേശം ഭരിച്ചിരുന്ന കാലത്താണ് ഈ നഗരം സ്ഥാപിച്ചതെന്നാണ് വിശ്വസിക്കപ്പെടുന്നത് എന്നാണ് ഗവേഷകരെ ഉദ്ദരിച്ച് ന്യൂയോര്‍ക്ക് പോസ്റ്റ് റിപ്പോര്‍ട്ട് ചെയ്തു.

മാത്രമല്ല ബിസി 1350ല്‍ ഉണ്ടായ ഭൂകമ്പത്തില്‍ നശിച്ച പുരാതന പട്ടണമായ സാഖിക്കുവിനെ പ്രതിനിധീകരിച്ചാണ് മിതാനി സാമ്രാജ്യം ഈ നഗരം നിര്‍മ്മിച്ചത്. എന്തായാലും വലിയൊരു കണ്ടുപിടിത്തമാണ് ഗവേഷകര്‍ ഇപ്പോള്‍ നടത്തിയിരിക്കുന്നത്. മാത്രമല്ല ഇത് വലിയ അത്ഭുതം തന്നെയെന്നാണ് ഗവേഷകര്‍ പറയുന്നത്.

കാരണം ഒരു കൊട്ടാരം, നിരവധി ഗോപുരങ്ങള്‍, ബഹുനില കെട്ടിടങ്ങള്‍, എന്നിവ അടങ്ങുന്നതാണ് വലിയ നഗരം. മണ്ണു കൊണ്ടുള്ള ഇഷ്ടിക കൊണ്ടാണ് ഭിത്തി നിര്‍മിച്ചിരിക്കുന്നത്. കൂടാതെ മണ്ണ് കൊണ്ട് ഉണ്ടാക്കിയിട്ടും വെള്ളത്തിനടിയില്‍ ഇത്രയും കാലം ഈ കെട്ടിടങ്ങളും നഗരവും അതിജീവിച്ചതും ഒരു അത്ഭുതമാണെന്ന് നിസ്സംശയം പറയാം.

ഈ വര്‍ഷം ആദ്യം ടൈഗ്രിസ് നദിയുടെ പ്രദേശത്ത് കടുത്ത വരള്‍ച്ചയുണ്ടായിരുന്നു. ഇത് മൊസൂള്‍ റിസര്‍വോയറില്‍ വലിയ വരള്‍ച്ചക്ക് കാരണമായി. തുടര്‍ന്ന് പ്രദേശത്തെ ജലം കുറഞ്ഞു. അങ്ങനെയാണ് 3400 വര്‍ഷം പഴക്കമുള്ള നഗരം കണ്ടെത്തിയത്.

കാലാവസ്ഥാ വ്യതിയാനം ഏറ്റവും കൂടുതല്‍ ബാധിക്കുന്ന രാജ്യങ്ങളിലൊന്നാണ് ഇറാഖ്. അതിനാല്‍ തന്നെ കൃഷിക്കും മറ്റുമായി ടൈഗ്രിസ് നദിയുടെ ഭാഗമായ മൊസൂള്‍ റിസര്‍വോയറിനെ ആണ് ആളുകള്‍ ആശ്രമയിച്ചിരുന്നത്. അതുകൊണ്ട് വലിയ അളവില്‍ വെള്ളം ഉപയോഗിക്കുകയും പെട്ടെന്ന് വെള്ളം വറ്റുകയുമാണ് ഉണ്ടായത് എന്നാണ് ഗവേഷണം നടത്തിയവര്‍ പറയുന്നത്.

അതേസമയം തങ്ങള്‍ കുഴിച്ചെടുത്ത കെട്ടിടങ്ങളെ പ്ലാസ്റ്റിക് ഷീറ്റുകളും മറ്റും ഉപയോഗിച്ച് ഗവേഷകര്‍ സംരക്ഷിച്ചിരിക്കുകയാണ്. വെള്ളം വീണ്ടും ഉയരുമ്പോള്‍ അവ കേടാകുമോ എന്ന ഭയത്താലാണ് ഇങ്ങനെ ചെയ്തത.്