ഖത്തർ ലോകകപ്പില്‍ കാലിന് പരുക്കേറ്റ ബ്രസീലിയന്‍ താരം നെയ്മർക്ക് അടുത്ത മത്സരം നഷ്ടമാകുമെന്ന റിപ്പോർട്ടുകളാണ് പുറത്ത് വരുന്നത്. 28-ാം തീയതി സ്വിറ്റ്സർലന്‍ഡിനെതിരായ മത്സരത്തിൽ നെയ്മർ കളിക്കില്ല. അതായത് ഇന്നലെ സെർബിയയ്‌ക്കെതിരായ മത്സരത്തിൽ നെയ്മറിന്റെ കണങ്കാലിന് പരുക്കേറ്റിരുന്നു.

ഇപ്പോഴിതാ സമൂഹമാധ്യമങ്ങളിൽ ഇതിനെതിരെ ചിരിക്കുന്നവർക്ക് മറുപടിയുമായി രംഗത്ത് എത്തിയിരിക്കുകയാണ് ഡോ. നെൽസൺ ജോസഫ്.

ഫേസ്ബുക്ക് കുറിപ്പ് ഇങ്ങനെ;

നെയ്മർ ഫൗൾ ചെയ്യപ്പെടുന്നത് പലർക്കും ഒരു തമാശയാണ്...
പരിക്കോടെ അയാൾ ഇന്നലെ കളം വിട്ടുവെന്ന വാർത്തയ്ക്ക് കീഴിലും നിറയുന്നത് ചിരികൾ തന്നെയാണ്.
ഒൻപത് തവണയാണ് അയാൾ ഇന്നലെ ഫൗൾ ചെയ്യപ്പെട്ടതെന്ന് എവിടെയോ വായിച്ചു. അഞ്ചിലേറെ തവണ ഫൗൾ ചെയ്യപ്പെട്ട താരങ്ങൾ അപൂർവമാണെന്നും.

അയാളെ എതിർ ടീമുകൾ എത്രത്തോളം ഭയക്കുന്നെന്ന് ആ കണക്കുകൾ പറയും, ഇത് ആദ്യമായൊന്നുമല്ല അയാൾക്ക് കളിക്കളത്തിൽ നിന്ന് പരിക്കേറ്റ് മാറേണ്ടിവരുന്നത്. ഓർമ ശരിയാണെങ്കിൽ അയാളുടെ 2014 ലോകകപ്പ് അവസാനിച്ചത് നട്ടെല്ലിലെ കശേരുവിനേറ്റ പൊട്ടലുമായാണ്. എന്നിട്ടും അയാൾ തിരിച്ച് വന്നു.. ഇന്നലെ ജഴ്സി കൊണ്ട് മുഖം മറച്ച് ഇരുന്ന ഇരിപ്പിൽ നിന്ന് തിരിച്ച് വരണമെന്നുതന്നെയാവും ഓരോ ബ്രസീൽ ആരാധകൻ്റെയും ആഗ്രഹം..

സബ്സ്റ്റിറ്റ്യൂഷൻ ചെയ്യപ്പെടുമ്പൊഴുള്ള നെയ്മറുടെ കാലുകളാണ് താഴെയുളള ചിത്രത്തിൽ.
ടാക്കിൾ ചെയ്യപ്പെട്ടപ്പൊ വലതുകാലിന് നല്ല രീതിയിൽ ആഘാതമേറ്റിട്ടുണ്ടെന്ന് ഒറ്റ നോട്ടത്തിൽ മനസിലാവുന്ന ചിത്രം. ഇതും വച്ചുകൊണ്ടാണ് അവസാന ഏതാനും മിനിറ്റുകൾ അയാൾ കളിച്ചത്.
തൊട്ടാൽ വീഴുന്നുവെന്ന് നെയ്മറെ പരിഹസിക്കുന്നവരിൽ എത്രപേർ അങ്ങനെയൊരു പരിക്കേറ്റാൽ നാലു ചുവടെങ്കിലും നടക്കുമോ എന്തോ !! ഏറ്റവും കൂടുതൽ മാർക്ക് ചെയ്യപ്പെടുന്ന, ടാക്കിൾ ചെയ്യപ്പെടുന്ന, ഫൗൾ ചെയ്യപ്പെടുന്ന കളിക്കാരൻ. തിരിച്ചു വരണം നെയ്മർ... കളിക്കളത്തിലേക്ക്...

പൂർവാധികം കരുത്തോടെ...