ദക്ഷിണ - കിഴക്കന്‍ ആഫ്രിക്കയിലെ മലാവിയിലും മൊസാംബിക്കിലും വീശിയടിച്ച ഫ്രെഡി ചുഴലിക്കാറ്റില്‍പ്പെട്ട് മരിച്ചവരുടെ എണ്ണം 400 കടന്നു. മൊസാംബിക്കില്‍ 53 പേരും മലാവിയില്‍ 326 പേരുമാണ് കഴിഞ്ഞ ഒരാഴ്ചയ്ക്കിടെ മരിച്ചത്.

ചുഴലിക്കാറ്റിന്റെ ഒന്നാം തരംഗത്തില്‍ 27 പേര്‍ക്ക് ജീവന്‍ നഷ്ടമായിട്ടുണ്ടായിരുന്നു. ഫെബ്രുവരിയില്‍ നാശം വിതച്ച ഫ്രെഡി ചുഴലിക്കാറ്റിന്റെ രണ്ടാം തരംഗമാണ് മേഖലയെ ദുരിതത്തിലാക്കിയിട്ടുള്ളത്. ഇരു രാജ്യങ്ങളിലും കടുത്ത മഴയും കാറ്റുമാണ് അനുഭവപ്പെടുന്നത്.

700ലേറെ പേര്‍ പരിക്കേറ്റ് ആശുപത്രികളില്‍ ചികിത്സ തേടിയിട്ടുണ്ട്. ചുഴലിക്കാറ്റിന്റെ വേഗം കുറഞ്ഞെങ്കിലും കനത്ത മഴ തുടരാനായി സാധ്യതയുള്ളതിനാല്‍ ജനം വളരെയേറെ ആശങ്കയിലാണ്. ഓസ്‌ട്രേലിയന്‍ തീരത്ത് ജന്മം കൊണ്ട ഫ്രെഡി ചുഴലിക്കാറ്റ് ഇന്ത്യന്‍ മഹാസമുദ്രത്തിന്റെ ദക്ഷിണഭാഗം പിന്നിട്ട് മഡഗാസ്‌കറില്‍ എത്തിയ ശേഷമാണ് ആഫ്രിക്കന്‍ ഭൂഖണ്ഡത്തിന്റെ ദക്ഷിണമേഖലയില്‍ ആഞ്ഞടിച്ചത്.

ചുഴലിക്കാറ്റുകളുടെ ദിശാസഞ്ചാരപ്രക്രിയയില്‍ അപൂര്‍വമായ രീതിയില്‍, ലൂപ്(ചാക്രിക ചലനം) കണക്കെ മഡഗാസ്‌കറിലേക്ക് തിരികെ സഞ്ചരിച്ച ഫ്രെഡി ചുഴലിക്കാറ്റ് വീണ്ടും ആഫ്രിക്കയിലേക്കെത്തി.