തന്നെ അറസ്റ്റ് ചെയ്താല്‍ പ്രതിഷേധിക്കണമെന്ന് യു.എസ് മുന്‍ പ്രസിഡന്റ് ഡോണള്‍ഡ് ട്രംപ് ആഹ്വാനം ചെയ്ത പശ്ചാത്തലത്തില്‍ സുരക്ഷ ശക്തമാക്കി പൊലീസ്.

കുറ്റം ചുമത്തുകയാണെങ്കില്‍ ക്രിമിനല്‍ നടപടി നേരിടുന്ന ആദ്യ മുന്‍ പ്രസിഡന്റാകും ഡോണള്‍ഡ് ട്രംപ്. നേരത്തെ, പ്രസിഡന്റ് തെരഞ്ഞെടുപ്പിലെ തോല്‍വിക്ക് പിന്നാലെ ട്രംപിന്റെ ആഹ്വാനപ്രകാരം അണികള്‍ തെരുവിലിറങ്ങിയതോടെ മുമ്പുണ്ടാകാത്ത വിധത്തിലുള്ള അക്രമമമാണ് യു.എസില്‍ ഉണ്ടായത്.

പാര്‍ലമെന്റ് കെട്ടിടം വരെ അക്രമികള്‍ കൈയേറിയിട്ടുണ്ടായിരുന്നു. ഈ പശ്ചാത്തലത്തില്‍ കാപിറ്റോള്‍ പൊലീസ് ഉള്‍പ്പെടെ ജാഗ്രതയിലാണ്.
മാര്‍ച്ച് 21ന് തന്നെ അറസ്റ്റ് ചെയ്യുമെന്നാണ് ശനിയാഴ്ച ഡോണള്‍ഡ് ട്രംപ് സ്വന്തം സമൂഹമാധ്യമ പ്ലാറ്റ്‌ഫോമായ ട്രൂത്ത് സോഷ്യലിലൂടെ പറഞ്ഞത്.

രാജ്യത്തെ തിരിച്ചുപിടിക്കാനായി പ്രതിഷേധിക്കൂവെന്ന് അണികളെ ആഹ്വാനം ചെയ്യുകയും ചെയ്തിരുന്നു. മാന്‍ഹട്ടന്‍ ഡിസ്ട്രിക്ട് അറ്റോര്‍ണി നടത്തുന്ന അന്വേഷണവുമായി ബന്ധപ്പെട്ടാണ് തന്നെ അറസ്റ്റ് ചെയ്യാനൊരുങ്ങുന്നതെന്ന് ട്രംപ് . തനിക്കെതിരെ ഒരു കുറ്റവും തെളിയിക്കാനായി സാധിച്ചിട്ടില്ല. രാഷ്ട്രീയ പകപോക്കലാണ് നടക്കുന്നതെന്നും ട്രംപ് അവകാശപ്പെട്ടിരുന്നു.