ഉത്തരകൊറിയ തൊടുത്തുവിട്ട ബാലിസ്‌റ്റിക് മിസൈൽ ജപ്പാനും കൊറിയൻ പെനിൻസുലയ്ക്കും ഇടയിലുള്ള കടലിൽ പതിച്ചു. വിക്ഷേപണത്തിന് പിന്നാലെ ടോക്കിയോയിലെ ഒരു ദ്വീപിൽ താമസിക്കുന്നവരോട് മുൻകരുതൽ നടപടിയായി മാറി താമസിക്കാൻ ആവശ്യപ്പെട്ട് ജപ്പാൻ സർക്കാർ ഉത്തരവ് പുറപ്പെടുവിച്ചിരുന്നു. എന്നാൽ ആ ഉത്തരവ് ഇപ്പോൾ പിൻവലിച്ചിരിക്കുകയാണ്.

ഉത്തരകൊറിയൻ തലസ്ഥാനമായ പ്യോങ്‌യാങ്ങിനു സമീപത്തുനിന്നാണ് മിസൈൽ വിക്ഷേപിച്ചതെന്നും ജപ്പാനും കൊറിയൻ പെനിൻസുലയ്‌ക്കും ഇടയിലുള്ള കടലിലേക്ക് ഇത് പറന്നതായും ദക്ഷിണകൊറിയയുടെ ജോയിന്റ് ചീഫ്‌സ് ഓഫ് സ്‌റ്റാഫ് അറിയിച്ചു. മിസൈൽ ഒരു ഇടത്തരമോ ദീർഘദൂരമോ ആണെന്ന് വിശ്വസിക്കപ്പെടുന്നു, എന്നാൽ ഇത് എത്ര ദൂരം പറന്നുവെന്ന് വ്യക്തമല്ലെന്ന് ദി അസോസിയേറ്റഡ് പ്രസ് (എപി) റിപ്പോർട്ട് ചെയ്‌തു.

വ്യാഴാഴ്‌ചത്തെ വിക്ഷേപണത്തെത്തുടർന്ന്, വടക്കേ അറ്റത്തുള്ള ദ്വീപായ ഹോക്കൈഡോയിൽ അഭയം പ്രാപിക്കാൻ താമസക്കാരോട് ജാപ്പനീസ് സർക്കാർ മുന്നറിയിപ്പ് നൽകി. പിന്നീട്,ലഭ്യമായ വിവരങ്ങൾ അനുസരിച്ച് ദ്വീപിന് സമീപം മിസൈൽ പതിക്കാൻ സാധ്യതയില്ലെന്ന് കണ്ടെത്തിയതോടെ സർക്കാർ ഉത്തരവ് പിൻവലിച്ചു. മിസൈൽ വെള്ളത്തിൽ പതിച്ചതായി ജപ്പാൻ അറിയിച്ചിട്ടുണ്ടെങ്കിലും അതിന്റെ സ്ഥാനം എവിടെയാണെന്ന് കൃത്യമായി വ്യക്തമാക്കിയിട്ടില്ല.

കഴിഞ്ഞ വർഷം ഒക്ടോബറിൽ, ഉത്തരകൊറിയൻ മധ്യദൂര മിസൈൽ രാജ്യത്തിന് മുകളിലൂടെ പറന്നതിനെ തുടർന്ന് ജാപ്പനീസ് സർക്കാർ സമാനമായ ഒഴിപ്പിക്കൽ ഉപദേശം പുറപ്പെടുവിച്ചിരുന്നു. യുഎസ് പസഫിക് പ്രദേശമായ ഗുവാമിലെത്താനുള്ള മിസൈലിന്റെ സാധ്യത അറിയുന്നതിനായിരുന്നു ആ വിക്ഷേപണം നടത്തിയത്. മിസൈൽ പസഫിക്കിൽ പതിച്ചപ്പോൾ നാശനഷ്‌ടങ്ങളൊന്നും റിപ്പോർട്ട് ചെയ്‌തിട്ടില്ലെങ്കിലും, ജപ്പാൻ വടക്കുകിഴക്കൻ പ്രദേശങ്ങളിൽ താമസിക്കുന്നവരോട് മാറി നിൽക്കാനും ട്രെയിൻ സർവീസുകൾ നിർത്തിവയ്ക്കാനും ആവശ്യപ്പെട്ടിരുന്നു.

ഈ വർഷം ഉത്തരകൊറിയ നടത്തിയ ആയുധ പരീക്ഷണങ്ങളിൽ ഏറ്റവും പുതിയതാണ് വ്യാഴാഴ്‌ചത്തെ വിക്ഷേപണം. "പ്രായോഗികവും ആക്രമണാത്മകവുമായ" വഴികളിൽ ആണവായുധശേഖരം വർദ്ധിപ്പിക്കുമെന്ന് അതിന്റെ നേതാവ് കിം ജോങ് ഉൻ പറഞ്ഞതിന് ശേഷമാണ് ഇത് സംഭവിച്ചതെന്ന അസോസിയേറ്റഡ് പ്രസ് റിപ്പോർട്ട് ചെയ്‌തു.

ദക്ഷിണ കൊറിയയും അമേരിക്കയും നടത്തുന്ന സൈനികാഭ്യാസങ്ങൾക്ക് മറുപടിയായി ഉത്തരകൊറിയ ഈ വർഷം 30 മിസൈലുകളാണ് വിക്ഷേപിച്ചത്. സിയോളും വാഷിംഗ്ടണും പ്യോങ്‌യാങ്ങിന്റെ അവകാശവാദങ്ങൾ നിഷേധിക്കുകയും അഭ്യാസപ്രകടനങ്ങൾ പ്രതിരോധ സ്വഭാവമുള്ളതാണെന്നും ഉത്തരകൊറിയയിലെ വർദ്ധിച്ചുവരുന്ന ആണവ ഭീഷണിയോട് പ്രതികരിക്കുന്നതിനാണ് ഇത് നടത്തിയതെന്നും മറുപടി നൽകിയിരുന്നു.

പ്യോങ്‌യാങ്ങിനെതിരായ വാഷിംഗ്ടണിന്റെ ശത്രുതയ്ക്ക് മറുപടിയായാണ് അമേരിക്കയുടെ നേതൃത്വത്തിലുള്ള സൈനികാഭ്യാസമെന്ന് ഉത്തര കൊറിയൻ സർക്കാർ വളരെക്കാലമായി വാദിക്കുന്നു. മിസൈൽ പരീക്ഷണം നിർത്തിയതിന് പകരമായി അമേരിക്ക ഉപരോധം പിൻവലിക്കാത്തതിനാൽ ആണവായുധങ്ങൾ വികസിപ്പിക്കാൻ നിർബന്ധിതരായെന്ന് ഉത്തരകൊറിയ പറയുന്നു. അമേരിക്കയുള്‍പ്പെടെയുള്ള ശത്രുരാജ്യങ്ങള്‍ക്കെതിരായ തങ്ങളുടെ നീക്കങ്ങള്‍ക്ക് ശക്തി പകരുന്നതിനായി സന്നദ്ധ സൈനിക സേവനത്തിന് 8 ലക്ഷത്തോളം യുവാക്കളെ രംഗത്ത് കൊണ്ടുവന്നിരുന്നു ഉത്തര കൊറിയ.രാജ്യത്തിന്റെ എതിരാളികളെ പൂര്‍ണമായും തകര്‍ക്കുക, ഇരു കൊറിയകളെയും ഒന്നിപ്പിക്കുക എന്നീ ലക്ഷ്യങ്ങളെ മുന്‍നിര്‍ത്തി പ്രവര്‍ത്തിക്കാന്‍ പ്രതിജ്ഞാബദ്ധരായ യുവാക്കളാണ് സന്നദ്ധ സൈനിക സേവനത്തിനെത്തുന്നതെന്നാണ് ഉത്തര കൊറിയയുടെ അവകാശവാദം

ഉത്തര കൊറിയ ഹ്വാസോങ്-17 എന്ന ഭൂഖണ്ഡാന്തര ബാലിസ്റ്റിക് മിസൈല്‍ പരീക്ഷണം നടത്തിയതിന്റെ തൊട്ടടുത്ത ദിവസമാണ് സൈനിക റിക്രൂട്ട്‌മെന്റിനെക്കുറിച്ചുള്ള വാര്‍ത്തകള്‍ പുറത്തുവരുന്നത്.. ഇപ്പോൾ നടത്തിയ മിസൈൽ പരീക്ഷണത്തെ തുടർന്നുണ്ടാകുന്ന പ്രകോപനം എന്തെന്ന് നോക്കുകയാണ് അമേരിക്കയും ദക്ഷിണ കൊറിയയായും

ഏകദേശം ഒരാഴ്‌ചയായി, ദക്ഷിണ കൊറിയയിൽ നിന്നുള്ള ആശയവിനിമയത്തോട് ഉത്തരകൊറിയ പ്രതികരിക്കുന്നില്ല, പ്രത്യേകിച്ച് അതിർത്തി കടന്നുള്ള ഇന്റർ-കൊറിയൻ ഇടപെടലുകളിൽ. ഇരു കൊറിയകളും തമ്മിൽ തർക്കമുള്ള പടിഞ്ഞാറൻ കടൽ അതിർത്തിയിൽ ആകസ്മികമായ ഏറ്റുമുട്ടലുകൾ ഉണ്ടാകുന്നത് തടയാൻ ആശയവിനിമയം ആവശ്യമായതിനാൽ ഉത്തരകൊറിയയുടെ നടപടി സിയോളിന് ആശങ്ക ഉണ്ടാക്കി.

ഇതിന് പ്രതികരണം അറിയിക്കാത്ത ഉത്തര കൊറിയൻ നടപടിയെ അപലപിച്ച് ദക്ഷിണ കൊറിയൻ മന്ത്രി ക്വോൺ യംഗ്‌സെ രംഗത്ത് വന്നിരുന്നു. ഏകപക്ഷീയവും നിരുത്തരവാദപരമായ മനോഭാവം എന്നായിരുന്നു അദ്ദേഹം പറഞ്ഞത്.

അതേസമയം, ഈ മാസം അവസാനം, ദക്ഷിണ കൊറിയൻ പ്രസിഡന്റ് യൂൻ സുക് യോളും അദ്ദേഹത്തിന്റെ യുഎസ് കൗണ്ടർ ജോ ബൈഡനും തമ്മിൽ ഉച്ചകോടി നടക്കും. ഉത്തരകൊറിയയുടെ മിസൈൽ പരീക്ഷണങ്ങളും ആണവായുധ ശേഖരവും കൂടിക്കാഴ്‌ചയിൽ പ്രധാന വിഷയമാകുമെന്നാണ് പ്രതീക്ഷ. ഉത്തരകൊറിയ ദക്ഷിണ കൊറിയയിൽ ആണവ ആക്രമണം നടത്തിയാൽ അതിനെ നേരിടാൻ തങ്ങളുടെ സൈനിക ശേഷി ഉപയോഗിക്കുമെന്ന വാഷിംഗ്ടണിന്റെ ഉറപ്പുകൾ ലഭിക്കുമോയെന്നാണ് യൂണിന്റെ കീഴിലുള്ള ദക്ഷിണ കൊറിയൻ സർക്കാർ ഉറ്റുനോക്കുന്നത്.

അടുത്ത മാസത്തെ ജി 7 മീറ്റിംഗുകൾക്കായി ലോക നേതാക്കളും ജപ്പാനിൽ ഒത്തുകൂടുകയും കൂടിക്കാഴ്‌ചനടത്തുകയും ചെയ്യും, അവിടെ ഉത്തര കൊറിയയ്‌ക്കെതിരായ നയതന്ത്ര സമ്മർദ്ദം തുടരും. യുഎൻ സെക്യൂരിറ്റി കൗൺസിലിൽ സ്ഥിരാംഗങ്ങളായ ചൈനയും റഷ്യയും കഴിഞ്ഞ ഏതാനും മാസങ്ങളായി ഉത്തരകൊറിയയ്‌ക്കെതിരായ കർശന ഉപരോധം തടഞ്ഞിരുന്നു.