സുഡാനിലെ ആഭ്യന്തര സംഘര്ഷത്തില് കൊല്ലപ്പെട്ട കണ്ണൂര് ആലക്കോട് സ്വദേശി ആല്ബര്ട്ട് അഗസ്റ്റിന്റെ മൃതദേഹം ആശുപത്രിയിലേക്ക് മാറ്റിയതായി ഇന്ത്യന് എംബസി
സുഡാനിലെ ആഭ്യന്തര സംഘര്ഷത്തില് കൊല്ലപ്പെട്ട കണ്ണൂര് ആലക്കോട് സ്വദേശി ആല്ബര്ട്ട് അഗസ്റ്റിന്റെ മൃതദേഹം ആശുപത്രിയിലേക്ക് മാറ്റിയതായി ഇന്ത്യന് എംബസി അറിയിച്ചു. രാത്രിയോടെ ആംബുലന്സ് എത്തിയാണ് മൃതദേഹം മാറ്റിയത്.
സുഡാന് തലസ്ഥാനമായ ഖാര്ത്തൂമിലെ ആശുപത്രിയിലേക്കാണ് മൃതദേഹം മാറ്റിയത്. ആല്ബര്ട്ടിന് വെടിയേറ്റ ഫ്ലാറ്റിനകത്താണ് മൃതദേഹം ഉണ്ടായിരുന്നത്. മേഖലയില് സംഘര്ഷം തുടരുന്നതാണ് മൃതദേഹം മാറ്റാനായി തടസ്സമായിരുന്നത്. മൃതദേഹം സുരക്ഷിത സ്ഥാനത്തേക്ക് മാറ്റുവാന് കുടുംബം ഇന്ത്യന് എംബസി ഉദ്യോഗസ്ഥരുടെ സഹായം തേടിയിട്ടുണ്ടായിരുന്നു.
താമസിക്കുന്ന ഫ്ലാറ്റിന്റെ ജനലരികില് നില്ക്കുന്നതിനിടെയാണ് ആല്ബര്ട്ടിന് വെടിയേറ്റത്. ആല്ബര്ട്ടിന്റെ ഭാര്യക്കും മകളെയും സുരക്ഷിത സാഥാനത്തേക്ക് മാറ്റിയെന്നും ഭക്ഷണമടക്കം ഉറപ്പാക്കിയിട്ടുണ്ടെന്നും ഇന്ത്യന് എംബസിയും ആല്ബര്ട്ട് ജോലി ചെയ്തിരുന്ന ദാല് ഫുഡ് കമ്പനിയും വ്യക്തമാക്കി. ഇവര് താമസിച്ചിരുന്ന ഫ്ലാറ്റിന്റെ ബേസ്മെന്റിലേക്കാണ് ഇരുവരെയും മാറ്റിയിരിക്കുന്നത്.
ഇവിടേക്ക് ഭക്ഷണവും വെള്ളവും എത്തിച്ചിട്ടുണ്ടെന്ന് എംബസി അധികൃതര് അറിയിച്ചു. മകന്റെ മൃതദേഹം എത്രയും വേഗം നാട്ടിലെത്തിക്കാന് നടപടി ആവശ്യപ്പെട്ട് ആല്ബര്ട്ടിന്റെ അച്ഛന് അഗസ്റ്റിന് കേന്ദ്ര - സംസ്ഥാന സര്ക്കാരുകള്ക്ക് കത്ത് നല്കിയിരിക്കുകയാണ്.
"
https://www.facebook.com/Malayalivartha
