ഇസ്രയേലുമായുള്ള യുദ്ധത്തിനിടയില്‍ തടവിലാക്കിയ എല്ലാ ബന്ദികളെയും മോചിപ്പിക്കാന്‍ തയ്യാറാണെന്ന് ഹമാസ്. എന്നാല്‍ ആദ്യം ഇസ്രായേലില്‍ തടവിലാക്കിയ 6000 പലസ്തീനികളെ മോചിപ്പിക്കണമെന്നാണ് ഉപാധി. 224 സാധാരണക്കാരെയാണ് ഹമാസ് തടവിലാക്കിയത്. ഇറാനുമായി നടത്തിയ ചര്‍ച്ചയിലാണ് ഹമാസ് നിലപാട് വ്യക്തമാക്കിയത്. ഇറാന്‍ വിദേശകാര്യ മന്ത്രിയാണ് ഇക്കാര്യം അറിയിച്ചത്.

224 സാധാരണക്കാരെ ഹമാസ് ബന്ദികളാക്കി

ഒക്ടോബര്‍ ഏഴിന് ഹമാസ് ആയിരക്കണക്കിന് റോക്കറ്റുകളാണ് ഇസ്രായേലിന് നേരെ ഹമാസ് തൊടുത്തുവിട്ടത്. ഇതിന് പിന്നാലെ ഹമാസ് പോരാളികള്‍ ഇസ്രായേല്‍ അതിര്‍ത്തി പ്രദേശങ്ങളില്‍ പ്രവേശിച്ച് കൂട്ടക്കൊല നടത്തി. ഈ ആക്രമണങ്ങളില്‍ 1400 പേര്‍ കൊല്ലപ്പെട്ടു. ഇത് മാത്രമല്ല, നൂറുകണക്കിന് ഇസ്രായേലികളെയും വിദേശികളെയും ഹമാസ് ബന്ദികളാക്കിയിരുന്നു.

ഗാസയില്‍ 224 പേരെ ഹമാസ് ബന്ദികളാക്കിയതായതായി ഇസ്രായേല്‍ സൈന്യം ആരോപിച്ചിട്ടുണ്ട്. ഇത് മാത്രമല്ല, ഹമാസുമായുള്ള യുദ്ധത്തില്‍ ഇതുവരെ 309 ഇസ്രായേല്‍ സൈനികരും കൊല്ലപ്പെട്ടിട്ടുണ്ട്. ബന്ദികളാക്കിയവരുടെയും രക്തസാക്ഷികളുടെയും കുടുംബങ്ങള്‍ക്ക് വിവരങ്ങള്‍ നല്‍കിയിട്ടുണ്ടെന്ന് ഇസ്രായേല്‍ സൈന്യം അറിയിച്ചു.

ഇറാന്‍ ഇസ്രായേലിനെ ഭീഷണിപ്പെടുത്തി

മറുവശത്ത്, ഇറാന്‍ ഇസ്രായേലിനെ പരസ്യമായി ഭീഷണിപ്പെടുത്തി. ബോംബാക്രമണമല്ലാതെ ഇസ്രായേലിന് ഒന്നും ചെയ്യാന്‍ കഴിയില്ലെന്ന് ഇറാന്റെ ഇസ്ലാമിക് റെവല്യൂഷണറി ഗാര്‍ഡ് കോര്‍പ്സ് കമാന്‍ഡര്‍-ഇന്‍-ചീഫ് ജനറല്‍ ഹുസൈന്‍ സലാമി പറഞ്ഞു. ഗാസയില്‍ കാലുകുത്തിയാല്‍ അവരെ അവിടെ അടക്കം ചെയ്യും. അതുകൊണ്ട് അവര്‍ക്ക് വേറെ വഴിയില്ല. കുറ്റകൃത്യങ്ങള്‍ ചെയ്യുന്നതിലൂടെ നഷ്ടം നികത്താമെന്ന് അവര്‍ കരുതുന്നുവെന്നും സലാമി കൂട്ടിച്ചേര്‍ത്തു.

ഹമാസിന്റെ നിബന്ധന

ഇരട്ട പൗരത്വമുള്ള 50 ബന്ദികളെ മോചിപ്പിക്കുന്നതിന് പകരമായി ഇസ്രായേലിനോട് ഇന്ധനം നല്‍കണമെന്ന് ഹമാസ് നേരത്തെ ആവശ്യപ്പെട്ടിരുന്നു. എന്നാല്‍, ഈ ആവശ്യം ഇസ്രായേല്‍ നിരസിച്ചു. ബന്ദികളാക്കിയവരെ വിട്ടയച്ചാല്‍ മാത്രമേ ഇന്ധന വിതരണം അനുവദിക്കൂ എന്നാണ് ഇസ്രായേല്‍ പറയുന്നത്. അതേസമയം ബന്ദികളെ മോചിപ്പിക്കുന്നതുമായി ബന്ധപ്പെട്ട് ഖത്തറും ഈജിപ്തും വഴി ഇസ്രായേലും ഹമാസും തമ്മില്‍ ചര്‍ച്ചകള്‍ നടക്കുന്നുണ്ട്. ഇത് സംബന്ധിച്ച് ഖത്തര്‍ പ്രധാനമന്ത്രിയുടെ പ്രസ്താവനയും പുറത്തുവന്നിട്ടുണ്ട്. ബന്ദികളെ മോചിപ്പിക്കുന്നതിനുള്ള ചര്‍ച്ചകള്‍ പുരോഗമിക്കുകയാണെന്നും ഉടന്‍ വിജയം പ്രതീക്ഷിക്കുമെന്നും ഖത്തര്‍ പ്രധാനമന്ത്രി ഷെയ്ഖ് മുഹമ്മദ് ബിന്‍ അബ്ദുള്‍ റഹ്‌മാന്‍ അല്‍താനി പറഞ്ഞു.

നേരത്തെ ഹമാസ് ബന്ദികളാക്കിയവരെ കുറിച്ചുള്ള വിവരങ്ങൾ കൈമാറുന്ന പലസ്‌തീനികൾക്ക് പാരിതോഷികവും സംരക്ഷണവും ഇസ്രയേൽ പ്രഖ്യാപിച്ചിരുന്നു. ഇത് ചൂണ്ടിക്കാട്ടി കൊണ്ട് ഗാസയിൽ ഇസ്രയേൽ ലഘുലേഖകൾ വിതരണം ചെയ്‌തു.

ഒക്‌ടോബർ 7ന് 1,400 പേരുടെ മരണത്തിനിടയാക്കിയ അതിർത്തി കടന്നുള്ള ആക്രമണത്തിൽ 200ലധികം പേരെ ഹമാസ് തീവ്രവാദി സംഘം പിടികൂടി ബന്ദികളാക്കി. അതിന് ശേഷം ഗാസയിൽ ഇസ്രയേൽ നടത്തിയ വ്യോമാക്രമണത്തിൽ 5,000ത്തിലധികം പേർ കൊല്ലപ്പെട്ടതായി പലസ്‌തീൻ ആരോഗ്യ മന്ത്രാലയം അറിയിച്ചു.

“സമാധാനത്തോടെ ജീവിക്കാനും നിങ്ങളുടെ മക്കൾക്ക് നല്ല ഭാവി ലഭിക്കാനുമാണ് നിങ്ങളുടെ ആഗ്രഹമെങ്കിൽ, ഉടൻ തന്നെ ഈ മാനുഷിക പ്രവൃത്തി ചെയ്യുക, നിങ്ങളുടെ പ്രദേശത്ത് ബന്ദികളാക്കിയിരിക്കുന്നതിനെക്കുറിച്ചുള്ള വിലപ്പെട്ട വിവരങ്ങൾ പങ്കിടുക,” സൈന്യം ലഘുലേഖയിൽ പറഞ്ഞു.

"ഇസ്രയേൽ സൈന്യം നിങ്ങൾക്കും നിങ്ങളുടെ വീടിനും സുരക്ഷിതത്വം നൽകുന്നതിന് പരമാവധി പരിശ്രമം നടത്തുമെന്ന് ഉറപ്പുനൽകുന്നു, കൂടാതെ നിങ്ങൾക്ക് ഒരു സാമ്പത്തിക പാരിതോഷികം ലഭിക്കും. നിങ്ങൾക്ക് പൂർണ്ണമായ രഹസ്യാത്മകതയും ഞങ്ങൾ ഉറപ്പ് നൽകുന്നു." ലഘുലേഖ വ്യക്തമാക്കുന്നു.

വിവരങ്ങൾ സഹിതം വിളിക്കേണ്ട ഫോൺ നമ്പറുകൾ ലഘുലേഖയിൽ രേഖപ്പെടുത്തിയിട്ടുണ്ട്. തെക്കൻ ഗാസയിലെ ഖാൻ യൂനിസിലെ നാസർ ഹോസ്‌പിറ്റലിൽ അഭയം പ്രാപിച്ച ആളുകൾ ഇസ്രയേൽ വിമാനങ്ങൾ ലഘുലേഖകൾ പുറത്തേക്കിട്ട ശേഷം അവ ശേഖരിക്കുകയും കീറിയെറിയുകയും ചെയ്യും.

"നിങ്ങൾ ആഗ്രഹിക്കുന്നതെന്തും ചെയ്തോളു, ഞങ്ങൾ കാര്യമാക്കുന്നില്ല. ഗാസയിലുള്ള ഞങ്ങൾ എല്ലാവരും നിങ്ങളോട് പറയുന്നു, ഞങ്ങൾ കിഴക്ക് നിന്ന് പടിഞ്ഞാറോട്ട് ചെറുത്തുനിൽക്കുകയാണ്." ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനെ പരാമർശിച്ചുകൊണ്ട് ഒരു പലസ്‌തീൻകാരൻ പറഞ്ഞു.