സ്‌കോട്ട്‌ലാന്‍ഡിലും അയര്‍ലാന്‍ഡിലും ഇയോവിന്‍ വന്‍ നാശം വിതയ്ക്കുമെന്ന് മുന്നറിയിപ്പ്. വീടുകളില്‍ നിന്ന് പുറത്തിറങ്ങരുതെന്ന് മുന്നറിയിപ്പ്. ബ്രിട്ടന്റെ ഏതാനും ഭാഗങ്ങളിലും വടക്കന്‍ അയര്‍ലാന്‍ഡിലും സ്‌കോട്ട്‌ലാന്‍ഡിലുമായി മണിക്കൂറില്‍ 130 കിലോമീറ്റര്‍ വേഗം വരെ ശക്തിയുള്ള ഇയോവിന്‍ കൊടുങ്കാറ്റ് വീശുമെന്നാണ് മുന്നറിയിപ്പുള്ളത്.

തീരമേഖലകളില്‍ റെഡ് അലേര്‍ട്ടാണ് പ്രഖ്യാപിച്ചിട്ടുള്ളത്. 4.5 ദശലക്ഷം ആളുകള്‍ക്കാണ് കാലാവസ്ഥാ മുന്നറിയിപ്പ് നല്‍കിയിട്ടുള്ളത്.
അറ്റ്‌ലാന്റിക് സമുദ്രത്തിലാണ് ഇയോവിന്‍ കൊടുങ്കാറ്റ് രൂപം കൊണ്ടിട്ടുള്ളത്. വടക്കേ അമേരിക്കയില്‍ നിന്നുള്ള തണുത്ത വായുപ്രവാഹവും മധ്യ അറ്റ്‌ലാന്റിക്കിലെ ചൂടുവായു പ്രവാഹവും കൂടിക്കലര്‍ന്നാണ് ഇയോവിന്‍ രൂപം കൊണ്ടിട്ടുള്ളത്. അയര്‍ലാന്‍ഡില്‍ 100 വര്‍ഷത്തിനിടയിലുള്ള ഏറ്റവും മാരകമായ കൊടുങ്കാറ്റാണ് ഇയോവിന്‍ എന്നാണ് മുന്നറിയിപ്പ്.

താമസിക്കുന്ന കെട്ടിടത്തിന് തകരാര്‍ ഉണ്ടെങ്കില്‍ മാത്രം മറ്റൊരിടത്തേക്ക് മാറാനായി പുറത്തിറങ്ങാവൂവെന്നാണ് മുന്നറിയിപ്പുള്ളത്. വ്യാഴാഴ്ചയാണ് ലക്ഷക്കണക്കിന് ആളുകളുടെ മൊബൈല്‍ ഫോണുകളിലേക്ക് മുന്നറിയിപ്പ് നല്‍കിയിട്ടുള്ളത്. സ്‌കോട്ട്‌ലാന്‍ഡില്‍ 22 മേഖലകളിലും വടക്കന്‍ അയര്‍ലന്‍ഡില്‍ 9 കൌണ്ടികളിലുമാണ് റെഡ് അലേര്‍ട്ട് പ്രഖ്യാപിച്ചിട്ടുള്ളത്.
 വടക്കന്‍ അയര്‍ലാന്‍ഡില്‍ നിന്ന് സ്‌കോട്ട്‌ലാന്‍ഡിന്റെ മധ്യമേഖലയിലേക്കാണ് ഇയോവിന്‍ കൊടുങ്കാറ്റ് നീങ്ങുന്നത്.