മൊബൈൽ ഫോണുകൾ ഉപയോഗിക്കാത്തവരായി ആരും തന്നെയില്ല . ഒരുപാട് ഉപയോഗങ്ങൾ ആണ് മൊബൈൽ ഫോണിലൂടെ നമ്മുക്ക് ഉള്ളത് , അതോടൊപ്പം തന്നെ പല അപകടങ്ങളും ഇതിലുണ്ട് . സൂക്ഷിച്ച് കൈകാര്യം ചെയ്തില്ലെങ്കിൽ മരണം വരെ സംഭവിക്കാം . ഇപ്പോഴിതാ അത്തരത്തിലൊരു അപകടത്തിന്റെ നടുക്കുന്ന ദൃശ്യങ്ങളാണ് വൈറലാകുന്നത് . പിൻ പോക്കറ്റിലിട്ടിരുന്ന മൊബൈൽ ഫോൺ പൊട്ടിത്തെറിച്ച് തീപിടിച്ച് യുവതിക്ക് ​ഗുരുതര പരിക്ക്. ബ്രസീലിലെ അനപോളിസിലായിരുന്നു സംഭവം.

ഇതിന്റെ സിസിടിവി ദൃശ്യങ്ങൾ സോഷ്യൽ മീഡിയയിൽ വൈറലായി. പൊട്ടിത്തെറിക്ക് പിന്നാലെ പുകയോടെ യുവതിയുടെ വസ്ത്രത്തിൽ തീപിടിക്കുകയായിരുന്നു. നിമിഷ നേരത്തിനുള്ളിലാണ് ഇതെല്ലാം സംഭവിക്കുന്നത്.ഒപ്പമുണ്ടായിരുന്ന ഭർത്താവ് തീകെടുത്താൻ ശ്രമിക്കുന്നതും വീഡിയോയിൽ കാണാം. ഒരു ഷോപ്പിം​ഗ് മാളിലായിരുന്നു സംഭവം. ഉടനെ അവരെ ആശുപത്രിയിൽ പ്രവേശിപ്പിച്ചു. യുവതിയുടെ പിൻഭാ​ഗത്തും പുറത്തും കൈകളിലും പൊള്ളലേറ്റു. ഒന്നും രണ്ടും ഡി​ഗ്രി പൊള്ളലിനുള്ള ചികിത്സയാണ് ഡോക്ടർമാർ നൽകിയത്. മോട്ടറോള ഇ32 എന്ന മൊബൈലാണ് പൊട്ടിത്തെറിച്ചത്.

ഒരുവർഷത്തിനകം മാത്രം പഴക്കമുള്ളതാണ് മൊബൈൽ. കഴിഞ്ഞ ശനിയാഴ്ചയായിരുന്നു സംഭവം. സോഷ്യൽ മീഡിയയിൽ നിരവധി പേരാണ് വീഡിയോ കണ്ടത്. രണ്ടുദിവസം മുൻപാണ് വീഡിയോ സോഷ്യൽ മീഡിയയിലൂടെ പുറത്തുവന്നത്. നെറ്റിസൺസ് നിരവധി കമന്റുകളും പങ്കുവയ്‌ക്കുന്നുണ്ട്. മൊബൈൽ പൊട്ടിത്തെറിക്കുന്ന പ്രശ്നം പലയിടത്തും റിപ്പോർട്ട് ചെയ്യുന്നുണ്ട്. എന്താണ് ഫോൺ പൊട്ടിത്തെറിക്കുന്നതിന് കാരണം. ഇത് പെട്ടെന്ന് സംഭവിക്കുന്നതാണെന്ന് കരുതണ്ട. വളരെ ശ്രദ്ധയോടെ കൈകാര്യം ചെയ്യേണ്ട ഒന്നാണ് മൊബൈൽ ഫോണുകൾ. കുഞ്ഞുങ്ങൾക്കു കൊടുക്കുമ്പോൾ മാത്രമല്ല,

മുതിർന്നവർ ഉപയോഗിക്കുമ്പോഴും നമ്മുടെ മൊബൈൽ ഫോണിൽ ശ്രദ്ധിക്കേണ്ടതായ ഒട്ടേറെ കാര്യങ്ങളുണ്ട്. അപകടം വരുന്നതിനു മുൻപു മൊബൈൽ ഫോൺ തന്നെ പലവിധത്തിലും നമുക്ക് സിഗ്നൽ തരുന്നുണ്ട്. അതൊന്ന് ശ്രദ്ധിക്കണം എന്നുമാത്രം.പോസിറ്റീവ് – നെഗറ്റീവ് ഇലക്ട്രോഡുകളടങ്ങിയ ലിഥിയം–അയൺ ബാറ്ററികളാണ് സ്മാർട്ട്ഫോണുകളിലുള്ളത്. ബാറ്ററിയിലെ ഏതെങ്കിലും ഒരു ഘടകത്തിന് തകരാറുണ്ടായാൽ അത് ഫോണിനെ മുഴുവൻ ബാധിക്കും. തുടക്കത്തിലേ ഇത് ശ്രദ്ധിച്ചാൽ വലിയ അപകടം ഒഴിവാക്കാം.

ഫോണിന് പതിവിലും ചൂട് കൂടുന്നു, ചാർജ് പെട്ടെന്ന് തീരുന്നു, ചാർജ് കയറാൻ താമസം എന്നിവയാണ് മൊബൈൽ ഫോണിന് തകരാറുണ്ടെന്നതിന് ആദ്യം ലഭിക്കുന്ന സൂചന. മൊബൈൽ ഫോണുകൾ താഴെ വീഴുമ്പോൾ ചെറുതോ വലുതോ ആയ തകരാർ അതിന് സംഭവിക്കുന്നുണ്ട്.താഴെ വീണാൽ മൊബൈൽ ഒരു സർവീസ് സെന്ററിൽ കൊടുത്ത് പരിശോധിച്ച് പ്രശ്നമൊന്നുമില്ലെന്ന് ഉറപ്പുവരുത്തിയേ വീണ്ടും ഉപയോഗിക്കാവൂ.