ലോസാഞ്ചലസില്‍ നടക്കുന്ന കലാപത്തെ നേരിടാന്‍ സുരക്ഷാ സേനംഗങ്ങള്‍ കുതിരപ്പുറത്ത് തെരുവുകളില്‍ പട്രോളിംഗ് നടത്താനും, മുഖംമൂടി ധരിച്ച പ്രതിഷേധക്കാരെ ഉടന്‍ അറസ്റ്റ് ചെയ്യാനും ട്രംപ് ഉത്തരവിട്ടിരുന്നു. കലാപം റിപ്പോര്‍ട്ട് ചെയ്യുന്നതിനിടെ ഓസ്‌ട്രേലിയന്‍ മാദ്ധ്യമ പ്രവര്‍ത്തകയ്ക്ക് റബ്ബര്‍ ബുള്ളറ്റ് കൊണ്ട് പരിക്കേറ്റു.

ഓസ്‌ട്രേലിയന്‍ നയന്‍ ന്യൂസ് റിപ്പോര്‍ട്ടറായ ലോറന്‍ ടോമാസിക്കിനാണ് പരിക്കേറ്റത്, വെടിവയ്ക്കുന്നതിന് മുമ്പ് ഒരു പോലീസ് ഉദ്യോഗസ്ഥ ലോറന്‍ ടോമാസിയെയും അവരുടെ ക്യാമറ ഓപ്പറേറ്ററെയും ലക്ഷ്യം വയ്ക്കുന്നത് വീഡിയോ ദൃശ്യങ്ങളില്‍ കാണാം. കാലില്‍ വെടിയേറ്റ ടോമാസി വേദനയോടെ പെട്ടെന്ന് നിലവിളിച്ച് മാറുന്നതും ദൃശ്യങ്ങളില്‍ കാണാം. സംഭവത്തെക്കുറിച്ച് ടോമാസി ഔദ്യോഗിക പ്രസ്താവനകളൊന്നും പുറപ്പെടുവിച്ചിട്ടില്ലെങ്കിലും, ലോസാഞ്ചലസില്‍ നടന്നുകൊണ്ടിരിക്കുന്ന പ്രതിഷേധങ്ങളെക്കുറിച്ചുള്ള വിവരം നല്‍കിയിരുന്നു.

ലത്തീന്‍ വംശജര്‍ കൂടുതലുള്ള നഗരത്തില്‍ ഡസന്‍ കണക്കിന് കുടിയേറ്റക്കാരെ അറസ്റ്റ് ചെയ്തതില്‍ പ്രതിഷേധിച്ച ജനക്കൂട്ടത്തിനെതിരെയാണ് ഫെഡറല്‍ ഏജന്റുമാര്‍ ഫ്‌ലാഷ്ബാംഗ് ഗ്രനേഡുകളും കണ്ണീര്‍ വാതകവും പ്രയോഗിച്ച് ഏറ്റുമുട്ടിയത്.