ഹോര്മുസിലൂടെ സുരക്ഷിതമായ ചരക്കുനീക്കം ഉറപ്പാക്കണമെന്ന് ഫ്രാന്സ്
ഹോര്മുസ് കടലിടുക്കിലൂടെ സുരക്ഷിതമായ ചരക്കുനീക്കം ഉറപ്പാക്കണമെന്ന് ഫ്രാന്സ്. ഹോര്മുസില് ബഹുരാഷ്ട്ര ദൗത്യം നടത്തും. യു കെയുമായി ചേര്ന്നായിരിക്കും ബഹുരാഷ്ട്ര ദൗത്യം നടത്തുക. ഉടന് ഇതുമായി ബന്ധപ്പെട്ട ചര്ച്ച ആരംഭിക്കുമെന്നും ഫ്രഞ്ച് പ്രസിഡന്റ് ഇമ്മാനുവല് മാക്രോണ് വ്യക്തമാക്കി.
അതേസമയം, ഡോണള്ഡ് ട്രംപ് പ്രഖ്യാപിച്ച ഹോര്മുസ് ഉപരോധം ആരംഭിക്കാനിരിക്കെ ഹോര്മുസിലൂടെ ചരക്ക് നീക്കം വേഗത്തിലാക്കി ഇറാന്. ഇറാന്റെ രണ്ട് എണ്ണ ടാങ്കറുകള് ഗള്ഫില് നിന്ന് ഹോര്മുസ് വഴി പുറത്തുകടന്നു.ന്യൂ ഫ്യൂച്ചര്, ഓറോറ എന്നീ എണ്ണ ടാങ്കറുകളാണ് ഹോര്മുസ് കടന്നത്. ഇന്ത്യന് സമയം രാത്രി 7.30 നാണ് ട്രംപ് പ്രഖ്യാപിച്ച ഹോര്മുസ് ഉപരോധം ആരംഭിക്കുന്നത്. ഹോര്മുസില് അമേരിക്ക സംയമനം പാലിക്കണമെന്ന് ചൈന.ഇരുരാജ്യങ്ങളും മേഖലയില് സമാധാനം പാലിക്കണമെന്നും ചൈന ആവശ്യപ്പെട്ടു.
ഹോര്മുസ് തുറക്കണമെന്നാണ് രാജ്യാന്തര സമൂഹത്തിന്റെ താല്പ്പര്യം. ഊര്ജ്ജ സുരക്ഷയും വിതരണവും ഉറപ്പാക്കാന് തയ്യാറാണെന്നും ചൈന വ്യക്തമാക്കി.
എന്നാല് ഹോര്മുസ് കടലിടുക്കില് അമേരിക്ക പ്രഖ്യാപിച്ച ഉപരോധത്തെ യു കെ പിന്തുണയ്ക്കില്ലെന്ന് സ്റ്റാര്മര്. എന്ത് സമ്മര്ദ്ദം ചെലുത്തിയാലും ഇറാനെതിരായ യുദ്ധത്തിലേക്ക് ബ്രിട്ടനെ വലിച്ചിഴയ്ക്കരുത്. ഹോര്മുസ് കടലിടുക്ക് ഉപരോധിക്കുന്നതിനെ പിന്തുണയ്ക്കില്ല.ഹോര്മുസ് കടലിടുക്ക് പൂര്ണ്ണമായും തുറക്കണമെന്ന് തന്നെയാണ് ആവശ്യം. അതിനുള്ള ശ്രമം തുടരുമെന്നും സ്റ്റാര്മര് പറഞ്ഞു.
ഇസ്ലാമാബാദില് നടന്ന സമാധാനചര്ച്ചകള് പരാജയപ്പെട്ടതോടെയാണ് ഇറാന് തുറമുഖങ്ങള് ഉപരോധിക്കാന് അമേരിക്ക നീക്കം തുടങ്ങിയത്. ഹോര്മുസ് വഴിയുള്ള കപ്പല് ഗതാഗതം പൂര്ണമായി നിലച്ചെന്ന് റിപ്പോര്ട്ടുകള്. ഹോര്മുസ് കടലിടുക്കിലൂടെയുള്ള ഗതാഗതം നാവികസേനാ കപ്പലുകള് ഉപയോഗിച്ച് തടയുമെന്നാണ് അമേരിക്ക വ്യക്തമാക്കുന്നത്. ഇറാന് തുറമുഖങ്ങളില് പ്രവേശിക്കുകയും പുറത്തുകടക്കുകയും ചെയ്യുന്ന എല്ലാ സമുദ്രഗതാഗതത്തിനും ഉപരോധം ബാധകമാകും. നാവിക സേനാകപ്പലുകള് എത്തിയാല് വെടിനിര്ത്തല് ലംഘനമായി കണക്കാക്കുമെന്നും ഗുരുതര പ്രത്യാഘാതമുണ്ടാകുമെന്നുമാണ് ഇറാന്റെ പ്രതികരണം.
ഇതിനിടെ വെടിനിര്ത്തലില് മധ്യസ്ഥതക്ക് റഷ്യ സന്നദ്ധത അറിയിച്ചു. സമ്പൂര്ണ ഉപരോധം വന്നാല് ഇറക്കുമതിയെ ബാധിക്കുമെന്നതിനാല് ഇന്ത്യ സൈനിക നീക്കത്തില് പങ്കാളിയാകില്ല. സ്വതന്ത്ര കപ്പല് നീക്കം തടസ്സപ്പെടരുതെന്ന് നിലപാടാണ് ഇന്ത്യയുടേത്. ഹോര്മുസില് കപ്പല് ഗതാഗതം നിലച്ചതോടെ ആഗോള വിപണിയില് വീണ്ടും എണ്ണവില ഉയര്ന്നു. ഇതിനിടെ യുദ്ധത്തിനെതിരെ, പ്രതികരിച്ച ലിയോ പതിനാലാമന് മാര്പാപ്പയെ ഡോണള്ഡ് ട്രംപ് രൂക്ഷമായി വിമര്ശിച്ചു. രാഷ്ട്രീയക്കാരനാകാനല്ല, മഹാനായ മാര്പാപ്പയാകാനാണ് ശ്രദ്ധ കേന്ദ്രീകരിക്കേണ്ടതെന്ന് ട്രംപ് ട്രൂത്ത് സോഷ്യലില് പോസ്റ്റ് ചെയ്തു.
https://www.facebook.com/Malayalivartha
