ചെറിയ പ്രായത്തില്‍ത്തന്നെ ഫാഷന്‍ ലോകത്തില്‍ തന്റേതായ ഒരു സ്ഥാനം സൃഷ്ടിച്ചിട്ടുണ്ട് യുഎസിലെ പെന്‍സില്‍വാനിയ സ്വദേശിയായ ഗബ്രിയേല റോബര്‍ട്ട് എന്ന കൊച്ചുസുന്ദരി. നാല് മാസം പ്രായമുള്ളപ്പോഴാണ് അവള്‍ ആദ്യമായി സുന്ദരിപ്പട്ടം നേടുന്നത്. അവിടെ തുടങ്ങി പിന്നീടങ്ങോട്ട് ഇതവളുടെ ഹോബിയും പാഷനും എല്ലാമായി മാറി. ഇപ്പോള്‍ 5 വയസ്സുള്ള ഈ സുന്ദരിക്കുട്ടി ഇതിനകം 60 തവണ സുന്ദരിപ്പട്ടം സ്വന്തമാക്കിയിട്ടുണ്ട്. 

അമ്മ ലാസിയാണ് എല്ലാ പിന്തുണയും നല്‍കി ഗബ്രിയേലയ്‌ക്കൊപ്പമുള്ളത്. മകളെ മത്സരങ്ങളില്‍ പങ്കെടുപ്പിക്കുന്നതിനുവേണ്ടി എത്ര പണം മുടക്കാനും എത്ര ദൂരങ്ങള്‍ താണ്ടാനും ഈ അമ്മ ഒരുക്കമാണ്. മകളുടെ ലൈഫ്‌സ്‌റ്റൈല്‍ വളരെച്ചിലവേറിയതാണെങ്കിലും അവളുടെ മുഖത്തെ പുഞ്ചിരി കാണാന്‍ താന്‍ എന്തു കഷ്ടപ്പാടും സഹിക്കും എന്നാണ് അമ്മയുടെ നിലപാട്. ഇതുവരെ നൂറിലേറെ സൗന്ദര്യ മത്സരങ്ങളില്‍ ഗബ്രിയേല പങ്കെടുത്തിട്ടുണ്ട്. 30 ലക്ഷത്തിലധികം രൂപ ഈ ഇനത്തില്‍ അമ്മയ്ക്കു ചിലവായിട്ടുമുണ്ട്.

ഓരോ മത്സരങ്ങളില്‍ വിജയിക്കുമ്പോഴും അവള്‍ക്ക് കൈനിറയെ കളിപ്പാട്ടങ്ങള്‍ ലഭിക്കാറുണ്ട്. മത്സരത്തില്‍ വിജയിക്കുമ്പോള്‍ കാഷ്അവാര്‍ഡുകളും കിട്ടാറുണ്ട്. അതൊക്കെ അടുത്ത മത്സരങ്ങളിലേക്കു വേണ്ട വസ്ത്രങ്ങള്‍ വാങ്ങാനും മറ്റുമായി ഉപയോഗിക്കുന്നു. ഓരോ മത്സരത്തിനു മുമ്പും രണ്ടാഴ്ച ഗബ്രിയേല്‍ മത്സരത്തിനായുള്ള പരിശീലനം നടത്തും. ദിവസം ഒന്നരമണിക്കൂറാണ് പരിശീലനം.