നിയുക്ത ഫ്രഞ്ച് പ്രസിഡന്റ് മാക്രോണിന് അഭിനന്ദനവുമായി ബ്രിട്ടീഷ് പ്രധാനമന്ത്രി തെരേസ മേ
ഫ്രാന്സിന്റെ പുതിയ പ്രസിഡന്റായി തിരഞ്ഞെടുക്കപ്പെട്ട ഇമ്മാനുവല് മാക്രോണിന് ബ്രിട്ടീഷ് പ്രധാനമന്ത്രി തെരേസ മേയുടെ അഭിനന്ദനം. പുതിയ പ്രസിഡന്റിനെ പ്രധാനമന്ത്രി അഭിനന്ദനം അറിയിച്ചതായി ഡൗണിംങ് സ്ട്രീറ്റ് വാര്ത്താക്കുറിപ്പില് വ്യക്തമാക്കി.
ബ്രിട്ടന്റെ വളരെയടുത്ത സഖ്യരാഷ്ട്രമാണ് ഫ്രാന്സെന്നും പുതിയ പ്രസിഡന്റുമായി സഹകരിച്ച് മുന്നോട്ടുപോകുമെന്നും വാര്ത്താക്കുറിപ്പ് വിശദീകരിക്കുന്നു. യൂറോപ്യന് യൂണിയന്റെ ശക്തമായ കെട്ടുറപ്പും നിലനില്പും അനിവാര്യമാണെന്ന് അഭിപ്രായമുള്ള നേതാവാണ് ഇമ്മാനുവല് മാക്രോണ്. ബ്രെക്സിറ്റിലൂടെ യൂറോപ്യന് യൂണിയന് പുറത്തുപോയ ബ്രിട്ടനോടുള്ള അദ്ദേഹത്തിന്റെ നിലപാട് ഇനിയും വ്യക്തമാകാനുണ്ട്. അതിനാല് ബ്രെക്സിറ്റ് ചര്ച്ചകളിലെ നിലപാടുകള് അനുസരിച്ചാകും പുതിയ പ്രസിഡന്റുമായുള്ള ബ്രിട്ടന്റെ ബന്ധം.
അടുത്തിടെ ലണ്ടനിലെത്തി തെരേസ മേയെ നേരില്കണ്ട് ചര്ച്ച നടത്തിയ അദ്ദേഹം ഇരുനേതാക്കളും തമ്മിലുള്ള സൗഹൃദത്തിന് തുടക്കം കുറിച്ചിരുന്നു. നന്നായി ഇംഗ്ലീഷ് സംസാരിക്കുന്ന മാക്രോണിനെ ഇംഗ്ലീഷ് മാധ്യമങ്ങള്ക്കും ഏറെ താല്പര്യമാണ്. ഇരുനേതാക്കളും തമ്മിലുള്ള കൂടിക്കാഴ്ചയില് ബ്രിട്ടന്റെ വിവിധ മേഖലകളിലെ വൈദഗ്ധ്യവും കഴിവുകളും പ്രയോജനപ്പെടുത്താനായി കൂടുതല് ആളുകളെ ഫ്രാന്സിലേക്ക് സ്വാഗതം ചെയ്യുമെന്ന് മാക്രോണ് വ്യക്തമാക്കിയിരുന്നു.
ബാങ്കിംങ്, വിദ്യാഭ്യാസം, ഗവേഷണം തുടങ്ങിയ മേഖലകളിലെ സഹകരണമാണ് അദ്ദേഹം പ്രധാനമായും എടുത്തുപറഞ്ഞത്. ഏകീകൃത യൂറോപ്യന് വിപണി ശക്തിപ്രാപിക്കേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടിയിരുന്നു. തിരഞ്ഞെടുപ്പിന്റെ മധ്യത്തിലായതിനാല് ഇതേക്കുറിച്ച് ബ്രിട്ടന് ഔദ്യോഗികമായി പ്രതികരിച്ചിരുന്നില്ല. പുതിയ സര്ക്കാര് അധികാരമേറ്റശേഷമേ ഫ്രാന്സുമായുള്ള സഹകരണത്തിന്റെ രീതി വ്യക്തമാകൂ.
മാക്രോണിന്റെ വിജയം യൂറോപ്യന് യൂണിയന് കറന്സിയായ യൂറോയുടെ മൂല്യം ഉയര്ത്തിയിട്ടുണ്ട്. ഏഷ്യന് മാര്ക്കറ്റുകളില് യൂറോയ്ക്ക് കഴിഞ്ഞ നവംബറിനു ശേഷമുള്ള ഏറ്റവും ഉയര്ന്ന നിരക്കാണ് ഇന്നലെ തിരഞ്ഞെടുപ്പു ഫലം പുറത്തുവന്നതോടെ ഉണ്ടായത്. ലണ്ടനിലെ ഫ്രഞ്ച് എംബസിയില് മാക്രോണിന്റെ വിജയം ആഘോഷിക്കാന് നൂറുകണക്കിന് ഫ്രഞ്ച് പൗരന്മാര് ഒത്തുകൂടി. മൂന്നര ലക്ഷത്തോളം ഫ്രഞ്ചുകാര് ബ്രിട്ടനിലുണ്ടെന്നാണ് കണക്ക്. ഇതില് രണ്ടര ലക്ഷവും ലണ്ടന് നഗരത്തിലാണ്.
. ഇവരില് വോട്ടവകാശമുള്ള ഒരുലക്ഷത്തോളം പേര്ക്ക് സമ്മതിദാനാവകാശം വിനിയോഗിക്കാന് ലണ്ടനിലെ ഫ്രഞ്ച് എംബസിയില് സൗകര്യമൊരുക്കിയിരുന്നു. ഫ്രഞ്ച് നയതന്ത്ര ഉദ്യോഗസ്ഥര് ലണ്ടന് മെട്രോപൊളിറ്റന് പോലീസിന്റെ സഹകരണത്തോടെയായിരുന്നു കെന്സിംങ്ടണില് വോട്ടെടുപ്പിനുള്ള സൗകര്യം ഒരുക്കിയത്.
ലണ്ടനിലെ ഫ്രഞ്ച് വോട്ടര്മാരില് മഹാഭൂരിപക്ഷവും ഇമ്മാനുവല് മാക്രോണിനെ അനുകൂലിക്കുന്നവരാണ് .
https://www.facebook.com/Malayalivartha
