ലൈംഗിക ബന്ധത്തിലേര്‍പ്പെട്ടുവെന്ന് ആരോപിച്ച് സ്വവര്‍ഗാനുരാഗികളായ യുവാക്കള്‍ക്ക് 80 തവണ അടി നല്‍കി. ശരിയത്ത് നിയമങ്ങള്‍ ലംഘിച്ച് ജീവിക്കുന്നവര്‍ക്ക് കടുത്ത ശിക്ഷ നല്‍കുന്ന ഇന്ത്യോനേഷ്യയിലാണ് സ്വവര്‍ഗാനുരാഗികളെ ശിക്ഷിച്ചത്.

20, 23 വയസുള്ള സ്വവര്‍ഗാനുരാഗികളായ യുവാക്കളെയാണ് ജനമധ്യത്തില്‍ 80 അടി നല്‍കി ശിക്ഷിച്ചത്. കഴിഞ്ഞ മാര്‍ച്ചിലാണ് സ്വവര്‍ഗാനുരാഗികളായ ഇവര്‍ ലൈംഗിക ബന്ധത്തിലേര്‍പ്പെട്ടു എന്ന് ആരോപിച്ച് നാട്ടുകാര്‍ പിടിച്ച് പോലീസില്‍ ഏല്‍പ്പിച്ചത്.

തുടര്‍ന്ന് കോടതിയില്‍ ഹാജരാക്കി അടി ശിക്ഷ വിധിക്കുകയായിരുന്നു. ജനമധ്യത്തിലിട്ട് 80 തവണ അടി നല്‍കിയാണ് ശിക്ഷിച്ചത്. തന്റെ മകന്‍ ഒരു സ്വവര്‍ഗാനുരാഗിയായിരുന്നു എന്ന് അറിഞ്ഞിരുന്നില്ലെന്ന് ശിക്ഷയ്ക്ക് വിധേയനായവരില്‍ ഒരാളുടെ പിതാവ് പറഞ്ഞു. മകനെ ഇന്‍ലാമിക് ബോര്‍ഡിങ് സ്‌കൂളില്‍ വിട്ട് പഠിപ്പിക്കാന്‍ തീരുമാനിച്ചതായും പിതാവ് പറഞ്ഞു.

ഇന്ത്യോനേഷ്യയില്‍ ശരിയത്ത് നിയമങ്ങള്‍ ലംഘിക്കുന്നതിന് കടുത്ത ശിക്ഷയാണ് നൽകുന്നത്. അടുത്തിടെ വിവാഹേതര ബന്ധത്തിന്റെ പേരില്‍ ഒരു യുവതിക്ക് 26 അടി ശിക്ഷയായി നല്‍കിയിരുന്നു. എന്നാല്‍ ഇത്തരം സംഭവങ്ങള്‍ നടക്കുന്നത് ഇത് ആദ്യമായല്ല. ഒട്ടേറെ സംഭവങ്ങള്‍ റിപ്പോര്‍ട്ട് ചെയ്തിട്ടുണ്ട്.