വളരെ ആസൂത്രണം ചെയ്​താണ്​ പലരും മോഷണം നടത്താറ്​. പ്രദേശവും ആളുകളെയും നിരീക്ഷിച്ച്‌​ മനസിലാക്കി പദ്ധതിയിട്ട്​ നടത്തുന്ന മോഷണം പരാജയപ്പെട്ടാലോ. ചൈനയിലെ രണ്ട് കള്ളന്മാരുടെ വീഡിയോ ഇപ്പോള്‍ സോഷ്യല്‍ മീഡിയയില്‍ വൈറലാണ്.

വളരെ പ്ലാന്‍ ചെയ്ത് കൊള്ള നടത്താനെത്തിയതായിരുന്നു ഈ രണ്ട് കള്ളന്മാര്‍. സ്ഥാപനത്തിലെ സിസിടിവിയില്‍ മുഖം തിരിച്ചറിയാതിരിക്കാനായി മുഖംമൂടി അണിഞ്ഞാണ് ഇരുവരും എത്തിയത്.

പ്രദേശത്തെ ഒരു കടയുടെ ഗ്ലാസ്​ ഡോര്‍ ഇഷ്​ടിക കൊണ്ട്​ ഇടിച്ച്‌​ തകര്‍ക്കാനാണ്​ ഇരുവരും ശ്രമിച്ചത്​. ആദ്യത്തെയാള്‍ വാതിലിനു നേരെ ഇഷ്​ടിക എറിയുന്നു. എറിഞ്ഞ ശേഷം തിരിഞ്ഞതും രണ്ടാമന്‍ ഇഷ്​ടിക എറിഞ്ഞതും ഒരുമിച്ചായിരുന്നു. രണ്ടാമ​ന്റെ ഇഷ്​ടിക ഗ്ലാസില്‍ പതിക്കുന്നതിനു പകരം കൂട്ടുപ്രതിയുടെ മുഖത്ത്​ വന്നിടിക്കുകയും അയാള്‍ അബോധാവസ്​ഥയില്‍ നിലത്തു വീഴുന്നതും വിഡിയോയിലുണ്ട്​.

ഏറ് കൊണ്ട കള്ളന്‍ നിലംപതിച്ചതോടെ കവര്‍ച്ചാ ശ്രമം ഉപേക്ഷിക്കുകയായിരുന്നു. ഫെബ്രുവരി 14ന് നടന്ന സംഭവത്തിന്റെ ദൃശ്യങ്ങള്‍ ഒറ്റ ദിവസം കൊണ്ട് കണ്ടത് 12 മില്യണ്‍ ആളുകളാണ്. ഇത്തരത്തിലുള്ള കള്ളന്മാരാണെങ്കില്‍ തങ്ങള്‍ക്ക് ജോലി എളുപ്പമാകുമെന്നാണ് സംഭവം നടന്ന ചൈനയിലെ ഷാങ്ഹായ് പോലീസ് പറയുന്നത്.

വീഡിയോ കാണുക...