ബലാല്‍സംഗ കേസില്‍ അറസ്റ്റിലായ ബിഷപ്പ് ഫ്രാങ്കോ മുളയ്ക്കലിനെ രണ്ട് ദിവസത്തെ പൊലീസ് കസ്റ്റഡിയില്‍ കോടതി വിട്ടു. ബിഷപ്പിന്റെ ആവശ്യം കോടതി പൂര്‍ണമായും തള്ളി. പൊലീസ് കസ്റ്റഡിയില്‍ വിടരുതെന്നും ജാമ്യം നല്‍കണമെന്നും ബിഷപ്പ് വാദിച്ചു. എന്നാല്‍ പ്രതിയേയും കൊണ്ട് തെളിവെടുപ്പിന് പോകണം. ബിഷപ്പ് 2014ല്‍ ഉപയോഗിച്ച വസ്ത്രവും ലാപ്‌ടോപ്പും കണ്ടെടുക്കണം. ലൈംഗിക ശേഷി പരിശോധിക്കണം തുടങ്ങിയ ആവശ്യങ്ങള്‍ പൊലീസ് ഉന്നയിച്ചു. ഇത് പരിഗണിച്ചാണ് 48 മണിക്കൂര്‍ കസ്റ്റഡിയില്‍ വിട്ടത്. മൂന്ന് ദിവസത്തേക്കാണ് പൊലീസ് കസ്റ്റഡിയിലേക്ക് വിടണമെന്ന് ആവശ്യപ്പെട്ടെങ്കിലും അത് പൂര്‍ണമായും അനുവദിച്ചില്ല. അതോടൊപ്പം ജാമ്യവും നല്‍കിയില്ല.

48 മണിക്കൂര്‍ സമയം പോരെന്നാണ് അന്വേഷണ സംഘം പറയുന്നത്. കാരണം കുറുവിലങ്ങാട് മഠത്തില്‍ ഉള്‍പ്പെടെ പ്രതിയെ എത്തിച്ച് തെളിവെടുപ്പ് നടത്തണം. അതിന് സമയം വേണം. തിങ്കളാഴ്ച ഉച്ചയ്ക്ക് 2.30ന് ബിഷപ്പിനെ പാലാ മജിസ്‌ട്രേട്ട് കോടതിയില്‍ വീണ്ടും ഹാജരാക്കണം. അതിന് ശേഷം അദ്ദേഹത്തെ റിമാന്‍ഡ് ചെയ്യും. സാധാരണഗതിയില്‍ മജിസ്‌ട്രേട്ട് കോടതികള്‍ ബലാല്‍സംഗ കേസില്‍ ജാമ്യം നല്‍കാറില്ല. ജാമ്യം നിഷേധിച്ച സ്ഥിതിക്ക് ബിഷപ്പിനെ കോട്ടയം പൊലീസ് ക്ലബിലേക്ക് കൊണ്ടുപോകും. അതിന് മുമ്പോ, ശേഷമോ ലൈംഗികശേഷി പരിശോധനയ്ക്ക് വിധേയമാക്കും. 

പിന്നീട് കുറുവിലങ്ങാട് മഠത്തിലും അതിന് ശേഷം കന്യാസ്ത്രീയുടെ വസതിയിലും ബിഷപ്പ് തങ്ങിയെന്ന് പറയുന്ന തൊടുപുഴയിലെ അടക്കമുള്ള സ്ഥലങ്ങളില്‍ തെളിവെടുപ്പിനായി കൊണ്ടുപോയേക്കും. കോടതിയില്‍ കൊണ്ടുവന്നപ്പോള്‍ എന്തെങ്കിലും പറയാനുണ്ടോ എന്ന് മജിസ്‌ട്രേട്ട് ചോദിച്ചപ്പോള്‍ പൊലീസ് ബലംപ്രയോഗിച്ച് തന്റെ രക്തവും ഉമിനീരും എടുത്തെന്ന് ബിഷപ്പ് പരാതി പറഞ്ഞു.