അമേരിക്കയിലെ ചികിത്സകള്‍ക്ക് ശേഷം മുഖ്യമന്ത്രി പിണറായി വിജയന്‍ തിരിച്ചെത്തി. ഞായറാഴ്ച പുലര്‍ച്ചെ 3.30നാണ് മുഖ്യമന്ത്രി തിരുവനന്തപുരത്ത് എത്തിയത്. സെപ്റ്റംബര്‍ 24ന് മുഖ്യമന്ത്രി തിരിച്ചെത്തുമെന്നാണ് നേരത്തെ വ്യവസായ മന്ത്രി ഇ.പി.ജയരാജന്‍ അറിയിച്ചിരുന്നത്.

സെപ്റ്റംബര്‍ രണ്ടിന് പുലര്‍ച്ചെയാണ് ചികിത്സയ്ക്കായി മുഖ്യമന്ത്രി അമേരിക്കയിലേക്ക് പോയത്. ഓഗസ്റ്റ് മധ്യത്തോടെ പോകാനിരുന്ന മുഖ്യമന്ത്രി യാത്ര പ്രളയക്കെടുതികള്‍ കാരണം നീട്ടിവയ്ക്കുകയായിരുന്നു. ചികിത്സയ്ക്കുശേഷം മുഖ്യമന്ത്രി കഴിഞ്ഞ ദിവസം അമേരിക്കയില്‍ നടന്ന പൊതുപരിപാടിയില്‍ പങ്കെടുത്തിരുന്നു.

കേരളത്തിന്റെ പുനര്‍നിര്‍മാണത്തിന് ഗ്ലോബല്‍ സാലറി ചലഞ്ചില്‍ പങ്കെടുക്കാന്‍ അമേരിക്കയിലെ മലയാളികളോട് മുഖ്യമന്ത്രി അഭ്യര്‍ഥിച്ചിരുന്നു. ഒരുമാസത്തെ ശമ്പളം നല്‍കാന്‍ തയ്യാറുള്ളവര്‍ അത് നല്‍കണം. കേരളത്തിന്റെ പുനര്‍നിര്‍മാണത്തിന് അമേരിക്കന്‍ മലയാളികളുടെ സഹായമുണ്ടാകണമെന്നും പിണറായി വിജയന്‍ കൂട്ടിച്ചേര്‍ത്തു.