ബലാത്സംഗ കേസില്‍ ഏറ്റവും പ്രധാനമാണ് പ്രതിയുടെ ലൈംഗിക ശേഷി പരിശോധന. ജലന്ധര്‍ ബിഷപ്പ് ഫ്രാങ്കോ മുളയ്ക്കലിനെ കഴിഞ്ഞ ദിവസം ലൈംഗിക ശേഷി പരിശോധനയ്ക്ക് വിധേയമാക്കിയിരുന്നു. കോടതിയില്‍ ഹാജരാക്കിയതിന് ശേഷം കോട്ടയം മെഡിക്കല്‍ കോളേജിലാണ് ലൈംഗിക ശേഷി പരിശോധനയ്ക്ക് വിധേയമാക്കിയത്. ഇതോടൊപ്പം ഡി.എന്‍.എ. സാമ്പിളും ശേഖരിച്ചു. ഈയവസരത്തില്‍ പലര്‍ക്കും സംശയമുണ്ടാകും എങ്ങനെയായിരിക്കും ലൈംഗിക ശേഷി പരിശോധന നടത്തുകയെന്നതെന്ന്.

ബലാത്സംഗക്കേസുകളിലെ ആരോപണ വിധേയര്‍ക്ക് പ്രധാനമായും ചെയ്യുന്ന മെഡിക്കല്‍ ടെസ്റ്റാണ് ലൈംഗിക ശേഷി ടെസ്റ്റ്. തങ്ങള്‍ക്ക് ശേഷിയില്ല എന്ന് പറഞ്ഞ് കോടതിയില്‍ വാദിച്ച് പ്രതികള്‍ രക്ഷപ്പെടാതിരിക്കാനാണ് ഈ ടെസ്റ്റ് ചെയ്യുന്നത്. കോടതിയില്‍ കേസ് ജയിക്കാനുള്ള സുപ്രധാന ശാസ്ത്രീയ മാര്‍ഗം കൂടിയാണിത്. 

ലൈംഗിക ശേഷി പരിശോധനയില്‍ മൂന്ന് ടെസ്റ്റുകളാണ് പ്രധാനമായും ഉള്ളത്. ഇതില്‍ ഏറ്റവും പ്രധാനമാണ് ഉദ്ദാരണ ശേഷിയും ശുക്ല പരിശോധനയും. കുഞ്ഞുങ്ങളുണ്ടാകാതെ വലയുന്ന ദമ്പതിമാരിലും ഈ പരിശോധന നടത്താറുണ്ട്. ഇതില്‍ ആദ്യ പടിയായി പുരുഷന്റെ ശുക്ല പരിശോധന നടത്താറുണ്ട്. സ്വയംഭോഗം ചെയ്ത് ശുക്ലമെടുത്ത് നിശ്ചിത സമയത്തിനുള്ളില്‍ ലാബിലെത്തിക്കണം. അത് പരിശോധിച്ചാണ് പുരുഷനാണോ കുഴപ്പമെന്ന് കണക്കാക്കുന്നത്. പുരുഷ ശുക്ലത്തിന്റെ പരിശോധനയും അതില്‍ അടങ്ങിയിട്ടുള്ള ബീജത്തിന്റെ അളവുമാണ് നടക്കുന്നത്. പുരുഷന് പ്രത്യുത്പാദന ശേഷിയുണ്ടോ എന്ന് തിരിച്ചറിയാന്‍ ഈ പരിശോധനയാണ് നടത്തുന്നത്. വന്ധ്യം കരണ ശസ്ത്രക്രിയയ്ക്ക് വിധേയരായ പുരുഷന്മാരില്‍ ശസ്ത്രക്രിയ വിജയമായിരുന്നോ എന്നറിയാന്‍ വേണ്ടിയും ഈ പരിശോധന നടത്തിയിരുന്നു. ബീജദാനം നടത്തുന്ന പുരുഷരിലും മൃഗങ്ങളിലും ഇത് നടത്താറുണ്ട്.

ഉദ്ദാരണം ശരിക്കും വരുന്നുണ്ടോയെന്നത് വലിയ പ്രാധാന്യം അര്‍ഹിക്കുന്നതാണ്. പുരുഷ ലിംഗത്തിലെ രക്ത പ്രവാഹത്തിന്റെ ശക്തിയും ചിലപ്പോള്‍ പരിശോധിക്കാറുണ്ട്. നാഡീഞരമ്പുകളുടെ തളര്‍ച്ച മൂലവും ഉദ്ധാരണപ്രശനങ്ങളുണ്ടാകാം. ശരിയായ രീതിയില്‍ രക്തപ്രവാഹമില്ലാതെ വരുമ്പോഴും ഉദ്ധാരണപ്രശ്‌നങ്ങള്‍ ഉണ്ടാകാറുണ്ട്..

പുരുഷലിംഗം ഉദ്ധരിച്ച അവസ്ഥയിലും അല്ലാത്ത അവസ്ഥയിലും ഡോക്ടര്‍ വിദഗ്ധ പരിശോധന നടത്തും. ഇതോടൊപ്പം പ്രതിയുടെ ബിപി പരിശോധന നടത്തും. കൂടാതെ രക്ത പരിശോധനയും നടത്തും. 

ആവശ്യമെങ്കില്‍ എന്‍ഡോ ക്രൈനോളജി ടെസ്റ്റും നടത്തും. 

പുരുഷന്മാരില്‍ സാധാരണയായി രാവിലെ ഉണ്ടാകുന്ന ഉദ്ധാരണവും പരിശോധനയ്ക്ക് വിധേയമാക്കും. പീഡനക്കേസുകളിലെ പ്രതികളോട് സ്വയംഭോഗം ചെയ്ത് ശുക്ലം പരിശോധനയ്ക്ക് കൊടുക്കാനും മുമ്പ് ആവശ്യപ്പെട്ടിരുന്നു. എന്നാല്‍ പ്രതികളുടെ വ്യക്തി സ്വാതന്ത്ര്യത്തിന് മേലുള്ള കടന്നുകയറ്റമാണ് എന്ന് കണ്ടതിനെത്തുടര്‍ന്ന് ഇത് പിന്നീട് വിലക്കി. ലൈംഗിക ശോഷി പരിശോധന പോസിറ്റീവാണെന്നാണ് കോട്ടയം മെഡിക്കല്‍ കോളേജില്‍ നിന്നുള്ള റിപ്പോര്‍ട്ട്.