സ്വകാര്യ ബസുടമകള് നിരക്ക് വര്ദ്ധിപ്പിക്കണമെന്ന ആവശ്യം ഉപേക്ഷിക്കുന്നു... സര്ക്കാരിനു മുന്നില് ചാര്ജ് വര്ദ്ധനക്കു പകരം നിര്ദ്ദേശങ്ങള് മുന്നോട്ടുവെക്കും
സ്വകാര്യ ബസുടമകള് നിരക്ക് വര്ധിപ്പിക്കണമെന്ന ആവശ്യം ഉപേക്ഷിക്കുന്നു. നിരക്ക് വര്ധിപ്പിക്കുന്നത് യാത്രക്കാരെ ബസില് നിന്ന് അകറ്റും എന്ന വിലയിരുത്തലിലാണ് പ്രധാന ആവശ്യത്തില് നിന്നുള്ള ബസുടമകളുടെ പിന്മാറ്റം. പകരം, ബദല് നിര്ദേശങ്ങളാണ് ബസുടമകള് മുന്നോട്ടു വെക്കുന്നത്. ഇന്ധനവില വര്ധന മൂലം പ്രതിസന്ധിയിലായ ബസ് വ്യവസായം പിടിച്ചു നിറുത്താനുള്ള ഏക മാര്ഗം നിരക്ക് വര്ധന മാത്രമാണെങ്കിലും പ്രളയം വഴി സര്വതും നഷ്ടപ്പെട്ട കേരളത്തിന്റെ ഇപ്പോഴത്തെ സാഹചര്യം അതിന് അനുകൂലമല്ല. മാത്രവുമല്ല, ഇപ്പോള് തന്നെ വന്തോതില് കുറഞ്ഞ യാത്രക്കാരുടെ എണ്ണം ഇനിയും നിരക്ക് വര്ധിപ്പിച്ചാല് വീണ്ടും കുറയും. ഈ പഴുതിലൂടെ സ്വകാര്യ വാഹനങ്ങള് പെരുകും. ഈ സാഹചര്യത്തിലാണ് നിരക്ക് വര്ധനവ് എന്ന ആവശ്യത്തെ ഉപേക്ഷിച്ച് ബദല് നിര്ദേശങ്ങള് അവതരിപ്പിക്കുന്നത്.
പ്രധാന ബദല് നിര്ദേശങ്ങള് ഇവയാണ്: ഇന്ധനത്തിന് സബ്സിഡി, നികുതിയിളവ്, 15വര്ഷമെന്ന കാലാവധി ദീര്ഘിപ്പിക്കല്, കെ.എസ്.ആര്.ടി.സിയില് ഇപ്പോള് നടപ്പിലാക്കിയ സിംഗിള് ഡ്യൂട്ടി പരിഷ്കാരത്തിനൊപ്പം റൂട്ടുകളിലും ക്രമീകരണം, ഈ റൂട്ടുകളില് സ്വകാര്യ ബസുകള്ക്ക് പെര്മിറ്റ്, ഇന്ഷൂറന്സ് പ്രീമിയം കുറക്കുക, ടോളുകളില് നിന്ന് ഒഴിവാക്കുക, പൊതുവാഹനമായതിനാല് കേന്ദ്രസംസ്ഥാന നികുതികളില് ഇളവ് വരുത്തുക, സൗജന്യ യാത്രകള്ക്ക് നിയന്ത്രണം വരുത്തുക, ബസുടമകള്ക്ക് ക്ഷേമനിധി ഏര്പ്പെടുത്തുക, റോഡുകളുടെ ശോച്യാവസ്ഥ അടിയന്തര പ്രാധാന്യത്തോടെ കുറ്റമറ്റതാക്കുക.ഇവ സര്ക്കാറിന് ആലോചിക്കാവുന്നതാണെന്ന് ബസുടമകള് പറയുന്നു. ഇക്കാര്യങ്ങളെ സര്ക്കാര് എങ്ങനെ സമീപിക്കുമെന്നതിനെ അടിസ്ഥാനമാക്കി തുടര് നടപടികള് ആലോചിക്കാനാണ് ബസുടമകളുടെ തീരുമാനം.
https://www.facebook.com/Malayalivartha
